توقاەۆ: وداقتىڭ و باستاعى شەشىمىنە قايشى كەلەدى

1705

كەشە ەۋرازيالىق ەكونوميكالىق ينتەگراتسيانى ودان ءارى دامىتۋ ستراتەگياسىن تالقىلاعان جيىن ءوتتى. وداققا مۇشە مەملەكەت باسشىلارى ونى ونلاين وتكىزىپ، «2025 جىلعا دەيىنگى ەاەو-نىڭ ستراتەگيالىق دامۋ باعىتتارى تۋرالى» قۇجاتتى اقىلداستى.

مەملەكەت باسشىسى وداققا مۇشە ەلدەر اراسىنداعى ەكىجاقتى ىنتىماقتاستىقتىڭ كوپقىرلى ەكەنىن اتاپ ءوتىپ، ونىڭ ەكونوميكالىق، الەۋمەتتىك، گۋمانيتارلىق قاتىناستاردى قامتيتىنىن جەتكىزدى.

" سوندىقتان اتالعان ماسەلەلەردى بەسجاقتى فورماتتا ەۋرازيالىق ەكونوميكالىق كوميسسيانى قاتىستىرا وتىرىپ قاراستىرۋ، ونىڭ ناقتى ىسكە اسۋىن قيىنداتادى. دەنساۋلىق ساقتاۋ، ءبىلىم جانە عىلىم سالالارىن ەۋرازيالىق ەكونوميكالىق كوميسسيانىڭ قۇزىرەتىنە تولىق كولەمدە بەرۋ، ونىڭ ەكونوميكالىق باعىتىن ايتارلىقتاي وزگەرتىپ جىبەرۋى مۇمكىن. ياعني، 2015 جىلعى ەۋرازيالىق ەكونوميكالىق وداق قۇرۋ تۋرالى كەلىسىمنىڭ مانىنە قايشى كەلەدى،" – دەدى قاسىم-جومارت توقاەۆ.

سونداي-اق قۇجاتتا ەۋرازيالىق ەكونوميكالىق كوميسسيانىڭ قۇزىرەتىن كەڭەيتۋ تۋرالى جازىلعانىن، ولارعا قوسىمشا پارمەن بەرىلەتىنىن تىلگە تيەك ەتىپ، وعان كۇمانمەن قارايتىنىن، ءتىپتى كەلىسپەيتىنىن ايتتى.

"شىنىنا كەلگەندە، مۇنىڭ ءبارى ءىس جۇزىندە قالاي جۇزەگە اساتىنىن ەلەستەتۋ قيىن. ەكىجاقتى كەلىسسوزدەرگە كوميسسيا وكىلىنىڭ قاتىسۋى قالاي بولماق؟! قىزمەتتەردى ساۋدالاۋ سالاسىندا ينۆەستيتسيالار  ۇلتتىق قۇزىرەتتىلىككە جاتادى. سەبەبى ول باسقا ەلدەردىڭ مۇددەلەرىنە قايشى كەلمەيدى. تيىسىنشە، بۇل جۇمىسقا كوميسسيانىڭ ادامي جانە قارجىلىق رەسۋرستارىن تارتۋ، اشىعىن ايتقاندا، بىزگە تۇسىنىكسىز", - دەدى ول.

تاراپتار كۇزدە مينسك قالاسىندا باس قوسىتىن بولىپ كەلىستى. توقاەۆتىڭ ۇسىنىسىمەن ينتەگراتسيانى دامىتۋدىڭ جوسپارى سول جەردە بەتپە-بەت وتىرىپ تالقىلاناتىن بولدى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى