دوستار، سوڭعى جىلدارى ىرگەمىزدەگى قىتايدا (ال مەن ونى «اجداھالار ەلىندە» دەپ اتاعان دۇرىس دەر ەدىم) ءومىر سۇرەتىن «از ۇلتتاردى»، سونىڭ ىشىندە، اسىرەسە، تۇرىك-مۇسىلمان حالىقتارى – ۇيعىر، قازاق، قىرعىز جانە باسقالاردى ءتىل، ءدىن، ادەت-عۇرىپ، سالت-سانا، ءداستۇر جانە باسقا ۇلتتىق قۇندىلىقتارىنان ايىرىپ، اسسيميلياتسيالاپ-قىتايلاندىرۋ ارقىلى جۇتىپ قويۋ ماقساتىمەن قىتاي كومپارتياسى جوسپارلى تۇردە مىقتاپ قولعا الىپ، وراسان زور قارقىنمەن جانە كەڭ اۋقىمدا جۇزەگە اسىرىپ جاتقان جەكسۇرىن گەنوتسيدتىك ءھام ەتنوتسيدتىك ساياسات جونىندە سىزدەر، البەتتە، ءتۇرلى اقپارات كوزدەرىنەن، سونداي-اق، و جاقتان قازاقستانعا باس ساۋعالاپ قاشىپ كەلگەن قانداستارىمىزدىڭ (سايراگۇل، قاستەر مەن مۇراگەر جانە ت.ب.) اۋىزىنان ەستىپ، وقىپ، ءبىلىپ وتىرسىزدار.
الايدا، كۇنى بۇگىنگە دەيىن ول ماعلۇماتتار ءار جەردە شاشىراپ، بىتىراپ جۇرگەندىكتەن، كورشى ەلدە قازاققا قارسى جۇرگىزىلىپ جاتقان زۇلماتتىڭ ادام شوشىرلىق ايقىن كورىنىسىنە تۇتاس كارتينا رەتىندە كوزىمىزدى جەتكىزىپ، ونىڭ تەرەڭ ءمان-ماعىناسىن جان-جاقتى ۇعىنۋ جەتىسىڭكىرەمەيتىن ەدى. ەندى، مىنە، جۋىردا العاش رەت وسى ولقىلىقتىڭ ورنىن تولتىرعان وتە كۇردەلى ەڭبەك – «دەموس» قوعامدىق بىرلەستىگىنىڭ توراعاسى، حالىقارالىق جۋرناليستەر فەدەراتسياسىنىڭ مۇشەسى تۇراربەك قۇسايىنوۆتىڭ «زۇلمات: شىعىس تۇركىستاننىڭ كۇيرەۋى» اتتى كىتابى جارىق كوردى.
ول كىتاپتىڭ شىققانىنا قۋانىپ، اۆتورىن قۇتتىقتاعان وتە دۇرىس، بىراق ونى ءوز قولىڭا الىپ، ءوز كوزىڭمەن باستان-اياق وقىپ شىعۋدىڭ ءجونى مۇلدە بولەك، ارينە. مەن ءسويتتىم. ءسويتتىم دە، بۇكىلقازاقتىق اتالمىش پروبلەماعا قاتىستى ءوزىم بۇرىن بىلمەگەن كوپتەگەن اقپاراتقا قانىقتىم.
ويتكەنى بۇل كىتاپتىڭ ءبىر ارتىقشىلىعى – ونىڭ تۇگەل ناقتى-ناقتى فاكتىلەر مەن تسيفرلاردان جانە فوتوماتەريالداردان قۇراستىرىلعاندىعى. ەكىنشى ارتىقشىلىعى – جەڭىل وقىلاتىن ساۋاتتى ادەبي تىلمەن جازىلعاندىعى. ءۇشىنشى ارتىقشىلىعى – «منوگا بۋكف» دەگەن سىرقاتقا ۇشىراعان بۇگىنگى زامان وقىرمانىن بىردەن ۇركىتىپ جىبەرەتىندەي تىم كولەمدى ەمەس، 60 بەتتىك شاعىن عانا شىعارما ەكەندىگى. ءتورتىنشى ارتىقشىلىعى – ءبىرىنشى ارتىقشىلىق ارقاسىندا سونداي جيناقى كولەمگە وتە كوپ جانە اسا قۇندى ماعلۇماتتار سىيىپ كەتكەندىگى.
قورىتا ايتقاندا، دوستار، بۇگىنگى تاڭدا بارشا قازاق قاسىرەتىنە اينالعان قىتايداعى قازاقتار قاسىرەتىمەن جاقىنىراق تانىسقىلارىڭىز كەلسە (ال مۇنى مەن ءار قازاقتىڭ مىندەتى دەپ ەسەپتەيمىن!), اتالمىش كىتاپتى ساتىپ الىپ وقىعاندارىڭىز دۇرىس دەپ بىلەم. ءبىر جاعىنان بۇل، البەتتە، ەڭ الدىمەن وزدەرىڭىز ءۇشىن كەرەك بولسا، ەكىنشى جاعىنان – كىتاپ اۆتورىنا، ونىڭ ەڭبەگىنە قولداۋ كورسەتىپ، كىتاپ شىعارۋعا كەتكەن شىعىننىڭ ورنىن تولتىرۋعا كومەك رەتىندە قاجەت اعايىنشىلىق تىرلىك بولار ەدى.
باعاسى 2000 تەنگە، الماتى قالاسى، ماقاتاەۆا 45-زەنكوۆا، تۇلپار-اۆتو عيماراتى، 2-ءشى ەتاج.
سەيىت:87079529345
جاسارال قۋانىشالين،
قوعام قايراتكەرى
