جانپەيىسوۆتىڭ ادۆوكاتى زاكير اسادوۆ بەلسەندى تاعىلعان ايىپتى مويىنداماعىن ايتادى. ونىڭ سوزىنشە، سوتتا "بەلسەندىنىڭ قۇقىقتارى شەكتەلگەن". ادۆوكاتتى "ىسپەن تانىستىرماعان، ءىستى قاراۋ كەزىندە ءسوز بەرىلمەگەن. ايىپتالۋشى تاراپتىڭ تالاپ-تىلەكتەرى ەسكەرىلمەگەن".
سوتقا جانپەيىسوۆ شىمكەنتتەگى تۇرمەدەن قاتىسقان. ەندى ول بۇرىنعى 35 تاۋلىككە 5 تاۋلىك قوسىپ، 40 تاۋلىك جازاسىن وتەۋگە ءتيىستى.
14 ءساۋىر كۇنى شىمكەنت قالالىق مامانداندىرىلعان اۋدانارالىق اكىمشىلىك سوتى بەلسەندى رۋسلان جانپەيىسوۆتى "شىمكەنت قالاسى باس سانيتارىنىڭ كارانتين تۋرالى قاۋلىسىن بۇزعانى ءۇشىن" ايىپتى دەپ تاۋىپ، 35 تاۋلىككە قاماعان ەدى.
جانپەيىسوۆ اكىمشىلىك كودەكستىڭ "توتەنشە جاعداي رەجيمىن بۇزۋ" بابىمەن - 10 تاۋلىككە، "توتەنشە جاعداي كەزىندە قۇقىقتىق ءتارتىپتى بۇزۋعا يتەرمەلەيتىن ارەكەتتەر" بابىمەن 25 تاۋلىككە قامالعان.
قالالىق سوت "شىمكەنتتىڭ باس سانيتارى كارانتين كەزىندە اسا ءزارۋ بولماسا قالادا كولىكپەن نە جاياۋ جۇرۋگە تىيىم سالعانىنا قاراماستان جانپەيىسوۆ 12 ءساۋىر كۇنى ساعات 20:40-تا تۇرعىلىقتى جەرى مەن جۇمىس ورنىنان بولەك كوشەدە جەكە كولىگىمەن ءجۇرىپ، توتەنشە جاعداي كەزىندەگى ەرەجەنى بۇزعان. ول تىكەلەي ەفير ارقىلى كارانتين كەزىندە ەنگىزىلگەن تارتىپكە قارسىلىعىن ءبىلدىرىپ، جاعىمسىز پىكىرىن ايتىپ ارانداتقان، پوليتسيا جۇمىسىنا كەدەرگى كەلتىرگەن" دەپ حابارلاعان.
بۇدان بۇرىن جانپەيىسوۆ Facebook پاراقشاسىندا بىرنەشە جازبا مەن تىكەلەي ەفيردە تۇسىرگەن ۆيدەو جاريالاعان. وندا بەلسەندى كارانتين تالابىن بۇزباعانىن، جۇرۋگە رۇقسات قاعازى بولسا دا پوليتسيا سەبەپسىز ءبىر ساعات بلوكپوستتا ۇستاعانىن ايتقان.
بەلسەندىنىڭ تۋىستارىنىڭ سوزىنشە، تۇرمەدە جاتقان جانپەيىسوۆپەن كەزدەسۋگە، تاماق جانە كيىم-كەشەك جەتكىزۋگە تەك اناسىنا رۇقسات بەرىلگەن.
13 قاڭتاردا شىمكەنتتەگى ءال-فارابي اۋداندىق سوتى پوليتسەيلەردىڭ ارەكەتىن ۆيدەوعا ءتۇسىرىپ تانىلعان بەلسەندى جانپەيىسوۆتىڭ ۇستىنەن قوزعالعان قىلمىستىق ءىستى قاراي باستاعان. وندا جابىرلەنۋشى رەتىندە شىمكەنت قالاسىنىڭ تۇرعىنى ءپىرىم مۇساەۆ پەن قالالىق پوليتسيا دەپارتامەنتىنىڭ ينسپەكتورى مارات قۋاندىقوۆ تانىلعان. بەلسەندىنىڭ سوزىنشە، مۇساەۆقا "كولىك جۇرگىزىپ كەلە جاتقاندا قاۋىپسىزدىك بەلدىگىن تاعۋدى ۇمىتقانىن ايتقانى" ءۇشىن ايىپتالعان. ال جول ءجۇرۋ ەرەجەسىن بۇزعان جۇرگىزۋشىنى ۆيدەوعا تۇسىرمەك بولعاندا قۋاندىقوۆ كەدەرگى ەتكەن. سوت پروتسەسى ءالى اياقتالماعان.
2017 جىلدىڭ قىركۇيەگىندە شىمكەنتتەگى اباي اۋداندىق سوتى رۋسلان جانپەيىسوۆتىڭ باس بوستاندىعىن ەكى جارىم جىلعا شەكتەگەن. سوت ونى قىلمىستىق كودەكستىڭ "اقپاراتتى جاسىرىپ الۋدىڭ ارنايى تەحنيكالىق قۇرالدارىن زاڭسىز دايىنداۋ، جاساۋ، يەمدەنۋ، وتكىزۋ نەمەسە پايدالانۋ" جانە "قوعامدىق بىرلەستىكتەر مۇشەلەرىنىڭ مەملەكەتتىك ورگانداردىڭ قىزمەتىنە زاڭسىز ارالاسۋ" بابىمەن ايىپتى دەپ تانىعان.
"ازاتتىق" راديوسى
فوتو اۆتورى ديلارا يسا
