«ەلىم مەنىڭ» جوباسىندا وزدەرىنىڭ ەل تۋرالى بىلىمدەرىن كورسەتكىسى كەلەتىن ادامداردان قاتىسۋعا دەگەن سۇرانىستار كوپتەپ ءتۇسىپ جاتىر. قانشالىقتى پاتريوت ەكەندىكتەرىن ەل الدىندا سىنعا سالماق. ءتىپتى، سپورتشى ارداق نازاروۆ جارى جۋرناليست مارجان بولاتقىزىنا، ال «ۇلىتاۋ» توبىنىڭ قاتىسۋشىلارى ەرجان الىمبەتوۆ ارىپتەسى الۋا ماحانوۆاعا قاراما-قارسى توپتا باعىن سىنادى.
سونىمەن قاتار، ولاردىڭ توپتارىندا بەلگىلى جۋرناليست نازيرا بەردالى، ەكولوگ جانە ساياساتكەر مەلس ەلەۋسىزوۆ تارتىستى ويىن كورسەتتى.
قازاق تىلىنە ارنالعان ەكىنشى اينالىمدا نازيرا بەردالى تىلگە دەگەن ءوز بىلىكتىلىگىن ايرىقشا كورسەتە ءبىلدى. اسىرەسە، تۇراقتى ءسوز تىركەستەرىنىڭ بالاماسىن تاۋىپ ايتقانى كورەرمەندەردى تاڭعالدىرماي قويمادى.
ەستەرىڭىزگە سالا كەتەيىك، باعدارلاما جەڭىمپازدارىنا «قازاق ەنتسيكلوپەدياسى» باسپاسى شىعارعان «قازاقستان تاريحىنىڭ ءتورت تومدىق ەنتسيكلوپەدياسى»، سەيىت كەنجەاحمەتۇلىنىڭ «قازاق سالت-داستۇرلەرىنىڭ ەنتسيكلوپەدياسى» كىتاپتارى تارتۋ ەتىلەدى. بۇل تەڭدەسسىز، قۇندى كىتاپتار قازاق حالقىنىڭ شەجىرەسى مەن قاتار ۇلتتىق كيىمدەرى، تاعامدارى، سالت-داستۇرلەرىنەن سىر شەرتەدى.
«قازاقستان ماگنيتكاسى» اتانعان تەمىرتاۋ دومنا پەشى شويىندى العاش رەت قاي جىلى بالقىتتى؟»، ««تورتا» ءسوزى قانداي ماعىنانى بىلدىرەدى؟» دەگەن ساۋالداردىڭ جاۋابىن قازاقستان ۇلتتىق ارناسىندا بىلۋگە اسىعىڭىزدار. ەفيردە كەزدەسكەنشە…
تورعىن ءابۋشاحمان
