كۇن سايىن 42500.enbek. سايتىنا الەۋمەتتىك تولەمدەرگە ءوتىنىم بەرۋدەن باسقا، ازاماتتاردىڭ الەۋمەتتىك تولەمدى الۋعا قاتىستى سۇراقتارى مىڭداعان وتىنىشتەر كەلىپ تۇسەدى.
2020 جىلعى 24 ءساۋىر كۇنگى جاعداي بويىنشا https://42500.enbek.kz سايتىنا شامامەن 232 مىڭ ءوتىنىش تۇسكەن. ونىڭ ىشىندە 23 ساۋىردە قازاقستاندىقتار 25 مىڭنان استام ءوتىنىش جولداعان. بۇگىندە 20 مىڭنان استام ءوتىنىش بەرۋشىگە جاۋاپ بەرىلدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ «ەڭبەك رەسۋرستارىن دامىتۋ ورتالىعى» اق قىزمەتكەرلەرى 42500.enbek.kz سايتىنا كەلىپ تۇسكەن ءاربىر ءوتىنىشتى ءجىتى قاراپ، ازاماتتارعا ءوتىنىم بەرۋ كەزىندە جىبەرىلگەن قاتەلىكتەردى تۇزەتۋگە كومەكتەسەدى.
ورتالىق ماماندارى «مەملەكەتتىك الەۋمەتتىك ساقتاندىرۋ قورى» اق ازاماتتارعا ەكى نە ودان دا كوپ تابىس كوزدەرىنىڭ بولۋىنا بايلانىستى 42 500 تەڭگە تولەۋدەن باس تارتقان جاعدايدا قايدا جانە قانداي قۇجاتتار جيناۋ كەرەگى تۋرالى ايتىپ بەردى.
- ازامات ءوتىنىمدى جىبەرگەن كەزدە، جۇيە ونى ارنايى بازا بويىنشا تەكسەرەدى دە، ونىڭ ەكى نە ودان دا كوپ ۇيىمداردان تۇسكەن تابىسى بار ەكەنىن بىردەن كورەدى. بەلگىلەنگەن ەرەجە بويىنشا مۇنداي ازاماتتارعا جۇيە اۆتوماتتى تۇردە الەۋمەتتىك تولەم تولەۋدەن باس تارتادى. ەگەر ازامات قوس جۇمىس ورنىنان دا تولەنبەيتىن ەڭبەك دەمالىسىنا شىعىپ، تابىسىنان ايرىلعان بولسا، ول مەملەكەتتىك كومەك الا الادى. وسىنداي جاعدايعا تاپ بولعان ادامعا ەكى جۇمىس ورنىنان دا انىقتاما الىپ، ولاردى تىركەپ، مەملەكەتتىك الەۋمەتتىك ساقتاندىرۋ قورىنا ءوتىنىش جازۋ كەرەگىن ايتامىز، - دەيدى ورتالىق مامانى جانبولات دانياروۆ.
ەستەرىڭىزگە سالساق، قر ۇكىمەتى 42 500 تەڭگە الەۋمەتتىك تولەمدى الۋعا قاتىستى ازاماتتاردىڭ وتىنىشتەرىن (ارىزدارىن) قاراستىراتىن 3 مەكەمەنى انىقتاعان بولاتىن. ولار:
1) «ازاماتتارعا ارنالعان ۇكىمەت» اق-نىڭ 1414 call-ورتالىعى, وندا زاڭنامالىق كەڭەس ۇسىنىلادى، ءوتىنىش بەرگەن ادامنىڭ مارتەبەسى جانە الەۋمەتتىك تولەمدەر الۋ قۇقىعى، سونداي-اق تولەمدى جۇزەگە اسىرۋ تۋرالى اقپارات ايقىندالادى;
2) 1411 call-ورتالىق، 42500@gfss.kz ەل.پوشتا «ازاماتتارعا ارنالعان ۇكىمەت» اق كورپوراتسياسىنىڭ ماسق-مەن تىكەلەي جۇمىس ىستەيتىن ازاماتتارعا تولەم تاعايىنداۋ، تولەمنىڭ كەشىكتىرىلۋ سەبەپتەرى جانە باس تارتۋ تۋرالى اقپارات بەرىلەدى;
3) قر ەڭبەك جانە حالىقتى الەۋمەتتىك قورعاۋ مينيسترلىگىڭ 42500.enbek.kz سايتى، 42500@enbek.kz ەل.پوشتاسى, بۇل سايت جانە پوشتادا ازاماتتارعا الەۋمەتتىك تولەم تاعايىنداۋ بويىنشا بارلىق ماسەلەلەرى قاراستىرىلادى.
"ادىرنا" ۇلتتىق پورتالى
