Qazaqstanda tótenshe jaǵdaı rejımi sáýirdiń 30-na deıin uzartyldy, dep habarlaıdy "Adyrna" ulttyq portaly.
Tótenshe jaǵdaı 15 sáýirde aıaqtalýy tıis bolatyn. Osyǵan baılanysty memleket basshysy rejımdi aıdyń sońyna deıin sozýǵa tapsyrma berdi.
"Tótenshe jaǵdaı rejımin, kem degende, sáýirdiń aıaǵyna deıin sozýǵa týra keletini qazirdiń ózinde túsinikti bolyp otyr. Biz koronavırýspen aýyrýdyń sharyqtaý shegin áli ótkizgen joqpyz. Indetke qatysty jaǵdaıdy jeńildetýge bolmaıdy. Osy sebepke baılanysty karantın rejımin elordada, Almaty men Shymkentte jáne tıisti oblystarda sáýirdiń aıaǵyna deıin sozýdy tapsyramyn", - dedi Qasym-Jomart Toqaev tótenshe jaǵdaı jónindegi memlekettik komıssııanyń otyrysynda.
Prezıdent munyń ońtaıly sheshim emes ekenin túsinetinin aıtty. Óıtkeni halyq kóshege shyǵyp, qalypty turmysyn jalǵastyrǵysy keledi.
"Biraq karantın rejımin saqtaýdan, oqshaýlanýdan basqa jol joq. Bul otandyq jáne halyqaralyq vırýsolog mamandardyń usynysy" – dedi memleket basshysy.
Qazaqstanda koronavırýs indetine baılanysty tótenshe jaǵdaı rejımi prezıdenttiń jarlyǵymen 16 naýryzda bir aıǵa engizilgen edi.
