Jambyl oblysynyń ákimdigi densaýlyq saqtaý mınıstrliginen erte júkti bolyp qalǵandardy jyldam anyqtaý úshin elektrondy bazaǵa olardyń turǵylyqty jeri men oqıtyn mektebin engizýdi surap otyr, dep habarlaıdy Sputnik Qazaqstan tilshisi.
Oblys ákiminiń orynbasary Sulýshash Qurmanbekovanyń aıtýynsha, Jambyl oblysynda 2018 jyly kámeletke tolmaǵan 364 qyz júkti bolyp qalsa, byltyr olardyń sany 248-ge deıin azaıǵan.
"Olardyń arasynda 16 jasqa deıingi qyzdardyń sany – segiz. 71-i - kórshi oblystar men Qyrǵyzstannan kelgender", dedi ol Nur Otan partııasynda ótken jıynda.
Osy rette Qurmanbekova densaýlyq saqtaý mınıstrligine usynys aıtty.
"Búkil respýblıkada elektrondy baza bar eken. Biraq, ol elektrondy bazaǵa oqýshynyń turǵylyqty jeri, oqıtyn orny kórsetilmeıdi. Sondyqtan biz eger erte júkti bolyp qalǵan qyz bizdiń oblysqa tirkelse, izdep otyramyz. Osy máselede densaýlyq saqtaý mınıstrligi kishkene qoldaý kórsetse", - degen ótinishin bildirdi ákim orynbasary.
Sonymen qatar, ol balalar arasyndaǵy sýııdke de toqtaldy. Aıtýynsha, sýııdtiń aldyn alýǵa baǵyttalǵan sharalarǵa qaramastan, 2018 jylǵa qaraǵanda ózine qol salý oqıǵasy eki esege ósip, 2019 jyly on ekige jetken.
"Jalpy munyń bári úıinde, keshki ýaqytta bolǵan. Tergeý qorytyndysy boıynsha toǵyz oqıǵanyń sebepteri anyqtalmady, al úsheýi otbasyndaǵy kıkiljiń, renish pen yzalaný saldarynan bolǵan. Sondyqtan oblys ákiminiń tapsyrmasymen biz psıhologııalyq tárbıe ortalyǵyn ashýdy qolǵa alyp otyrmyz", - dedi Qurmanbekova.
Sondaı-aq balalar arasynda óz-ózine qol jumsaýdyń aldyn alý, shuǵyl áreket etý algorıtmi bekitilgen.
