"قازاقستاندا پولشاعا ارنالعان گۋمانيتارلىق جۇك ۇرلاندى": الماتى اۋەجايىنىڭ مالىمدەمەسى

الماتىنىڭ حالىقارالىق اۋەجايى "پولشاعا ارنالعان گۋمانيتارلىق جۇك ۇرلاندى" دەگەن بولجامدى جوققا شىعاردى. قىتايدان كەلگەن ۇشاق الماتى قالاسىندا ەكى رەت جانار-جاعارماي قۇيۋ ءۇشىن ايالداعان، دەپ حابارلايدى Sputnik قازاقستان .

ۋكراينانىڭ "مريا" اتتى الىپ ۇشاعى ۆارشاماعا مەديتسينالىق جۇك جەتكىزگەن. 12 ساۋىردە قىتايعا ۇشىپ بارا جاتقاندا الماتى اۋەجايىندا قونىپ، جانار-جاعارماي قۇيعان. ال 14 ساۋىردە قايتار جولدا ەكىنشى رەت ايالداعان. سول كەزدە بورتتان ۇشاقتى جەتەكتەگىش قۇرالىن شىعارىپ، تۇراققا قويعان بولاتىن.

گۋمانيتارلىق كومەك پولشاعا جەتكەننەن كەيىن بلوگەرلەر جۇكتىڭ سالماعىن سالىستىرىپ كوردى. باس كەزىندە مينيسترلىك قىتايدان 400 توننا مەديتسينالىق جۇك كەلەدى دەگەن. الايدا ۇشاق كەلگەننەن كەيىن گۋمانيتارلىق كومەكتىڭ سالماعى 96 توننا بولىپ شىقتى. وسىدان كەيىن جەلى قولدانۋشىلارى قالعان 150 توننا جۇكتىڭ قايدا كەتكەنىن سۇراي باستادى. ۇشاقتىڭ الماتىدا ەكى رەت ايالداعانىن دا ەسكە الدى.

الماتىنىڭ اۋەجايى ترانزيتتىك تۇراق كەزىندە جۇكتى ءتۇسىرۋ مۇمكىن ەمەس ەكەنىن مالىمدەدى.

"مۇنى تەوريالىق تۇرعىدا جاساۋ مۇمكىن ەمەس. سەبەبى ۇشاقتىڭ تۇمسىق جاعىن اشقاندا بورتتىڭ جانىندا اۋەجايدىڭ تەحنيكالىق قىزمەتتەرىنەن بولەك كەدەنشىلەر، شەكاراشىلار مەن ەكيپاج وكىلدەرى دە تۇرادى. ال ەكيپاج كومانديرىنە جۇك ءۇشىن جەكە جاۋاپكەرشىلىك جۇكتەلگەن", - دەيدى اۋەجاي ماماندارى.

رەسمي مالىمەتكە سايكەس، بارلىق تۇراقتار تاۋلىك بويى بەينەباقىلاۋعا تۇسىرىلەدى. جازبا ءبىر اي ساقتالادى.

اۋەجاي قىزمەتكەرلەرى گۋمانيتارلىق جۇكتىڭ سالماعىن دا ءتۇسىندىردى.

"پولشاعا مەديتسينالىق قۇرالداردىڭ، سونىڭ ىشىندە ماسكالار، كومبينەزوندار جانە تاعى باسقا زاتتاردىڭ جەتكىزىلگەنىن ەسكەرۋ كەرەك. ونداي جۇك كوپ ورىن الادى، ال سالماعى از. وعان قوسا، 400 توننا جۇك جەتكىزىلۋى ءتيىس دەگەن، ال ۇشاقتىڭ جۇك كوتەرۋ كورسەتكىشى 250 توننا عانا", - دەپ اتاپ كورسەتتى ماماندار.

سىرتقى ىستەر مينيسترلىگى ديپلوماتيالىق ارنالار ارقىلى پولشا تاراپىنان نارازىلىقتىڭ بولماعانىن حابارلادى.