سەناتور توتەنشە جاعدايلار كوميتەتى ءوز الدىنا مينيسترلىك بولۋ كەرەك دەپ ەسەپتەيدى
بۇگىن پارلامەنت سەناتىندا وتكەن ۇكىمەت ساعاتىندا ىشكى ىستەر ورگاندارىن رەفورمالاۋعا ارنالعان 2019-2021 جىلعى جوسپار تۋرالى تالقىلاندى. وتىرىستى جۇرگىزگەن سەناتتاعى حالىقارالىق قاتىناستار جانە قورعانىس كوميتەتىنىڭ توراعاسى مۇحتار قۇل-مۇحاممەد ىشكى ىستەر مينيسترلىگى جۇمىسىن سىنعا الدى. ايتۋىنشا، ۆەدومستۆو جۇمىسىنىڭ دۇرىس جۇرمەۋىنە ءجيى بولاتىن قۇرىلىمدىق وزگەرىستەر كەرى اسەرىن تيگىزىپ وتىر.
«وكىنىشكە قاراي، ەلىمىزدە ۇكىمەت قۇرامىندا بولاتىن ءجيى-ءجيى وزگەرىستەردىڭ ناتيجەسىندە وسى مينيسترلىك جۇمىسى كەيىنگى كەزدە باياۋلاي تۇسكەن سيپاتى بار. 2002 جىلى ىشكى ىستەر قۇرىلىمىنىڭ قۇرامىنان قىلمىستىق اتقارۋ جۇيەسى الىنىپ، ول ادىلەت مينيسترلىگىنىڭ قۇرامىنا بەرىلدى. بىراق بۇل دۇرىس ناتيجە بەرگەن جوق. ءسويتىپ ونى قايتادان ىشكى ىستەر مينيسترلىگى قۇرامىنا قايتارۋعا تۋرا كەلدى. سونداي-اق ءتۇرلى قۇجاتتاردى تىركەۋ، حالىقپەن جۇمىس ىستەۋ سياقتى قىزمەت اتقاراتىن كوميتەت بولدى. ونى دا 2005 جىلى ادىلەت مينيسترلىگى قۇرامىنا بەردىك. بۇل دا ناتيجە بەرمەي، وزىنە قايتارىپ بەردىك»، - دەدى ول.
سەناتور جۇمىس جۇيەلى ءجۇرۋ ءۇشىن توتەنشە جاعداي كوميتەتىن ءوز الدىنا مينيسترلىك ەتۋ كەرەك دەپ ەسەپتەيدى.
«كوپتەگەن مەملەكەتتەردە جەكە مينيسترلىك بولىپ وتىرعان توتەنشە جاعدايلار دەگەن ورگان بار. قازاقستان جەر كولەمى بويىنشا الەمدە 9 ورىندا دەيتىن بولساق، مۇنداي ۇلكەن مەملەكەتتە توتەنشە جاعدايلار جونىندەگى ورگاننىڭ دا جەكە دارا مينيسترلىك بولۋعا تولىق قۇقى بار. ازىرگە بۇل سالا ىشكى ىستەر مينيسترلىگىنىڭ قۇرامىندا»، - دەدى ول.
"ازاتتىق رۋحى"
