Qytaıdaǵy qaýipti indet (koronavırýs) taraǵan Ýhan qalasynda 87 qazaq stýdenti bar, dep habarlaıdy Dalanews.kz
Qazaqstannan kelgen Aısultan Ýhan qalasynyń ýnıversıtetinde bilim alady. Qala karantınge jabylǵaly osyndaǵy qazaq jastary saqtyq sharalaryn qabyldaýǵa májbúr bolǵan.
“Búgin Qytaı telearnalary jaǵdaıdy baqylaýǵa aldyq dep habar taratty. Alaıda keshe keshkisin qaladaǵy áýejaı jabylyp qaldy. Ázir qalaǵa kirý de, shyǵý da múmkin emes. Biz karantın aýmaǵyndamyz.
Metro, qoǵamdyq kóliktiń jumysy toqtady, tek taksı qatynap tur. Biraq onyń ózi azdyq etýde. Qala karantınge jabylmaı tura bizben birge bolǵan birshama adam kólikpen kórshi qalaǵa jetip, ári qaraı Beıjińge attandy. Osy aradan týǵan jerine týra tartady. Alaıda dál qazir qaladan shyǵý múmkin emes”, – deıdi Aısultan.
Onyń aıtýynsha aýrýdyń asqynýyna qaýipti indetpen tuspa-tus kelgen Qytaı jańa jyly da sebepshi bolýy múmkin. Sebebi bul ýaqytta qytaılyqtar bir-birin quttyqtap, alys-jaqyndaǵy týys-týǵandaryna saparlap keledi.
Qytaılyqtar jumysqa aldaǵy aıdyń 6-sy kúni shyǵady. Eldegi birqatar oqý oryndary vırýsqa baılanysty demalysty naýryz aıyna deıin sozǵan.
Vırýs juqtarǵandardyń sany resmı málimetke qaraǵanda áldeqaıda kóp degen qańqý sózdi Ýhan qalasyndaǵy qazaq stýdentteri de estipti.
“Qalada qamalyp qalǵan stýdentter jataqhanada bas qosyp, karantınniń aldynda qajetti azyq-túlikpen qamdanyp aldyq. Qytaı bıligi jaǵdaıdy baqylaýda ustaıtynyn aıtty. Janymyzda sheteldik stýdentterdi baqylaıtyn bólim jetekshisi bar.
Ýnıverlerdiń kópshiligi karantın bastalmaı turyp óz stýdentterin elderine attandyryp úlgerdi. Dárigerler bizge arnaıy vıdeolar jiberip, qaýipti indettiń qalaı taralatyny týraly málimet berdi. Maska úlestirdi.
Vırýs juqtyrǵan jaǵdaıda qaıda habarlasý keregin aıtty. Keıbir oqý oryndarynyń basshylyǵy stýdentterge arnap azyq-túlik jetkizip berdi. Ázirge shydaýǵa bolady”, – deıdi Aısultan.
Ýhan qalasynda bilim alatyn taǵy bir qazaq stýdenti Arýjan Begmanova kerisinshe mundaǵy ahýaldyń ýshyǵyp turǵanyn habarlady.
Arýjan Qazaqstan bıligi karantın aımaǵynda qalǵan stýdentterdi elge qaıtarýy tıis dep esepteıdi.
“Qaladaǵy dúken-dúńgirshekterdiń derligi jabylyp qaldy. Adamdar azyq-túlikti talap alyp ketti. Ýhandaǵy jaǵdaı ýshyǵyp tur. Tumannan túk kórinbeıdi. Úıimdi saǵyndym. Otbasym kútip otyr. Men sekildi júzdegen jastar eline qaıtqysy keledi. Úkimettiń buǵan qaýqary jeter, Qazaqstanǵa qaıtqymyz keledi”, – dep jazǵan Arýjan Insta paraqshasynda.
Ol osyndaǵy qazaq stýdentteriniń aman-saý ekenin, syrqatqa shaldyqpaǵanyn aıtqan.
“Buǵan kóz jetkizgisi kelse bizderdi teksersin, aýrý anyqtalmasa elimizge jibersin”, – deıdi Arýjan.
