Ýkraına prezıdenti Vladımır Zelenskııdiń áıeli Elena Zelenskaıa koronavırýs juqtyrdy. Onyń jaǵdaıy jaqsy, sımptomdar baıqalmaıdy. Bul týraly Ýkraına prezıdentiniń baspasóz qyzmeti habarlady. Prezıdent Zelenskıı men balalarynyń analızinen koronavırýs tabylmaǵan.
Elena Zelenskaıa qazir ambýlatorııada emdelip jatyr jáne otbasynan oqshaýlanǵan. Prezıdent áıeliniń maýsymnyń basyndaǵy analızinen vırýs tabylmaǵan.
"Onyń vırýsty qashan jáne qaıda juqtyryp alǵany ázirge belgisiz. Epıdemıologııalyq tekseris júrgizilip jatyr. Baılanysta bolǵan adamdardyń bárine habarlandy" dep málimdedi prezıdenttiń keńsesi.
Prezıdent aldaǵy bolatyn jınalystaryn onlaın rejımge aýystyryp, jeke kezdesýleri men qatysatyn is-sharalaryn keıinge qaldyrdy.
"Men de osyny bastan ótkergim keledi. Janymdaǵylarǵa "adamdar bul derttiń jaman ekenin túsiný úshin men de aýyryp kóreıin, meni oqshaýlap tastańdar. Ony da ótkerermin. Osy arqyly jurtqa kórsetsem" dedim. Keıin bul "shekten shyǵý" dep, oıymnan bas tarttym. Otbasym keshirmes edi" degen Zelenskıı.
Aıta keteıik, Ýkraınanyń Kıev jáne basqa toǵyz aımaǵy karantın rejımin jeńildetýdiń kelesi kezeńine daıyn emes. Bul týraly jumada Ýkraına prezıdenti Vladımır Zelenskııdiń tóraǵalyǵymen ótken COVID-19 taralýyn boldyrmaýǵa arnalǵan konferenııada aıtyldy, dep habarlady prezıdenttiń baspasóz qyzmeti.
Zelenskıı buǵan deıin "jurtqa vırýstyń qaýiptiligin kórsetý úshin ózi de koronavırýs juqtyrǵysy keletinin" aıtqan edi.
Anneksııalanǵan Qyrym men Sevastopol, okkýpaııalanǵan Donbass aımaǵyn qospaǵanda Ýkraına aımaǵynda 29753 adamnan koronavırýs tabyldy. 13567 adam emdelip shyqty. 870 adam qaıtys boldy. 11 maýsymda Ýkraınada 689 adamnan vırýs tabyldy. Bul – antırekord.
Aıaýlym ÁBILDA, "Adyrna" ulttyq portaly.
