قىتايداعى قاۋىپتى ىندەت (كوروناۆيرۋس) تاراعان ۋحان قالاسىندا 87 قازاق ستۋدەنتى بار، دەپ حابارلايدى Dalanews.kz
قازاقستاننان كەلگەن ايسۇلتان ۋحان قالاسىنىڭ ۋنيۆەرسيتەتىندە ءبىلىم الادى. قالا كارانتينگە جابىلعالى وسىنداعى قازاق جاستارى ساقتىق شارالارىن قابىلداۋعا ءماجبۇر بولعان.
“بۇگىن قىتاي تەلەارنالارى جاعدايدى باقىلاۋعا الدىق دەپ حابار تاراتتى. الايدا كەشە كەشكىسىن قالاداعى اۋەجاي جابىلىپ قالدى. ءازىر قالاعا كىرۋ دە، شىعۋ دا مۇمكىن ەمەس. ءبىز كارانتين اۋماعىندامىز.
مەترو، قوعامدىق كولىكتىڭ جۇمىسى توقتادى، تەك تاكسي قاتىناپ تۇر. بىراق ونىڭ ءوزى ازدىق ەتۋدە. قالا كارانتينگە جابىلماي تۇرا بىزبەن بىرگە بولعان ءبىرشاما ادام كولىكپەن كورشى قالاعا جەتىپ، ءارى قاراي بەيجىڭگە اتتاندى. وسى ارادان تۋعان جەرىنە تۋرا تارتادى. الايدا ءدال قازىر قالادان شىعۋ مۇمكىن ەمەس”، – دەيدى ايسۇلتان.
ونىڭ ايتۋىنشا اۋرۋدىڭ اسقىنۋىنا قاۋىپتى ىندەتپەن تۇسپا-تۇس كەلگەن قىتاي جاڭا جىلى دا سەبەپشى بولۋى مۇمكىن. سەبەبى بۇل ۋاقىتتا قىتايلىقتار ءبىر-ءبىرىن قۇتتىقتاپ، الىس-جاقىنداعى تۋىس-تۋعاندارىنا ساپارلاپ كەلەدى.
قىتايلىقتار جۇمىسقا الداعى ايدىڭ 6-سى كۇنى شىعادى. ەلدەگى بىرقاتار وقۋ ورىندارى ۆيرۋسقا بايلانىستى دەمالىستى ناۋرىز ايىنا دەيىن سوزعان.
ۆيرۋس جۇقتارعانداردىڭ سانى رەسمي مالىمەتكە قاراعاندا الدەقايدا كوپ دەگەن قاڭقۋ ءسوزدى ۋحان قالاسىنداعى قازاق ستۋدەنتتەرى دە ەستىپتى.
“قالادا قامالىپ قالعان ستۋدەنتتەر جاتاقحانادا باس قوسىپ، كارانتيننىڭ الدىندا قاجەتتى ازىق-تۇلىكپەن قامدانىپ الدىق. قىتاي بيلىگى جاعدايدى باقىلاۋدا ۇستايتىنىن ايتتى. جانىمىزدا شەتەلدىك ستۋدەنتتەردى باقىلايتىن ءبولىم جەتەكشىسى بار.
ۋنيۆەرلەردىڭ كوپشىلىگى كارانتين باستالماي تۇرىپ ءوز ستۋدەنتتەرىن ەلدەرىنە اتتاندىرىپ ۇلگەردى. دارىگەرلەر بىزگە ارنايى ۆيدەولار جىبەرىپ، قاۋىپتى ىندەتتىڭ قالاي تارالاتىنى تۋرالى مالىمەت بەردى. ماسكا ۇلەستىردى.
ۆيرۋس جۇقتىرعان جاعدايدا قايدا حابارلاسۋ كەرەگىن ايتتى. كەيبىر وقۋ ورىندارىنىڭ باسشىلىعى ستۋدەنتتەرگە ارناپ ازىق-تۇلىك جەتكىزىپ بەردى. ازىرگە شىداۋعا بولادى”، – دەيدى ايسۇلتان.
ۋحان قالاسىندا ءبىلىم الاتىن تاعى ءبىر قازاق ستۋدەنتى ارۋجان بەگمانوۆا كەرىسىنشە مۇنداعى احۋالدىڭ ۋشىعىپ تۇرعانىن حابارلادى.
ارۋجان قازاقستان بيلىگى كارانتين ايماعىندا قالعان ستۋدەنتتەردى ەلگە قايتارۋى ءتيىس دەپ ەسەپتەيدى.
“قالاداعى دۇكەن-دۇڭگىرشەكتەردىڭ دەرلىگى جابىلىپ قالدى. ادامدار ازىق-تۇلىكتى تالاپ الىپ كەتتى. ۋحانداعى جاعداي ۋشىعىپ تۇر. تۇماننان تۇك كورىنبەيدى. ءۇيىمدى ساعىندىم. وتباسىم كۇتىپ وتىر. مەن سەكىلدى جۇزدەگەن جاستار ەلىنە قايتقىسى كەلەدى. ۇكىمەتتىڭ بۇعان قاۋقارى جەتەر، قازاقستانعا قايتقىمىز كەلەدى”، – دەپ جازعان ارۋجان ءىnsta پاراقشاسىندا.
ول وسىنداعى قازاق ستۋدەنتتەرىنىڭ امان-ساۋ ەكەنىن، سىرقاتقا شالدىقپاعانىن ايتقان.
“بۇعان كوز جەتكىزگىسى كەلسە بىزدەردى تەكسەرسىن، اۋرۋ انىقتالماسا ەلىمىزگە جىبەرسىن”، – دەيدى ارۋجان.
