تۇركىستان وبلىسى مەن شىمكەنت قالالارىنداعى مەكتەپ-ينتەرناتتاردىڭ ءحالى مۇشكىل، بالالارعا جاعداي جاسالماعان
"Nur Otan" پارتياسى جانىنداعى رەسپۋبليكالىق كەڭەس رەسپۋبليكاداعى مەكتەپ-ينتەرناتتارداعى جاعا ۇستاتارلىق جايتتار تۋرالى ايتتى، دەپ حابارلايدى Sputnik قازاقستان تىلشىسى.
"Nur Otan" پارتياسى جانىنداعى وتباسى، ايەلدەر ماسەلەلەرى جانە بالالاردىڭ قۇقىقتارىن قورعاۋ جونىندەگى رەسپۋبليكالىق قوعامدىق كەڭەسىنىڭ مۇشەلەرى 200 ەلدى مەكەندى ارالاپ، 1300-دەن استام ءبىلىم بەرۋ، الەۋمەتتىك قورعاۋ جانە دەنساۋلىق ساقتاۋ مەكەمەلەرىنىڭ جۇمىسىن تەكسەرىپ شىقتى. كەڭەس توراعاسى دينارا زاكيەۆانىڭ ايتۋىنشا، رەسپۋبليكا بويىنشا، نەگىزىنەن، تۇركىستان وبلىسى مەن شىمكەنت قالالارىنداعى مەكتەپ-ينتەرناتتاردىڭ ءحالى مۇشكىل، بالالارعا جاعداي جاسالماعان.
"بىرنەشە مىسال كەلتىرەيىن. تۇركىستان قالاسىنداعى ەرۋباەۆ اتىنداعى مەكتەپ-ينتەرنات سانيتارلىق نورمالارعا ساي ەمەس. 385 بالا جىلدىڭ ون ايىن سول ينتەرناتتىڭ قابىرعاسىندا وتكىزەدى. ىدىستاردىڭ اراسىندا تاراقاندار ءجۇر، ىدىس-اياقتار سىنىق. اۋلاداعى دارەتحانالار بالالار ءۇشىن قاۋىپتى، لاس، گيگيەنا ساقتالماعان", - دەدى ول پارتيادا وتكەن جيىندا.
ايتۋىنشا، قازىر جاعداي قالپىنا كەلتىرىلدى. توڭازىتقىش، كىر جۋعىش ماشينالار، ەلەكتر پليتالارى جانە باسقا دا قاجەتتى جيھازدار ساتىپ الىندى.
قوعامدىق كەڭەس مۇشەلەرىنىڭ تەكسەرىسىنەن كەيىن الماتى وبلىسىنداعى سارقان ينتەرناتىنداعى جاعداي دا تۇبەگەيلى وزگەرگەن. عيماراتتىڭ ىشىندە سانۋزەل بولماعان، بالالار ءتۇن ورتاسىندا دالاعا شىعۋعا ءماجبۇر ەكەن.
زاكيەۆانىڭ ايتۋىنشا، قازىر جوبالىق-سمەتالىق قۇجاتتاما ازىرلەندى، وسى جىلدىڭ سوڭىنا دەيىن جوندەۋ جۇرگىزىلەدى. ينتەرناتتىڭ ماتەريالدىق-تەحنيكالىق بازاسىن جاڭارتۋعا 11,5 ميلليون تەڭگە ءبولىندى.
شىمكەنتتەگى سايرام شاعىن اۋدانىندا ورنالاسقان مەكتەپتەگى جاعداي دا كوڭىل كونشىتەرلىك ەمەس. 1260 وقۋشىعا شاقتالعان مەكتەپتە جالعىز عانا قول جۋعىش. تەمىر قول جۋعىشتىڭ ءوزى كوشەدە ورناتىلعان.
"قازىرگى تاڭدا جوبالىق-سمەتالىق قۇجاتتاما دايىندالدى. سۋمەن قامتۋ، كارىز جۇيەسىن تارتۋ ءۇشىن 10,5 ميلليون تەڭگە قاراستىرىلدى. بيىل جوندەۋ جۇرگىزىلەدى", - دەدى كەڭەس توراعاسى.
رەسپۋبليكالىق كەڭەس تاراپىنان ەسكەرتۋ العان مەكتەپتەر مەن ينتەرناتتار ءۇشىن وننان وتىز بەس ميلليون تەڭگەگە دەيىن قارجى بولىنگەن. جوندەۋگە دايىندىق جۇرگىزىلىپ جاتىر.
"جالپى مۇنداي جاعدايلاردىڭ باسىم بولىگى تۇركىستان، الماتى، باتىس قازاقستان وبلىستارى مەن شىمكەنت قالاسىندا تىركەلدى. وسىعان بايلانىستى ءبىز اكىمدىكتەرمەن بىرگە وسى مەكەمەلەر بويىنشا جۇمىستى جالعاستىرۋدى جوسپارلاپ وتىرمىز. ولاردىڭ سانى – 518. ارقايسىسىندا قىرىقتان ءتورت جۇزگە دەيىن بالالار تۇرادى", - دەدى ول.
قوعامدىق كەڭەس مۇشەلەرى 311 مەكتەپ پەن ينتەرناتتى ارالاعان.
