حالىقارالىق تۇركى اكادەمياسىنىڭ (TWESCO) باستاماسىمەن، موڭعولياداعى كونە تۇركىلەردىڭ «شيۆەەت ۋلاان» عۇرىپتىق كەشەنىندە باستالعان ارحەولوگيالىق قازبا جۇمىستارى جالعاسىپ جاتىر. بۇل جۇمىس، موڭعوليا ۇلتتىق عىلىم اكادەمياسى جانىنداعى تاريح جانە ارحەولوگيا ينستيتۋتىمەن بىرىگىپ جۇزەگە اسىرىلۋدا.
تWESCO باسشىسى دارحان قىدىرالىنىڭ جەتەكشىلىگىندەگى جوبا اياسىندا، ماۋسىم ايىندا باستالعان قازبا جۇمىستارىن تانىمال موڭعول ارحەولوگى د.تسەۆەندورج جانە قازاقستاندىق عالىم-تۇركىتانۋشى ن.ءبازىلحان جۇرگىزۋدە. قازىر كەشەننىڭ باستى الاڭىنداعى «ماڭگى تاس» تاس ەسكەرتكىشىنىڭ ورنىنا جانە ونىڭ ەكى تابالدىرىعىنا قازبا جۇمىستارى جۇرگىزىلدى. ارحەولوگتاردىڭ جۇمىسى ناتيجەسىز ەمەس. اتاپ ايتقاندا، ەجەلگى تۇركىلەردىڭ تاس مۇسىندەرىن تاپتى. بۇدان بولەك، ءۇيىندى تاستاردان ارشىلعان كەشەننىڭ قۇرىلىمى، ىرگەتاسى، ىرگەتاسىنىڭ ءپىشىنى مەن كولەمى انىقتالدى.
وسى جانە وزگە دە جاڭالىقتار اكادەميانىڭ ۇيىمداستىرۋىمەن 24 تامىز كۇنى «شيۆەەت ۋلاان» عۇرىپتىق كەشەنىندە وتەتىن «ۇلى دالا كوشپەلىلەرى: تاريحي-مادەني ۇندەستىكتەر» اتتى ءىى تۇركى-موڭعول ارحەولوگتارىنىڭ دالا سەمينارىندا كەڭىرەك تانىستىرىلاتىن بولادى. بۇل دالا سەمينارى ازەربايجان، قازاقستان، قىرعىزستان، موڭعوليا، رەسەي جانە تۇركيا عالىمدارى مەن ءباسپاسوز وكىلدەرىنىڭ قاتىسۋىمەن 2016 جىلعى 20-27 تامىزدا وتەتىن «ءتاڭىرتاۋدان وتۇكەنگە دەيىن: ۇلى دالا كوشپەندىلەرىنىڭ تاريحي-مادەني قازىنالارى» اتتى حالىقارالىق ەكسپەديتسيا اياسىندا ۇيىمداستىرىلادى.
