تۇركىستان وبلىسىنىڭ پوليتسەيلەرى ساداقا جاشىكتەرىنە ۇرلىققا تۇسكەن كۇدىكتىلەردى ۇستادى دەپ حابارلايدى «ادىرنا»ۇلتتىق پورتالى قازاقستان رەسپۋبليكاسىنىڭ ىشكى ىستەر مينيسترلىگىنە سىلتەمە جاساپ.
تۇركىستان قالالىق پوليتسيا باسقارماسىنا وبلىس ورتالىعىنىڭ تۇرعىنى ارىزدانىپ، تاڭعى ۋاقىتتا بەلگىسىز بىرەۋ اۋىلدىق مەشىتتىڭ ساداقا جاشىگىنە ۇرلىققا تۇسكەنىن جەتكىزدى. وقيعا ورنىنا شۇعىل جەدەل-تەرگەۋ توبىنىڭ قىزمەتكەرلەرى شىقتى.
پوليتسيا قىزمەتكەرلەرىنىڭ انىقتاۋىنشا، ۇرىلار اشىق تۇرعان ەسىكتى پايدالانىپ، مەشىتكە كىرىپ، ساداقاعا ارنالعان مەتالل جاشىگىن اشىپ، ىشىنەن اقشا ۇرلاپ كەتكەن. اتالعان جايت قر قىلمىستىق كودەكسىنىڭ 188-بابى (ۇرلىق) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلدى.
جەدەل-ىزدەستىرۋ ءىس-شارالارىنىڭ قورىتىندىسىندا، تۇركىستان قالالىق پب-نىڭ پوليتسيا قىزمەتكەرلەرى مەشىتتەگى ۇرلىققا قاتىسى بار كۇدىكتىنى قۇرىقتادى. ول شاردارا اۋدانىنىڭ تۇرعىنى بولىپ شىقتى جانە پوليتسيا باسقارماسىنا جەتكىزىلدى.
قازىرگى ۋاقىتتا اتالعان دەرەك بويىنشا سوتقا دەيىنگى تەرگەۋ امالدارى جۇرگىزىلىپ جاتىر. وسىعان ۇقساس تاعى ءبىر قىلمىستى كەنتاۋ قالالىق پوليتسيا ءبولىمىنىڭ قىزمەتكەرلەرى اشتى. كەزەكشى بولىمگە ىرگەلەس جاتقان اۋىلداردىڭ ءبىرىنىڭ تۇرعىنى شاعىم ءتۇسىرىپ، جەرگىلىكتى زيراتتان بەيتانىس ادام ساداقا جاشىگىنەن اقشا ۇرلاپ كەتكەندىگىن جەتكىزگەن.
وقيعا ورنىنا جەتكەن كەنتاۋ قالالىق پب-ءنىڭ جەدەل-تەرگەۋ توبى شۇعىل ارەكەت ەتتى. ۇرىلار بارلىعى 12 مىڭ تەڭگە كولەمىندە اقشانى الىپ كەتكەنىن انىقتالدى. اتالعان جايت قر قىلمىستىق كودەكسىنىڭ 188-بابى (ۇرلىق) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلىپ، پوليتسەيلەر كۇدىكتىنى ىزدەستىرۋگە كىرىستى.
جەدەل-ىزدەستىرۋ ءىس-شارالارىنىڭ قورىتىندىسىندا، كەنتاۋ قالالىق پب-ءنىڭ قىزمەتكەرلەرى كۇدىكتى رەتىندە اتالعان اۋىلدىڭ تۇرعىنىن ۇستادى. تەرگەۋ بارىسىندا، ەر ادام ماس كۇيىندە تۇنگى ۋاقىتتا زيرات اۋماعىنا كىرىپ، ساداقاعا ارنالعان جاشىكتى اشىپ، ىشىنەن اقشا الىپ، ودان كەيىن قىلمىس ورنىنان بوي تاسالاپ كەتكەنى انىقتالدى.
ايعاقتى زات رەتىندە كۇدىكتىدەن ۇرلانعان اقشالار الىندى. وسى دەرەك بويىنشا سوتقا دەيىنگى تەرگەۋ امالدارى جۇرگىزىلىپ جاتىر. ەر ادام قولحاتپەن بوساتىلدى. پوليتسيا قىزمەتكەرلەرى ەر ادامنىڭ باسقا دا وسىعان ۇقساس قىلمىستارعا قاتىستىلىعىن انىقتاپ جاتىر
