الەۋمەتتىك جەلىلەردە الماتىداعى "باراحولكا" بازارىنىڭ جالعا بەرۋشىلەرى مەن ساتۋشىلارىنا ماۋسىم ايىندا تاعى جۇمىستىڭ توقتايتىندىعى تۋرالى ەسكەرتىلىپتى دەگەن اقپارات تاراي باستادى. الايدا الماتى قالالىق كاسىپكەرلىك جانە ينۆەستيتسيالار باسقارماسى بۇل اقپاراتتى جوققا شىعاردى, دەپ حابارلايدى «ادىرنا» ۇلتتىق پورتالى zakon.kz,-كە سىلتەمە جاساپ.
«ءبىز بۇل اقپاراتتى راستامايمىز. بارلىق شەشىم باس سانيتارلىق دارىگەردىڭ قاۋلىسىمەن ماقۇلدانادى، بىراق جالپى، وزدەرىڭىزگە بەلگىلى، ءبىر اپتا بۇرىن، ياعني ماۋسىم ايىنىڭ 1-ىنەن باستاپ كوروناۆيرۋستىڭ الدىن الۋ جانە ونى انىقتاۋ، ەمدەۋ بويىنشا جاڭا ەرەجەلەر قابىلداندى، وندا كارانتيندىك رەجيم جۇمسارتىلعان كەيبىر وڭىردە قىزمەتىنە رۇقسات ەتىلگەن وبەكتىلەرگە قويىلاتىن تالاپتاردى قاتاڭداتۋ بەلگىلەندى»، - دەدى باسقارما باسشىسى ەركەبۇلان ورازالين ارنايى ونلاين-بريفينگتە.
ونىڭ ايتۋىنشا، اكىمدىك تۇتاستاي العاندا قاتاڭ كارانتين جاعدايىنا ورالۋدى كوزدەمەيدى.
"بىز بۇل جاعدايدا رۇقسات ەتىلگەن نىساندار مەن وندىرىستەردى قايتا جابۋ ورىنسىز دەپ ەسەپتەيمىز، بىزدە ونداي شەشىم دە جوق (جابۋ، قىزمەتتى توقتاتۋ تۋرالى - اۆت), بىراق جۇمىسىنا رۇقسات ەتىلگەن بارلىق كاسىپكەرلىك نىساندارعا سانيتارلىق قاۋىپسىزدىكتى ساقتاۋعا باعىتتالعان كارانتيندىك تالاپ كۇشەيتىلەدى. بۇل باعىتتا سجس قىزمەتى بەلسەندى جۇمىس جۇرگىزۋدە. ەگەر كارانتين تالاپتارى بۇزىلعانى انىقتالسا، ءيا، وندايدا كەيبىر نىساندار جابىلۋى مۇمكىن، سونداي-اق اۋرۋ جۇقتىرعان ادامدار انىقتالعان جاعدايدا", - دەپ ءسوزىن قورىتىندىلادى ەركەبۇلان ورازالين.
ونىڭ ايتۋىنشا، قازىر كارانتين شارالارىن جەڭىلدەتۋ جانە بىرقاتار نىسانداردى اشۋعا رۇقسات بەرۋ ارقاسىندا الماتىدا 800 مىڭ جۇمىس ورنى قالپىنا كەلتىرىلدى.
