بارشاڭىزعا ءمالىم، مينيستر اسحات ايماعامبەتوۆ ەلىمىز قاشىقتان وقىتۋ بويىنشا بىرنەشە جولدى قولداناتىنى تۋرالى جازعان بولاتىن. ولار 4 باعىت بويىنشا (تەلەارنالار: "بالاپان" جانە "ەلارنا"; راديو: "قازاق راديوسى" جانە "كلاسسيك"; ينتەرنەت پلاتفورمالار: "Kundelik.kz", "Daryn.Online", "Bilimland" جانە "Opiq.kz"; سونىمەن قاتار جەتكىزۋ قۇرالى رەتىندە قازپوشتا) جۇرگىزىلەدى.
قاشىقتان وقىتۋ تۋرالى شەشىم قابىلدانعاننان باستاپ، مينيسترلىكتەگى جانە جالپى ءبىلىم سالاسىنداعى ارىپتەستەرىمىز ءبىر ايدىڭ ىشىندە شىنىن ايتايىن، ۇزدىكسىز جۇمىس ىستەدى. ەگەر كۇندەلىكتى مونيتورينگكە جانە مۇعالىم ارىپتەستەرىمىزدىڭ پىكىرىنە ءمان بەرسەك، ءبىرىنشى اپتانىڭ ناتيجەسى كوڭىل كونشىتەدى. ەندىگى اپتادا جۇمىس ناتيجەسى ودان ءارى جاقسارا تۇسەدى دەگەن سەنىمدەمىز.
ناقتى ساندارعا كەلەتىن بولساق، 2 ملن 400 مىڭ وقۋشى ينتەرنەت جۇيەسى ارقىلى، 800 مىڭ وقۋشى بەينەساباقتى تەلەارنادان كورىپ ءبىلىم الۋدا. دۇيسەنبى كۇننىڭ وزىندە «Kundelik.kz» قىزمەتىن پايدالانۋ ءۇشىن 40 ملن سەسسيا تىركەلسە، ءبىر جۇمادا بۇل كورسەتكىش 203 ملن سەسسياعا دەيىن ءوستى. ال، "Daryn.Online" پلاتفورماسىندا 18 ملن قارالىم تىركەلىپ، 1,5 ملن ادام ءبىلىمىن وسى پلاتفورما ارقىلى جەتىلدىرگەن. «Bilimland» جۇيەسى 5 كۇندە 15 ملن 100 مىڭ قارالىم جينادى.
ارينە، كىشىگىرىم كەمشىلىكتەر ورىن الدى. مىسالى، العاشقى كۇنى كۇندەلىك جۇيەسىنە كىرە الماي جاتقان حابارلامالار كەلدى، تۇسكە قاراي ول ماسەلەنى جۇيەنىڭ IT ماماندارى بىردەن رەتكە كەلتىردى.
كەلەسى ماسەلە، كەيبىر ديرەكتورلار ارتىق ەسەپتەردى سۇراتىپ جاتقانى تۋرالى اقپاراتتار كەلىپ ءتۇستى. مينيستر مۇعالىمدەردەن ەشقانداي ەسەپ تالاپ ەتىلمەيتىندىگى تۋرالى ايتقان بولاتىن. وسىنداي ارەكەتتەرى ءۇشىن ناقتى ءتيىستى شارالار قابىلداندى. تاعى ءبىر مارتە ەسكەرتۋلەر بەرىلدى.
سونىمەن قاتار، قاشىقتان وقىتۋ باستالعالى رەسمي بريفينگتەردەن بولەك، جۇيەلى تۇردە web-كونفەرەنتسيالاردى ىسكە قوستىق. نەگىزگى ماقساتىمىز، اشىق پىكىرلەردى ءبىلۋ، تىكەلەي ەفير كەزىندە جازىلعان سۇراقتارعا ناقتى جاۋاپ بەرۋ. تىكەلەي ەفيردى مينيسترلىكتىڭ رەسمي پاراقشالارىندا جانە ءمينيستردىڭ ينستاگرام پاراقشاسىنا دا شىعارىپ وتىردىق. العاشقىسىنا قاشىقتان وقىتۋعا بايلانىستى كەڭىنەن ءتۇسىندىرۋ جۇمىستارىن ءمينيستردىڭ ءوزى باستاپ بەرسە، كەيىننەن كۇندەلىكتى اقپاراتتارمەن قامتاماسىز ەتۋ ماقساتىندا ۆيتسە-مينيستر شولپان كارينوۆا، سونىمەن قاتار، ينتەرنەت پلاتفورمالار جەتەكشىلەرى جانە ۇستازدارىمىز دا قاتىستى.
