ورتا سالماقتا IBF جانە IBO چەمپيونى قازاقستاندىق گەننادي گولوۆكيننىڭ (40-1-1, 35 كو) مىندەتتى قارسىلاس پولشالىق كاميل شەرەمەتامەن (21-0, 5 كو) جەكپە-جەگى ساۋىردەن ەرتە وتپەيدى. بۇل تۋرالى ESPN باسىلىمىنا پروموۋتەر ەددي حيرن مالىمدەدى.
باستاپقىدا گولوۆكين جەكپە-جەگى 29 ساۋىرگە جوسپارلانعان بولاتىن، كەيىن بىرنەشە سەبەپكە بايلانىستى 28 ناۋرىزعا اۋىستىرىلدى. ال وتەتىن ورىن رەتىندە چيكاگوداعى Wintrust Arena مەن ينگلۆۋدتەگى Forum ارەناسى قاراستىرىلعان.
ەندى ءحيرننىڭ اقپاراتىنشا، بوكس كەشى 11 ساۋىردە وتەدى. سونىمەن قوسا، جەكپە-جەك ءالى دە قازاقستاندا ءوتۋ ىقتيمالدىعى بار.
"تالقىلاپ جاتقانىمىز وسى ماسەلە. ازىرگە ەشتەڭە شەشىلگەن جوق، بىراق، جەكپە-جەك قازاقستاندا ءوتۋ مۇمكىن", - دەيدى Matchroom Boxing باسشىسى.
دەگەنمەن مۇنىڭ الدىندا RingPolska باسىلىمى ەددي ءحيرننىڭ گولوۆكين - شەرەمەتا جەكپە-جەگىن قازاقستاندا وتكىزۋ تالپىنىسى ءساتسىز بولعانىن حابارلاعان ەدى.
