"حالىققا جاقسىلىق جاساپ جاتىرمىز": بۇركىت پەن قاراقات جاڭا تالاپقا قاتىستى پىكىر ايتتى

ءماجىلىس دەپۋتاتتارى بۇگىن لوتەرەيا تۋرالى زاڭ جوباسىن ءبىرىنشى وقىلىمدا ماقۇلدادى. وعان سايكەس، ەندى ارنايى ليتسەنزياسىز الەۋمەتتىك جەلىلەردە لوتەرەيا وتكىزۋگە تىيىم سالىنادى. ال بۇل تالاپتى ورىنداماعاندارعا 5 ميلليون تەڭگەگە دەيىن ايىپپۇل سالىنادى. Sputnik قازاقستان تىلشىسى Instagram جەلىسىندە لوتەرەيا وتكىزىپ جۇرگەن ءانشى-ارتىستەردىڭ جاڭا زاڭ جوباسىنا قاتىستى پىكىرىن ءبىلدى.

"لوتەرەيادان بارلىعى باقىتتى بولادى"

تانىمىل ءانشى بۇركىت ءوزىنىڭ Instagram پاراقشاسى ارقىلى لوتەرەيانىڭ ەكىنشى لەگىن ويناتىپ جاتىر. بۇعان دەيىن ول ءان جيناقتىڭ ەلەكتروندى نۇسقاسىن 10 مىڭ تەڭگەگە ساتىپ، پاتەر، كولىك پەن جۇزدەگەن تۇرمىستىق زاتتاردى ويناتسا، وسى جولى تۋرا سونداي سىيلىقتاردى ۇتىسقا تىگىپ وتىر. ال لوتەرەياعا شەكتەۋ قويىلسا، حالىق وسىنداي مۇمكىندىكتەن ايىرىلادى دەيدى.

"مەنىڭشە، ول دۇرىس ەمەس. ول زاڭمەن ونشا كەلىسپەيمىن. ءبىز ءوز لوتەرەيامىزدى اشىق وتكىزەمىز. حالىققا بارىنشا جاقسىلىق جاساۋعا تىرىسىپ جاتىرمىز. وسى جولى بەس ادام اۆتوكولىك يەسى، نۇر-سۇلتان قالاسىندا بەس پاتەردىڭ يەسى بولادى. ول جامان با؟ ارينە، جاقسى. قازىردىڭ وزىندە ۇكىمەت تە پاتەردى اشەيىن بەرىپ جاتقان جوق قوي. ال بىزدە 10 مىڭ تەڭگەنى تىگەدى دە، ءبىر پاتەردى ۇتا سالادى. بۇل لوتەرەيادان بارلىعى باقىتتى بولادى", - دەدى بۇركىت Sputnik قازاقستان تىلشىسىنە بەرگەن سۇحباتىندا.

ءانشىنىڭ ايتۋىنشا، بۇگىندە ونىڭ جيەنى دە الماتىدا پاتەر الا الماي ءجۇر.

ء"وزى العىسى كەلىپ وتىر. كىشكەنە اقشاسى بار، بىراق جەتپەي جاتىر. مىسالى، ول لوتەرەيادان پاتەر ۇتىپ السا، قانداي جاقسى بولار ەدى. تۋىسقاندارىنىڭ ءبارى قۋاناتىن ەدى. بىراق ءبىزدىڭ لوتەرەيامىزعا قاتىسىپ جاتىر ما، جوق پا، ونىسىن بىلمەدىم. بيلەت العان شىعار. ماعان ايتقان جوق", - دەپ اتاپ كورسەتتى ول.

"بۇل لوتەرەيا ەمەس"

ءانشى قاراقات ءابىلدينا 5 مىڭ تەڭگەنىڭ شۇلىعىن ساتىپ، حالىق اراسىندا پاتەر مەن كولىكتى ويناتقالى جاتىر. ونىڭ ايتۋىنشا، بۇل لوتەرەيا ەمەس.

