وبلىس ورتالىعىندا كاتاەۆ كوشەسىندەگى بەس قاباتتى ۇيدەن ءورت شىقتى، دەپ حابارلايدى pavlodarnews.kz.
تجد باسقارماسىنىڭ مالىمەتىنشە، ءۇشىنشى قاباتتاعى ءبىر بولمەلى پاتەردىڭ ىشىندە جانە بالكوندا ءۇي زاتتارى، جيھاز بەن تۇرمىستىق تەحنيكا ورتەنگەن.
- جالىن ءتورتىنشى جانە بەسىنشى قاباتتارداعى ءبىر بولمەلى پاتەرلەردىڭ بالكوندارىن دا شارپىدى. ءتىلسىز جاۋدى اۋىزدىقتاۋعا №3 ءورت ءبولىمىنىڭ قىزمەتكەرلەرى جۇمىلدىرىلدى. ءورت سوندىرۋشىلەردىڭ جەدەل ارەكەتتەرىنىڭ ارقاسىندا ءورت ون بەس مينۋت ىشىندە اۋىزدىقتالىپ، تولىقتاي ءسوندىرىلدى. گازدان قورعاۋ قىزمەتىنىڭ ماماندارى ءورت شىققان پودەزدەن وتىز ەكى ادامدى ەۆاكۋاتسيالادى. ونىڭ ىشىندە التاۋى – بالا، - دەيدى دەپارتامەنتتە.
پاۆلودار قالاسى توتەنشە جاعدايلار باسقارماسىنىڭ باستىعى رەنات ۆاليشانوۆتىڭ ايتۋىنشا، ءورت تۇرعىنداردىڭ وتتى ابايسىز پايدالانۋى سالدارىنان تۋىنداعان. - ءورتتىڭ جالپى اۋماعى 19 شارشى مەتردى قۇرادى، - دەيدى رەنات ۆاليشانوۆ. - قازىرگى كەزدە ءورت سالدارىنان كەلتىرگەن شىعىن كولەمى انىقتالىپ جاتىر.
