2 مامىر 2020 جىلى قازاق فيلولوگياسى جانە الەم تىلدەرى فاكۋلتەتى شەتەل تىلىدەرىن وقىتۋ ادىستەمەسى كافەدراسىنىڭ ۇيىمداستىرۋىمەن «قازاقستان – حالىقتار دوستىعىنىڭ مەكەنى، حالىقتار دوستاستىعى – رۋحاني جاڭعىرۋىمىزدىڭ تەتىگى» اتتى ءىس-شارا Zoom پلاتورماسىندا ۇيىمداستىرىلدى.
باسقوسۋدىڭ ماقساتى – قازاقستان رەسپۋبليكاسىنداعى حالىقتاردىڭ ىنتىماقتاستىقپەن، بىرلىكپەن، تەڭ قۇقىقپەن ءومىر ءسۇرىپ جاتقاندىعىن جانە ونى ۇلگى ەتىپ، حالىقتار دوستىعىن نىعايتۋ بولىپ تابىلادى.
بۇل شاراعا قىزدار ۋنيۆەرسيتەتىنىڭ قازاق فيلولوگياسى جانە الەم تىلدەرى فاكۋلتەتىنىڭ دەكانى، پروفەسسور قيىنوۆا ج.ك.، ۋنيۆەرسيتەتتىڭ «رۋحاني جاڭعىرۋ» جوبالىق كەڭەسىنىڭ جاۋاپتى ۇيلەستىرۋشىسى بايتاشەۆا گ.ءو.، شەتەل تىلدەرىن وقىتۋ ادىستەمەسى كافەدراسىنىڭ مەڭگەرۋشىسى جالالوۆا ا.م.، الماتى قالاسىنىڭ جوو وقىتۋشىلارى مەن ستۋدەنتتەرى قاتىستى.
بۇل شارانى قازاق فيلولوگياسى جانە الەم تىلدەرى فاكۋلتەتى شەتەل تىلدەرىن وقىتۋ ادىستەمەسى كافەدراسىنىڭ مەڭگەرۋشىسى جالالوۆا ا.م. اشىپ بەردى. ودان ءارى قازاق فيلولوگياسى جانە الەم تىلدەرى فاكۋلتەتىنىڭ دەكانى، پروفەسسور قيىنوۆا ج.ك. قۇتتىقتاۋ ءسوز سويلەدى.
ءىس-شارا بارىسىندا ەلىمىزدە تۇراتىن باسقا ۇلت وكىلدەرىنىڭ قازاقستانعا ريزاشىلىقتارىن بىلدىرگەن ۆيدەولارى كورسەتىلدى. وسى ورايدا، قازاقستاندا تۇراتىن يراندىق ازامات شاحرام فاكيق ناسەري ءوزىنىڭ ۆيدەوسىندا ەلىمىزدە كوپ جىلدان بەرى اشىق اسپان استىندا تاتۋ-ءتاتتى تۇرىپ جاتقاندىعىن، قازاق حالقىنىڭ مەيماندوستىعىن، مادەنيەتتىلىگىن، ونەرلى حالىق ەكەنىن ماقتان تۇتىپ، قازاقستان حالقىنىڭ بىرلىگى كۇنىمەن قۇتتىقتادى.
سونداي-اق وسى شاراعا قاتىسقان قازاق ۇلتتىق قىزدار پەداگوگيكالىق ۋنيۆەرسيتەتى، ءال فارابي اتىنداعى قازاق ۇلتتىق ۋنيۆەرسيتەتى جانە قانىش ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىندە وقيتىن ءار ءتۇرلى ۇلت ستۋدەنتتەرى قازاقستاندا ءبىلىم الىپ جاتقاندىعىن قۋانا ايتىپ، ەل حالىقتارىنىڭ بىرلىگى مەن ىنتىماقتاستىعىنىڭ جاراسقانىن، ءبىر شاڭىراقتىڭ استىندا تاتۋ-ءتاتتى ءومىر ءسۇرىپ، حالىقتار دوستىعىنىڭ مىزعىماستىعىن قازاق تىلىندە ماقتانىشپەن بايانداپ بەردى.
ر.ك. سادىقوۆا
