قازاقستاندا توتەنشە جاعداي رەجيمى ءساۋىردىڭ 30-نا دەيىن ۇزارتىلدى، دەپ حابارلايدى "ادىرنا" ۇلتتىق پورتالى.
توتەنشە جاعداي 15 ساۋىردە اياقتالۋى ءتيىس بولاتىن. وسىعان بايلانىستى مەملەكەت باسشىسى رەجيمدى ايدىڭ سوڭىنا دەيىن سوزۋعا تاپسىرما بەردى.
"توتەنشە جاعداي رەجيمىن، كەم دەگەندە، ءساۋىردىڭ اياعىنا دەيىن سوزۋعا تۋرا كەلەتىنى قازىردىڭ وزىندە تۇسىنىكتى بولىپ وتىر. ءبىز كوروناۆيرۋسپەن اۋىرۋدىڭ شارىقتاۋ شەگىن ءالى وتكىزگەن جوقپىز. ىندەتكە قاتىستى جاعدايدى جەڭىلدەتۋگە بولمايدى. وسى سەبەپكە بايلانىستى كارانتين رەجيمىن ەلوردادا، الماتى مەن شىمكەنتتە جانە ءتيىستى وبلىستاردا ءساۋىردىڭ اياعىنا دەيىن سوزۋدى تاپسىرامىن", - دەدى قاسىم-جومارت توقاەۆ توتەنشە جاعداي جونىندەگى مەملەكەتتىك كوميسسيانىڭ وتىرىسىندا.
پرەزيدەنت مۇنىڭ وڭتايلى شەشىم ەمەس ەكەنىن تۇسىنەتىنىن ايتتى. ويتكەنى حالىق كوشەگە شىعىپ، قالىپتى تۇرمىسىن جالعاستىرعىسى كەلەدى.
"بىراق كارانتين رەجيمىن ساقتاۋدان، وقشاۋلانۋدان باسقا جول جوق. بۇل وتاندىق جانە حالىقارالىق ۆيرۋسولوگ مامانداردىڭ ۇسىنىسى" – دەدى مەملەكەت باسشىسى.
قازاقستاندا كوروناۆيرۋس ىندەتىنە بايلانىستى توتەنشە جاعداي رەجيمى پرەزيدەنتتىڭ جارلىعىمەن 16 ناۋرىزدا ءبىر ايعا ەنگىزىلگەن ەدى.
