ەڭبەك جانە حالىقتى الەۋمەتتىك قورعاۋ ۆيتسە-ءمينيسترى 42 500 تەڭگەنىڭ نەگە كەشىكتىرىلىپ جاتقانىن ءتۇسىندىردى.
بۇل تۋرالى ناريمان مۇقىشەۆ Instagram پاراقشاسىندا حابارلادى، - دەپ جازادى قازاقپارات.
«قازىر ء"وتىنىم" كەزەڭدەرىنىڭ بىرىندە تۇرىپ قالۋ ماسەلەسى تولىقتاي شەشىلدى. وتىنىمگە قاتىستى ساۋالدار وتە از. بارلىق ءوتىنىش تەكسەرىلۋدە.
قازىر تولەم تاعايىندالعانىنا ءبىر اپتادان استام ۋاقىت وتكەنىمەن، قاراجات كومەك الۋشىنىڭ ەسەپشوتىنا تۇسپەۋى ءجيى كەزدەسۋدە. بۇعان دەيىن ايتقانىمداي، اقشا ءىس جۇزىندە ءبىر كۇننىڭ ىشىندە جىبەرىلەدى. ەسەپشوتتى قاتە كورسەتسە تۇسپەيدى. كوپشىلىك "مەن ءبارىن دۇرىس كورسەتتىم" دەيدى.
الايدا 930 مىڭ ءوتىنىمنىڭ ەسەپشوتى قاتە ەكەنى انىقتالعان.
كەشىگۋ سەبەپەرى
1) ءبىز اقشانى ءسىزدىڭ بانكتەگى ەسەپشوتىڭىزعا 1 كۇن ىشىندە اۋدارامىز.
2) بانك تەكسەرىپ، ەسەپشوت قاتە بولسا اقشانى 1 كۇن ىشىندە كەرى قايتارادى .
3) ءبىز ءوزىمىزدىڭ بازامىزدان اقشانى اۋدارۋ ءۇشىن ءوتىنىم بەرۋشىنىڭ باسقا قولدانىستاعى ەسەپشوتىن ىزدەيمىز.
ماسەلەن، ءسىز باسقا تولەم الۋىڭىز مۇمكىن. مۇنى ءسىزدى بارىنشا مازالاماۋ ءۇشىن جاسايمىز. بۇعان دا ءبىر كۇن كەتەدى. سونىڭ ناتيجەسىنە 900 مىڭ ەسەپشوت تاپتىق.
4) ەگەر تاپساق، اقشانى قايتا جىبەرەمىز (1 كۇن). كەيدە ادامداردىڭ باسقا ەسەپشوتقا ءتۇستى دەۋىنىڭ سەبەبى وسىندا. اقشا جوق دەپ ايتپاستان بۇرىن بارلىق ەسەپشوتتارىڭىزدى تەكسەرىپ الۋدى وتىنەمىن.
5) ەگەر تاپپاساق، سمس جىبەرەمىز (كەشە مۇنداي 28 مىڭ سمس جىبەردىك). وعان جاۋاپ رەتىندە ەسەپشوت ءنومىرىن جىبەرۋ قاجەت (1 كۇن).
مۇنان ارى ءسىزدىڭ ەسەپشوتتى قاشان بەرگەنىڭىزگە بايلانىستى. وزدەرىڭىز كورىپ وتىرعانداي، پروتسەسس ءبىر كۇننەن كوپ ۋاقىتتى الادى. بىراق، بۇل تولەم اۋدارۋدا پروبلەما ورىن العان جايتتاردا عانا»، - دەدى ول.
وسى رەتتە ۆيتسە-مينيستر كەز كەلگەن قىزمەتتەگىدەي ءبىر نارسە انىقتاۋ قاجەت بولسا، وندا ول قوسىمشا ۋاقىتتى الاتىندىعىن باسا ايتادى. «بۇگىنگى كۇنى تولەم جاساۋعا 4 197 336 ءوتىنىم قويىلدى. ونىڭ ىشىندە 4 126 155 ازاماتقا تولەم جىبەرىلدى. قالعان 71 181 ءوتىنىش بويىنشا ازاماتتاردىڭ ەسەپشوتىنا قاراجاتتى دەر ۋاقىتىندا اۋدارۋ ماقساتىندا جۇمىس جۇرگىزىلىپ جاتىر. بۇعان دەيىن تولەنگەن تولەمدەر بويىنشا بانكتەرمەن قوسىمشا تەكسەرۋ جۇرگىزىلۋدە. ءبىز بۇل جاعدايدى كۇندەلىكتى مونيتورينگىلەپ وتىرمىز جانە قاجەت بولعاندا بانكتەرمەن جانە پروتسەسسكە جۇمىلدىرىلعان وزگە دە ۇيىمدارمەن بىردەن جۇمىس ىستەيمىز»، - دەدى ناريمان مۇقىشەۆ.
