تۇركىستان وبلىسىنىڭ باسشىسى ۇكىمەت ساعاتىندا ماقتاارالعا قاتىستى بايانداما جاساپ، توتەنشە جاعداي بويىنشا اتقارىلىپ جاتقان جۇمىستارعا توقتالدى.
«الدىن الا جيناقتالعان مالىمەتتەر بويىنشا كولەمى 7639 گەكتار ەگىستىك جەردى سۋ باسقان. سونىمەن قاتار، مال شىعىنى ناقتىلانۋدا. قازىرگى تاڭدا، وسى جوعارىدا اتالعان شىعىنداردى ەسەپتەپ جاتىرمىز. ناقتى شىعىن كولەمى ناقتىلانىپ بولعان سوڭ، قوسىمشا باياندالاتىن بولادى»، دەدى ءوڭىر باسشىسى.
مالىمدەمەگە سايكەس، جالپى 31 606 تۇرعىن 14 ەلدى مەكەننەن ەۆاكۋاتسيالانعان ەدى. اتقارىلعان جۇمىستاردىڭ ناتيجەسىندە 2 ەلدىمەكەن (مىرزاكەنت، اقجول) تۇرعىندارى ءوز ءۇي-جايلارىنا قايتا ورالىپ، جايعاسۋدا. جالپى 6 127 تۇرعىنى بار 5 ەلدىمەكەندى سۋ باسقان (جەڭىس، جاڭاتۇرمىس، فەرداۋسي، ورگەباس جانە دوستىق), 7 ەلدىمەكەندە سۋ باسۋ قاۋپى ءالى دە جوعارى.
بۇل رەتتە، شۇعىل تۇردە 2 مامىر كۇنى ماقتاارال اۋدانىندا جەرگىلىكتى اۋقىمداعى تەحنوگەندىك سيپاتتاعى توتەنشە جاعداي جاريالانىپ، جەدەل شتاب قۇرىلدى.
اۆاريالىق-قۇتقارۋ جۇمىستارىن جۇرگىزۋ ءۇشىن 986 ادام، 10 دانا ءجۇزۋ قۇرىلعىسى، 180 دانا تەحنيكا جۇمىلدىرىلدى.
سونىمەن قاتار، قىزىلوردا، جامبىل وبلىستارى مەن شىمكەنت قالاسىنان 30 ونىمدىلىگى جوعارى سۋ جيناعىش سوراپتار كەلۋدە.
بۇدان بولەك، قازاقستان رەسپۋبليكاسى ۇلتتىق ۇلانىنىڭ اسكەري بولىمىنەن 413 اسكەري قىزمەتكەر مەن 37 دانا تەحنيكا تارتىلدى. قوسىمشا الماتى قالاسىنان قر ۇلتتىق ۇلانىنىڭ قۇتقارۋ باتالونىنان 320 اسكەري قىزمەتكەر مەن 26 دانا تەحنيكا كەلۋدە.
اتاكەنت كەنتى مەن ماقتارال، جامبىل اۋىلدىق وكرۋگتەرىندە اشىلعان 19 قابىلداۋ-ەۆاكۋاتسيالاۋ پۋنكتىنە 3200 ادام ورنالاستىرىلعان. اتاپ وتەيىك، مىرزاكەنت جانە اقجول ەلدىمەكەنىنىڭ تۇرعىندارى ۇيلەرىنە ورالۋىنا بايلانىستى ەۆاكۋاتسيالىق پۋنكتتەر سانى 24-تەن 19-عا قىسقاردى.
«قابىلداۋ ەۆاكۋاتسيالىق پۋنكتەرى قاجەتتى قۇرال-جابدىقتار مەن ازىق-تۇلىكپەن قامتاماسىز ەتىلگەن. 120 مەديتسينا قىزمەتكەرى مەديتسينالىق كومەك كورسەتۋدە. جەتىساي قالاسىندا دا 3 ەۆاكۋاتسيالىق-قابىلداۋ پۋنكتى ازىرلەنگەن. قاجەت بولسا ەۆاكۋاتسيالانعان تۇرعىنداردى قابىلداۋعا دايىنبىز»، دەدى ءو. شوكەەۆ.
كورشىلەس وبلىستار مەن كاسىپكەرلەر تاراپىنان ءتۇرلى كومەكتەر كورسەتىلىپ، قولداۋ بىلدىرىلۋدە.
توتەنشە جاعداي سالدارىنان بۇگىنگى تاڭعا، الدىن الا ەسەپتەۋلەر بويىنشا جالپى 845 تۇرعىن ءۇيدى، 3 مەكتەپتى، 5 بالا-باقشانى، 4 مەديتسينا نىساندارى مەن 1 مادەنيەت ءۇيىن، 10 دۇكەندى سۋ باستى، جەڭىس اۋىلىنداعى كوپىردى (ۇزىندىعى 10 مەتر، ەنى 6 مەتر) جانە رەسپۋبليكالىق، وبلىستىق، اۋداندىق ماڭىزى بار 54,7 شاقىرىم اۆتوجولداردى سۋ شايدى.
اۋداندا قوعامدىق ءتارتىپتى ساقتاۋ جانە سۋ باسقان تۇرعىن ۇيلەردى مۇلكىن قورعاۋ ءۇشىن (جاڭاتۇرمىس، فەرداۋسي، ت. جايلىباەۆ (2), نۇرلىجول، ءيىرجار جانە ورگەباس، شۇعىلا اۋىلدارىندا) 8 بلوك بەكەت ورناتىلىپ، پوليتسيا دەپارتامەنتىنىڭ جەكە قۇرامىنان جالپى 335 قىزمەتكەرى مەن 57 ارنايى اۆتوكولىگى جۇمىلدىرىلدى.
ەلدىمەكەندەردى سۋ باسۋىنىڭ الدىن الۋ ماقساتىندا:
حالىقتى قۇلاقتاندىرۋ ماقساتىندا ماقتارال اۋدانىنىڭ 15 ەلدىمەكەنىندە (جەڭىس، جاڭاتۇرمىس، فەردوۋسي، ورگەباس، دوستىق، ارايلى، نۇرلىتاڭ، شۇعىلا، نۇرلىجول، جانتاقساي، اقجول، مىرزاكەنت، وركەن، ىرىستى، قاراقىر اۋىلدارى) 38 دابىلدى ەسكەرتۋ قۇرىلعىسى ورناتىلدى.
نۇرلىجول، ورگەباس، ىرىستى، جانتاقساي ەلدى مەكەندەرىندە بوگەتتەر سالىنىپ، مىرزاكەنت كەنتى باعىتىندا فەرداۋسي ەلدىمەكەنىنىڭ اۋماعىندا 3 كوللەكتور ورناتىلدى.
بۇدان بولەك، ماقتاارال اۋدانى اۋماعىنان اعىن سۋدى تەز ارادا شىعارۋ ماقساتىندا وزبەكستان رەسپۋبليكاسى تاراپىنان جەتىساي اۋدانى، قوعالى ەلدىمەكەنىنىڭ ماڭىنان «ورتالىق بەتپاقدالا كوللەكتورى» ارقىلى اۆتوجول كوپىرىن اينالىپ وتەتىن كانال قازىلدى.
قازسۋشار ركم-ءنىڭ مالىمەتتەرىنە سايكەس، كەيبىر ەلدى مەكەندەردە سۋ دەڭگەيى ورتاشا 3-4 سم-گە تومەندەگەنى بايقالادى.
تۇركىستان وبلىسى اكىمىنىڭ ءباسپاسوز قىزمەتى
