جامبىل وبلىسىنىڭ اكىمدىگى دەنساۋلىق ساقتاۋ مينيسترلىگىنەن ەرتە جۇكتى بولىپ قالعانداردى جىلدام انىقتاۋ ءۇشىن ەلەكتروندى بازاعا ولاردىڭ تۇرعىلىقتى جەرى مەن وقيتىن مەكتەبىن ەنگىزۋدى سۇراپ وتىر، دەپ حابارلايدى Sputnik قازاقستان تىلشىسى.
وبلىس اكىمىنىڭ ورىنباسارى سۇلۋشاش قۇرمانبەكوۆانىڭ ايتۋىنشا، جامبىل وبلىسىندا 2018 جىلى كامەلەتكە تولماعان 364 قىز جۇكتى بولىپ قالسا، بىلتىر ولاردىڭ سانى 248-گە دەيىن ازايعان.
"ولاردىڭ اراسىندا 16 جاسقا دەيىنگى قىزداردىڭ سانى – سەگىز. 71-ءى - كورشى وبلىستار مەن قىرعىزستاننان كەلگەندەر", دەدى ول Nur Otan پارتياسىندا وتكەن جيىندا.
وسى رەتتە قۇرمانبەكوۆا دەنساۋلىق ساقتاۋ مينيسترلىگىنە ۇسىنىس ايتتى.
"بۇكىل رەسپۋبليكادا ەلەكتروندى بازا بار ەكەن. بىراق، ول ەلەكتروندى بازاعا وقۋشىنىڭ تۇرعىلىقتى جەرى، وقيتىن ورنى كورسەتىلمەيدى. سوندىقتان ءبىز ەگەر ەرتە جۇكتى بولىپ قالعان قىز ءبىزدىڭ وبلىسقا تىركەلسە، ىزدەپ وتىرامىز. وسى ماسەلەدە دەنساۋلىق ساقتاۋ مينيسترلىگى كىشكەنە قولداۋ كورسەتسە", - دەگەن ءوتىنىشىن ءبىلدىردى اكىم ورىنباسارى.
سونىمەن قاتار، ول بالالار اراسىنداعى سۋيتسيدكە دە توقتالدى. ايتۋىنشا، ءسۋيتسيدتىڭ الدىن الۋعا باعىتتالعان شارالارعا قاراماستان، 2018 جىلعا قاراعاندا وزىنە قول سالۋ وقيعاسى ەكى ەسەگە ءوسىپ، 2019 جىلى ون ەكىگە جەتكەن.
"جالپى مۇنىڭ ءبارى ۇيىندە، كەشكى ۋاقىتتا بولعان. تەرگەۋ قورىتىندىسى بويىنشا توعىز وقيعانىڭ سەبەپتەرى انىقتالمادى، ال ۇشەۋى وتباسىنداعى كيكىلجىڭ، رەنىش پەن ىزالانۋ سالدارىنان بولعان. سوندىقتان وبلىس اكىمىنىڭ تاپسىرماسىمەن ءبىز پسيحولوگيالىق تاربيە ورتالىعىن اشۋدى قولعا الىپ وتىرمىز", - دەدى قۇرمانبەكوۆا.
سونداي-اق بالالار اراسىندا ءوز-وزىنە قول جۇمساۋدىڭ الدىن الۋ، شۇعىل ارەكەت ەتۋ الگوريتمى بەكىتىلگەن.
