فوتو: تۇرار قازانعاپوۆ
پاۆلودار وبلىسىندا كوروناۆيرۋستان ءبىر ادام كوز جۇمدى، - دەپ حابارلايدى Tengrinews.kz .
"پاۆلودار وبلىسىندا كوروناۆيرۋس ىندەتىنەن ءبىر ناۋقاس كوز جۇمدى. ناۋقاس 1936 جىلى دۇنيەگە كەلگەن. مارقۇم - پاۆلودار قالاسىنىڭ تۇرعىنى، ول 8 ساۋىردە "ورتاشا اۋىر دەڭگەيدەگى اۋرۋحانادان تىس پوليسەگمەنتارلىق پنەۆمونيا، ءووسا" دياگنوزىمەن اۋرۋحاناعا تۇسكەن. كەلەسى كۇنى ەر ادامنىڭ كوروناۆيرۋسقا تاپسىرعان سىناماسى وڭ ناتيجە كورسەتتى. ەر ادام 2016 جىلى "برونح استماسى", "وكپەنىڭ وبسترۋكتيۆ سوزىلمالى اۋرۋى" ء(ووسا), "جۇرەكتىڭ يشەميالىق اۋرۋى", ء"ۇشىنشى دارەجەدەگى ارتەريالىق گيپەرتەنزيا" جانە "كوكىرەك تەرىسىنىڭ قاتەرلى ىسىگى" دياگنوزدارىمەن ەسەپتە تۇرعان", - دەلىنگەن حابارلامادا.
پاۆلوداردا كوروناۆيرۋس انىقتالعان تاعى ءبىر ناۋقاس 1981 جىلى دۇنيەگە كەلگەن. ول 8 ساۋىردە جۇقپالى اۋرۋلار اۋرۋحاناسىنا جاتقىزىلعان. ونىڭ جاعدايى قاناعاتتانارلىق.
بايلانىستا بولعان تۇلعالار انىقتالىپ، ستانتسيونارلىق كارانتينگە جاتقىزىلعان.
وسىلايشا قازاقستاندا قاۋىپتى ۆيرۋستان قايتىس بولعاندار سانى 8-گە جەتتى.
ەلىمىز بويىنشا كوروناۆيرۋس ىندەتىن جۇقتىرعان تاعى 17 جاعداي تىركەلگەنى حابارلانىپ وتىر.
الماتى قالاسى - 1,
اقمولا وبلىسى - 4,
پاۆلودار وبلىسى - 2,
قىزىلوردا وبلىسى - 8,
نۇر-سۇلتان قالاسى - 2.
قازاقستان بويىنشا بارلىعى 781 جاعداي.
