10 ءساۋىر كۇنى اقتوبەدە جەدەل جاردەم فەلدشەرلەرى "توتەنشە جاعداي كەزىندە قوسىمشا اقى المادىق" دەپ نارازىلىق ءبىلدىردى. نارازى ەلۋ شاقتى قىزمەتكەر قالالىق جەدەل جاردەم بەكەتى جينالدى.
- ەلدە توتەنشە جاعداي جاريالانعان كەزدە جەدەل جاردەم بەكەتىنىڭ باسشىلىعى "بارىڭە قوسىمشا اقى تولەنەدى" دەدى. ءبىزدىڭ وعان ەش كۇمانىمىز بولمادى. ويتكەنى ءار كۇنىمىز قاۋىپ-قاتەرگە تولى. كاسىبي مىندەتىمىز بولعاندىقتان ءارى قوسىمشا اقى تولەنەدى دەگەننەن كەيىن كۇن سايىن تاۋەكەلگە بارىپ ءجۇرمىز. بۇگىن، 10 ساۋىردە ناۋرىز ايىنىڭ جالاقىسىن الدىق. قوسىمشا اقى تولەنبەپتى. ءبىز وسىعان نارازىمىز، - دەيدى فەلدشەر ءمولدىر ماتايۋپوۆا.
نارازى توپتىڭ سوزىنە قاراعاندا، جەدەل جاردەمدە COVID-19 دەرتىنە قارسى 24 بريگادا جاساقتاعان. ءوزىن ماقسات دەپ تانىستىرعان فەلدشەر "كوروناۆيرۋسقا بايلانىستى جاساقتالعان بريگاداعا كىرمەسەك تە، ۆيرۋسپەن جەدەل جاردەمنىڭ كەز-كەلگەن بريگاداسى تاپ كەلۋى مۇمكىن. سوندىقتان بارىنە بىردەي وتەماقى تولەنۋى ءتيىس" دەپ سانايدى.
ال اقتوبە وبلىسى دەنساۋلىق ساقتاۋ باسقارماسى نارازىلىق بىلدىرگەن جەدەل جاردەم قىزمەتكەرلەر “كوروناۆيرۋسكە بايلانىستى قۇرىلعان ارنايى 24 بريگادادا ەمەس، سوندىقتان وتەماقى تولەنبەدى” دەپ مالىمدەدى.
- كوروناۆيرۋسپەن كۇرەسۋشى مەديتسينا قىزمەتكەرلەرى قاۋىپتىڭ دەڭگەيىنە بايلانىستى ءۇش كاتەگورياعا بولىنگەن. ءبىرىنشى كاتەگورياعا ينفەكتسيونيست دارىگەرلەر، رەانيماتولوگتار ەنگەن. ولاردىڭ ۆيرۋس جۇقتىرۋ قاۋپى اسا جوعارى. جەدەل جاردەم ەكىنشى كاتەگورياعا جاتقىزىلعان. جەدەل جاردەمنىڭ وزىندە ۆيرۋس جۇقتىرۋ قاۋپى جوعارى ارنايى جاساقتالعان بريگادالار بار. قوسىمشا تولەمدى سولارعا بەردىك. ارنايى بريگادالاردىڭ ءوزى جۇكتەمەسىنە قاراي 100, 200, 300 مىڭ تەڭگەدەن قوسىمشا اقى الدى. وبلىستا 425 مىڭ تەڭگە العان بىردە-ءبىر دارىگەر جوق. ءبىز دەنساۋلىق ساقتاۋ مينيسترلىگىنىڭ بۇيرىعىنا سايكەس ارەكەت ەتتىك، - دەيدى اقتوبە وبلىستىق دەنساۋلىق ساقتاۋ باسقارماسى باسشىسى اسەت قاليەۆ.
اقتوبە وبلىستىق دەنساۋلىق ساقتاۋ باسقارماسىنىڭ مالىمەتىنشە، وبلىستا 854 مەديتسينا قىزمەتكەرى كوروناۆيرۋسپەن كۇرەسكە جۇمىلعان. ونىڭ 120-ى جەدەل جاردەم بەكەتتەرىندە جۇمىس ىستەيدى. اقتوبە وبلىسىندا 11 ادامنان كوروناۆيرۋس تابىلعان. ءبىر تۇرعىن دەرتتەن ايىقتى.
30 ناۋرىزدا قازاقستان ۇكىمەتى ۆيرۋسپەن كۇرەسىپ جاتقان دارىگەرلەرگە قوسىمشا وتەماقى تاعايىندالعان. سوعان ساي، “قاۋىپتىلىگى اسا جوعارى توپ” - رەانيماتسيا بولىمدەرىن قوسا العاندا جۇقپالى اۋرۋلار ستاتسيونارىنىڭ دارىگەرلەرى، ورتا جانە كىشى مەديتسينا قىزمەتكەرلەرىنىڭ جالاقىسىنا 850 مىڭ تەڭگە كولەمىندە ۇستەماقى قوسىلادى. "قاۋىپتىلىگى جوعارى توپ" - پروۆيزورلىق ستاتسيونار مەن جەدەل جاردەم قىزمەتىنىڭ دارىگەرلەرى، ورتا جانە كىشى مەديتسينا قىزمەتكەرلەرىنىڭ جالاقىسىنا ايىنا 425 مىڭ تەڭگە قوسىلادى. "قاۋىپتىلىگى ورتاشا توپ" - كارانتيندىك ستاتسيونار دارىگەرلەرى، ورتا جانە كىشى مەديتسينا قىزمەتكەرلەرى سانيتارلىق دارىگەرلەر، جەدەل جاردەم جۇرگىزۋشىلەرىنىڭ جالاقىسىنا ايىنا 212 مىڭ تەڭگە قوسىلادى.
"ازاتتىق" راديوسى
فوتو: "ازاتتىق" راديوسى
