مالداردىڭ جاپپاي قىرىلۋ سەبەپتەرىن شىعىس قازاقستان وبلىسىنىڭ ماماندارى ايتتى، - دەپ حابارلايدى "ادىرنا" Tengrinews.kz-كە سىلتەمە بەرىپ.
بۇرىن حابارلانعانداي، بەلگىسىز اۋرۋدىڭ ءورشۋى شىعىس قازاقستان وبلىسى ءۇرجار اۋدانىنىڭ كوكتال اۋىلىندا تىركەلگەن بولاتىن، بەلگىسىز ىندەتتەن ءساۋىر ايىنىڭ سوڭىندا 200-دەن استام سيىر مەن بۇزاۋ قىرىلدى.
شىعىس قازاقستان وبلىسى ۆەتەرينارلىق مەديتسينا دەپارتامەنتىنىڭ مالىمەتىنشە، مال ولىمىنە بىرنەشە فاكتور سەبەپ بولعان. ءبىرىنشى سەبەپ پاستەرەللەز اۋرۋى دەگەن كۇدىك بولدى.
«پاستەرەللەز وتكىر زوونوزدى جۇقپالى اۋرۋ. قازىر جانۋارلاردىڭ اۋرۋىنا قاتىستى انىقتاۋ شارالارى جۇرگىزىلۋدە. كوكتال اۋىلىندا مال اۋرۋىنا بايلانىستى كارانتين جاريالاندى. ايتايىن دەگەنىم، پاستەرەللەز ادامدار ءۇشىن قاۋىپتى ەمەس، اۋرۋ جانۋارلار اراسىندا تارالۋدا. ۆاكتسيناتسيا جۇرگىزىپ جاتىرمىز. اۋرۋ مەڭدەگەن سيىرلار مەن بۇزاۋلار ىندەتتىڭ الدىن الۋ ءۇشىن جويىلدى »، - دەدى شقو ۆەتەريناريا باسقارماسى ۆەتەرينارلىق قاۋىپسىزدىك ءبولىمىنىڭ باس مامانى نۇراسىل كارىبجانوۆ.
ماماننىڭ ايتۋىنشا، تاعى ءبىر سەبەپ، جانۋارلاردىڭ كۇتىمى بولۋى مۇمكىن. وقيعا ورنىنا كەلگەن مەملەكەتتىك كوميسسيا وكىلدەرى سيىر مەن بۇزاۋلاردىڭ كۇتىم جاعدايىنا تاڭ قالعان.
«جانۋارلار وتە ارىق بولدى، ولاردىڭ السىرەگەنى سونشا ازىق جەي المايدى. بارلىق ارىق مالداردان پاستەرەللەز باكتەريالارى تابىلدى. مالداردىڭ ارىقتىعى اۋرۋدىڭ ورشۋىنە جانە مالدىڭ ولىمىنە اكەلۋى مۇمكىن» - دەدى نۇراسىل كارىبجانوۆ.
بەلگىلى بولعانداي، كوكتالدا نەگىزىنەن الاكولدەن بالىق اۋلايتىن بالىقشىلار تۇرادى. ولار بىرنەشە كۇن بويى كولگە كەتەدى. شاماسى، ءدال وسى كەزدە مال قاراۋسىز قالعان. بىراق، پوليگونعا كەلگەن مامانداردىڭ ايتۋىنشا، جەم-ءشوپ قورى كوپتەگەن مال يەلەرىنىڭ قورالارى مەن فەرمالارىندا بولعان.
وبلىستىق ۆەتەريناريا باسقارماسى سوڭعى رەت پاستەرەللەز شىعىس قازاقستان وبلىسىندا وتكەن جىلى تىركەلگەنىن ايتادى. ول كەزدە كوكپەكتى اۋدانىندا بۇل اۋرۋدان ەكى جىلقى ولگەنى حابارلانعان بولاتىن.
ەسكە سالا كەتەيىك، بۇعان دەيىن ولگەن مال ءۇشىن وتەماقى مولشەرى انىقتالعان ەدى. سونىمەن، ءىرى قارا مالدىڭ ءار باسىنا 260 مىڭ تەڭگە، ءبىر جاستاعى جانۋارعا 150 مىڭ تەڭگە (2019 جىلعى ءتول) جانە 50 مىڭ تەڭگە بيىل تۋعان جاس تولگە تولەنەدى.
