ۋكراينا پرەزيدەنتى ۆلاديمير زەلەنسكيدىڭ ايەلى ەلەنا زەلەنسكايا كوروناۆيرۋس جۇقتىردى. ونىڭ جاعدايى جاقسى، سيمپتومدار بايقالمايدى. بۇل تۋرالى ۋكراينا پرەزيدەنتىنىڭ ءباسپاسوز قىزمەتى حابارلادى. پرەزيدەنت زەلەنسكي مەن بالالارىنىڭ اناليزىنەن كوروناۆيرۋس تابىلماعان.
ەلەنا زەلەنسكايا قازىر امبۋلاتوريادا ەمدەلىپ جاتىر جانە وتباسىنان وقشاۋلانعان. پرەزيدەنت ايەلىنىڭ ماۋسىمنىڭ باسىنداعى اناليزىنەن ۆيرۋس تابىلماعان.
"ونىڭ ۆيرۋستى قاشان جانە قايدا جۇقتىرىپ العانى ازىرگە بەلگىسىز. ەپيدەميولوگيالىق تەكسەرىس جۇرگىزىلىپ جاتىر. بايلانىستا بولعان ادامداردىڭ بارىنە حابارلاندى" دەپ مالىمدەدى پرەزيدەنتتىڭ كەڭسەسى.
پرەزيدەنت الداعى بولاتىن جينالىستارىن ونلاين رەجيمگە اۋىستىرىپ، جەكە كەزدەسۋلەرى مەن قاتىساتىن ءىس-شارالارىن كەيىنگە قالدىردى.
"مەن دە وسىنى باستان وتكەرگىم كەلەدى. جانىمداعىلارعا "ادامدار بۇل دەرتتىڭ جامان ەكەنىن ءتۇسىنۋ ءۇشىن مەن دە اۋىرىپ كورەيىن، مەنى وقشاۋلاپ تاستاڭدار. ونى دا وتكەرەرمىن. وسى ارقىلى جۇرتقا كورسەتسەم" دەدىم. كەيىن بۇل "شەكتەن شىعۋ" دەپ، ويىمنان باس تارتتىم. وتباسىم كەشىرمەس ەدى" دەگەن زەلەنسكي.
ايتا كەتەيىك، ۋكراينانىڭ كيەۆ جانە باسقا توعىز ايماعى كارانتين رەجيمىن جەڭىلدەتۋدىڭ كەلەسى كەزەڭىنە دايىن ەمەس. بۇل تۋرالى جۇمادا ۋكراينا پرەزيدەنتى ۆلاديمير زەلەنسكيدىڭ توراعالىعىمەن وتكەن COVID-19 تارالۋىن بولدىرماۋعا ارنالعان كونفەرەنتسيادا ايتىلدى، دەپ حابارلادى پرەزيدەنتتىڭ ءباسپاسوز قىزمەتى.
زەلەنسكي بۇعان دەيىن "جۇرتقا ۆيرۋستىڭ قاۋىپتىلىگىن كورسەتۋ ءۇشىن ءوزى دە كوروناۆيرۋس جۇقتىرعىسى كەلەتىنىن" ايتقان ەدى.
اننەكسيالانعان قىرىم مەن سەۆاستوپول، وككۋپاتسيالانعان دونباسس ايماعىن قوسپاعاندا ۋكراينا ايماعىندا 29753 ادامنان كوروناۆيرۋس تابىلدى. 13567 ادام ەمدەلىپ شىقتى. 870 ادام قايتىس بولدى. 11 ماۋسىمدا ۋكراينادا 689 ادامنان ۆيرۋس تابىلدى. بۇل – انتيرەكورد.
اياۋلىم ءابىلدا، "ادىرنا" ۇلتتىق پورتالى.
