قوردايداعى قاقتىعىسقا بايلانىستى وقيعا ورنىنا اتتانعان ءتىلشىمىز وڭعار قابدەننىڭ ايتۋىنشا، ۇستالعانداردىڭ باسىم بولىگى قازاق بالالارى.
بۇل اقپاراتتى بىرقاتار باق وكىلدەرى دە جارىسا جازىپ جاتىر. ماسەلەن، Qamshy.kz پورتالىنىڭ مالىمدەۋىنشە، ءتىپتى «پوليتسيا قىزمەتكەرلەرى 78 جاستاعى قاريا مەن ونىڭ ۇلدارىن ۇرىپ-سوققان دۇنگەندەردى جازالاماعان. بۇل تۋرالى اتالمىش پورتالعا قوردايداعى قاقتىعىستان زارداپ شەككەن 78 جاستاعى قاريانىڭ ۇلى نۇرلان تولەگەنۇلى ايتقان.
«ءبىزدى سوققىعا جىققان دۇنگەندەردى قاماۋعا المادى. اۋداندىق ىشكى ىستەر بولىمىنە بارعان كەزدە دۇنگەننىڭ ادۆوكاتىن كوردىم. قازاق ايەلى الگى دۇنگەندەردىڭ قورعاۋشىسى ەكەن. ول ماعان "مەن بۇلاردان بولەك باسقا دا دۇنگەندەردى قورعاپ، شىعارىپ العانمىن" دەپ ايتتى. ادۆوكاتتىڭ اتى-ءجونىن بىلمەيمىن. اۋداندىق ىشكى ىستەر بولىمىندە ماعان بىرنەشە سۇراق قويدى. ءبىرازدان سوڭ ادۆوكات اكەمنىڭ قايدا ەكەنىن سۇرادى. كەيىن اكەممەن سويلەستى. مەنى ەشقايدا شىعارمادى. سۇرانسام 5 مينۋتقا عانا سىرتقا شىعۋىما بولادى. ال الگى دۇنگەن بولسا ەمىن-ەركىن كىرىپ-شىعىپ جۇرەدى. سوندا ولارعا زاڭ جوق بولىپ تۇر عوي. كەيىن تۇنگى 01:00-گە دەيىن ءبىزدى ۇستاپ، سۇراق قويدى. الگى دۇنگەندەردى بوساتىپ جىبەردى. تاڭەرتەڭ ەرتەمەن اۋداندىق ىشكى ىستەر بولىمىنە بارىپ، دۇنگەن جىگىتتىڭ قايدا ەكەنىن سۇراسام، سول جەردەگىلەر "بىلمەيمىن" دەپ قىسقا قايىردى. اۋداندىق ىشكى ىستەر ءبولىمى باسشىسىنىڭ ورىنباسارى "بۇگىن ۇشەۋىن دە قاماۋعا الامىن، ءتورتىنشىسى جوق" دەپ مويىنداماي قويدى. ال مەن ءتورتىنشى دۇنگەندى سيپاتتاپ جازىپ بەرگەنمىن. بىراق ءالى تابا الماعان، – دەگەن نۇرلان تولەگەنۇلى.
قامالعانداردىڭ ايتۋىنشا، ولارعا قورعاۋشىلار بەرىلمەگەن. قازاق ءتىلدى ادۆوكاتتاردىڭ قاجەتتىگى دە ايتىلىپ جاتىر.
"ادىرنا" ۇلتتىق پورتالى