Call-ورتالىعى – 1450. ءدال وسى نومەر ىسكە قوسىلا سالىسىمەن مينيستر نەگىزگى ماسەلەلەردى ءبىلۋ ءۇشىن تەلەفون قوڭىراۋلارىن ءوزى قابىلدادى. الداعى ۋاقىتتا دا ءدال وسىلاي بايلانىستى قابىلدايمىز. جۋرناليست ارىپتەستەرىمىزگە ايتا كەتسەم، بۇل باستامامىز بۇقارالىق اقپارات قۇرالدارى ماتەريال ءۇشىن ەمەس، نەگىزگى سۇراقتاردى ءمينيستردىڭ ءوزى تىڭداۋى ءۇشىن جاسالعان ارەكەت.
17 ءوڭىر. وبلىستارداعى ءبىلىم باسقارماسى باسشىلارى دا تىكەلەي ەفيرگە، بريفينگتەرگە شىعىپ حالىققا ءتۇسىندىرىپ وتىردى. ياعني تەك ورتالىقتا عانا ەمەس، ءتۇسىندىرۋ جۇمىستارىن ءار وڭىردەگى ءباسپاسوز حاتشىلارىمىز دا تىڭعىلىقتى تۇردە جۇزەگە اسىردى.
سونىمەن قاتار، وسى اپتادا مينيسترلىكتىڭ قابىلداعان شەشىمنىڭ ءبىرى، قاشىقتان وقىتۋ جاعدايىندا بىتىرۋشىلەردى قورىتىندى اتتەستاتتاۋ پاندەر بويىنشا جىلدىق باعالارى نەگىزىندە جۇرگىزىلەدى. سايكەسىنشە، اتتەستات پاندەر بويىنشا جىلدىق باعالار نەگىزىندە بەرىلەدى.
كارانتين باستالعالى بەرى، مينيسترلىكتىڭ ءباسپاسوز قىزمەتى جۇمىسى دا ەكى ەسەگە ارتتى. باستاپقى كەزدە مينيسترلىكتىڭ ءباسپاسوز قىزمەتىنە قاشىقتان وقىتۋ بويىنشا جۋرناليستەردەن سۇراقتار وتە كوپ ءتۇستى. العاشقى كۇندەرى مينيسترلىكتىڭ رەسمي facebook جانە insta پاراقشالارىنا جالپى 400-گە جۋىق سۇراق كەلدى. بىراق اپتانىڭ سارسەنبىسىنە قاراي سۇراقتار مۇلدەم ازايدى دەۋگە بولادى. سەبەبى، تاعى دا قايتالاپ ايتايىن، بارلىق مۇمكىندىكتەردى پايدالانا وتىرىپ ءتۇسىندىرۋ جۇمىستارى جۇرگىزىلگەننىڭ ارقاسى دەپ ەسەپتەيمىن.
وسى ورايدا جۋرناليست ارىپتەستەرىمە دە ءوز راحمەتىمىزدى جەتكىزگىم كەلەدى. ءدال وسى جاعدايدا كەز كەلگەن ماسەلەگە قاتىستى تۇسىنىستىكپەن قاراپ، ارقاشان سىني تۇرعىدا جازاتىن ارىپتەستەرىمىز، كەرىسىنشە، حالىققا دۇرىس اقپاراتتى جەتكىزۋ ماقساتىندا تۇسىندىرمە ماتەريالدارىن دايىنداعانىن كوردىم. بۇل وتە جاقسى ارەكەت دەپ ەسەپتەيمىن. الداعى اپتالار دا ءساتتى وتەدى دەگەن سەنىمدەمىن.
P.S. ايتپاقشى، بەينەساباقتار كورسەتىلىپ جاتقان ارنالاردا سۋردواۋدارماشىلار دا ءوز جۇمىسىن باستادى.
ساتتىلىك بىزبەن بىرگە!
ەربولات مۇحامەدجان،
ءبىلىم جانە عىلىم ءمينيسترىنىڭ كەڭەسشىسى