"مەن ماركەتينگتىك مەگا-اكتسيا وتكىزىپ جاتىرمىن. بۇل ءوز ءوندىرىسىم، بىرەۋدىكى ەمەس. ءوز باسپانام، ءوز "پودپيسچيگىم", ءبارى زاڭدى. ءبىز زاڭ اياسىندا عانا قيمىلداپ وتىرمىز. وتاندىق ءونىمدى ناسيحاتتاۋ ماقساتىندا ۇيىمداستىرىلىپ جاتقان ماركەتينگتىك مەگا-اكتسيا. ءبىز زاڭگەرلەرمەن اقىلداستىق. بۇل جوبا زاڭعا قايشى ەمەس", - دەدى ءابىلدينا Sputnik قازاقستان تىلشىسىنە بەرگەن سۇحباتىندا.

ءانشى ء"بىر جاپىراق قاعازعا ءنومىر سوعىپ، ونىمەن ءبارىن بىلىقتىرىپ جاتپاعانىن" دا جەتكىزدى. سوندىقتان لوتەرەيا مەن مەگا-اكتسيانىڭ ارا-جىگىن اجىراتۋ قاجەت دەيدى.

"بۇل – لوتەرەيا ەمەس. مىسالى، ۇلكەن ساۋدا ورتالىقتارى وتكىزەتىن ۇتىستار بولادى عوي. ازىق-تۇلىكتى بەلگىلى ءبىر سوماعا ساتىپ الساڭىز، ۇتىسقا قاتىسا الاسىز. وسىنداي ماركەتينگتىك تاسىلدەر جاسالادى. ەشكىمدى قينامايدى. بىزدىكى دە سونداي. شۇلىق جاسقا دا، كارىگە دە، قىستا دا، جازدا دا قاجەت. ادام شۇلىقسىز جۇرمەيدى", - دەپ اتاپ كورسەتتى ءابىلدينا.

كىمگە ايىپپۇل سالىنادى؟

بۇگىن ماجىلىستە جاڭا زاڭ جوباسىن تانىستىرعان مادەنيەت جانە سپورت ءمينيسترى اقتوتى رايىمقۇلوۆا الەۋمەتتىك جەلىلەردە زاڭسىز لوتەرەيا وتكىزگەن ارتىستەر مەن بلوگەرلەر جازاسىز قالمايتىنىن ايتتى.

"زاڭ جوباسى ارقىلى لوتەرەيا وتكىزۋ ءۇشىن بەلگىلى ءبىر مولشەردە اقشا جيناعان ادام لوتورەيا وپەراتورى نەمەسە لوتورەيا تاراتۋشىسى بولىپ سانالادى. بىرىڭعاي لوتورەيا وپەراتورىنان ليتسەنزيا الماي، وسىنداي لوتورەيا وتكىزىپ، پايدا تاپسا، زاڭ بۇزعان بولىپ سانالادى. شىن مانىندە، بۇل وتە ماڭىزدى ماسەلە. وسىعان دەيىن اكىمشىلىك نەمەسە باسقا دا جاۋاپكەرشىلىك كوزدەلمەگەن ەدى", - دەدى رايىمقۇلوۆا.

ەندى، زاڭسىز لوتەرەيا وتكىزگەنى ءۇشىن ءىرى كولەمدە ايىپپۇل سالىنادى. ءبىرىنشى رەت زاڭ بۇزسا، ەسكەرتۋ جاسالادى. ەگەر ءبىر جىلدىڭ ىشىندە زاڭ بۇزۋشىلىق قايتالانسا، اكىمشىلىك ايىپپۇل سالىنادى.

ايىپپۇلدىڭ كولەمى:

• جەكە تۇلعالار ءۇشىن - 200 اەك (530 200 تەڭگە);
• شاعىن بيزنەس سۋبەكتىلەرى مەن كوممەرتسيالىق ەمەس بىرلەستىكتەر ءۇشىن - 700 اەك (1 855 700 تەڭگە);
• ورتا بيزنەس ءۇشىن - 1000 اەك (2 651 000);
• ءىرى بيزنەس ءۇشىن – 2000 اەك (5 302 000 تەڭگە).

ايتا كەتەيىك، زاڭ جوباسى ەكىنشى وقىلىمنان ءوتۋى كەرەك. ودان كەيىن قۇجات سەناتتا قارالادى. ال، ەڭ سوڭىندا، پرەزيدەنت قول قويۋى ءتيىس.