الماتىدا "سەرگەك" باعدارلامالىق-قۇرىلعى كەشەندەرىنىڭ سانىن كوبەيتۋدى جوسپارلاپ وتىر، - دەپ حابارلايدى Tengrinews.kz .
بۇل تۋرالى قالا اكىمى باقىتجان ساعىنتاەۆ ايتتى. قالا باسشىسىنىڭ ايتۋىنشا، العاشقى 22 كۇندە جاڭا كامەرالار 4,5 مىڭ جول كوزعالىسى ەرەجەسىن بۇزۋ دەرەكتەرىن تۇسىرگەن. ساعىنتاەۆتىڭ ايتۋىنشا، وسى ارالىقتا جول-كولىك وقيعاسىنىڭ سانى 12 پايىزعا تومەندەگەن. ونىڭ ايتۋىنشا، وتكەن جىلمەن سالىستىرعاندا قىلمىس 38 پايىزعا ازايعان.
"قوعامدىق قاۋىپسىزدىكتى قامتاماسىز ەتۋ جۇمىستارى، سونىڭ ىشىندە جولدار مەن تۇرعىندار كوپ جينالاتىن جەرلەردە ۆيدەومونيتورينگ جۇيەسىن كەڭىنەن قولدانۋ ارقىلى جالعاسادى. بيىل قوسىمشا 360-تان اسا "سەرگەك" كامەرالارىن ورناتۋدى جوسپارلاپ وتىرمىز. جىل سايىن قۇقىقتىق ءتارتىپتى بۇزۋدى قاداعالايتىن اۆتوماتتى بەينە جۇيەلەرىنىڭ ۇلەسى ءوسىپ وتىراتىن بولادى", - دەدى ساعىنتاەۆ.
قازىرگى ۋاقىتتا قالادا "سەرگەك" باعدارلامالىق-قۇرىلعى كەشەنىنىڭ 400 جۇيەسى جۇمىس ىستەيدى. العاشقى سەگىز كۇن ىشىندە كامەرالار 42 ميلليون تەڭگەگە جول ەرەجەسىن بۇزۋ دەرەكتەرىن انىقتاعان. ولاردىڭ قانداي قيىلىستاردا ورنالاسقانى تۋرالى مىنا جەردەن بىلە الاسىز.
"سەرگەك" جىلدامدىق رەجيمىن اسىرۋ، باعدارشامنىڭ قىزىل تۇسىنە ءوتۋ، جول بەلگىلەرىن ەلەمەۋ، جولاقتاردى ەلەمەۋ، كولىك قۇرالدارىن توقتاتۋ نەمەسە تۇراققا قويۋ ەرەجەسىن بۇزۋ، سونداي-اق قوعامدىق كولىك جولاعىنا رۇقساتسىز كىرۋدى تىركەيدى. پوليتسيا وكىلدەرى ايىپپۇلداردىڭ بارلىعى قالا بيۋدجەتىنە تۇسەتىنىن اتاپ ءوتتى.
