الماتىدا سەنىپ تاپسىرىلعان مۇلىكتى تالان-تاراجعا سالعانى ءۇشىن "ترانستەلەكوم" اق-نىڭ بۇرىنعى باسشىسى اسقار ناسەنوۆ سوتتالدى، دەپ حابارلايدى Tengrinews.kz سىبايلاس جەمقورلىققا قارسى ءىس-قيمىل اگەنتتىگىنە سىلتەمە جاساپ.
سونداي-اق، اسقار ناسەنوۆ - 90-جىلدارى قىلمىس الەمىنىڭ سەركەسى اتانعان رىجي المازدىڭ ءىنىسى.
27 مامىردا ناسەنوۆتىڭ ىسىنە قاتىستى سوت ۇكىمى شىقتى. ول "قىزمەتىن پايدالانا وتىرىپ، اسا ءىرى كولەمدە سەنىپ تاپسىرىلعان مۇلىكتى يەمدەنىپ، تالان-تاراجعا سالدى" دەگەن ايىپپەن سوتتالدى.
"وسىعان دەيىن ناسەنوۆ "KT&T" جشس-مەن زاڭسىز كونسورتسيۋمدىق كەلىسىم جاساۋ ارقىلى مەملەكەت قارجىسىن جىمقىردى جانە 2,1 ميلليارد تەڭگە كولەمىندە تولەم جاسادى دەپ كۇدىككە ءىلىندى. الماتى قالاسى المالى اۋداندىق سوتىنىڭ ۇكىمىمەن اسقار ناسەنوۆ 4 جىلعا باس بوستاندىعىنان ايىرىلدى، ءۇش جىلعا قارجىلىق جاۋاپكەرشىلىكتى يەلەنۋ قۇقىعىنان ايىرىلدى", - دەلىنگەن حابارلامادا.
سونداي-اق، 2013 جىلى اسقار ناسەنوۆكە ىزدەۋ جاريالاعان بولاتىن.
