تاعى ءبىر اكىم قاماۋعا الىندى

2670
سىبايلاس جەمقورلىق جاسادى دەگەن كۇدىككە ءۇش ادام – الاتاۋ اۋدانىنىڭ ەكس-اكىمى، ونىڭ ورىنباسارى جانە مادەنيەت ءبولىمىنىڭ باسشىسى ءىلىندى

الماتىدا الاتاۋ اۋدانى اكىمدىگىنىڭ ءۇش قىزمەتكەرى پارا الدى جانە بيۋدجەت قارجىسىن جىمقىردى دەگەن كۇدىكپەن ۇستالدى.

"الماتى قالاسى الاتاۋ اۋدانىنىڭ ەكس-اكىمى، ونىڭ ورىنباسارى، سونداي-اق وسى اۋدان اكىمى اپپاراتىنىڭ مادەنيەت جانە تىلدەردى دامىتۋ ءبولىمىنىڭ باسشىسى سىبايلاس جەمقورلىق قىلمىسىن جاسادى دەگەن كۇدىككە ءىلىندى", - دەلىنگەن سىبايلاس جەمقورلىققا قارسى قىزمەت تاراتقان حابارلامادا.

ولارعا 2019 جىلى وڭىرلەردى دامىتۋدىڭ 2020 جىلعا دەيىنگى مەملەكەتتىك باعدارلاماسى بويىنشا بولىنگەن بيۋدجەت قاراجاتىن ءىرى كولەمدە جىمقىردى دەگەن ايىپ تاعىلىپ وتىر.

سونىمەن قاتار، تەرگەۋ مەردىگەر ۇيىمنىڭ وكىلىنەن بانك كارتاسىنا جارتى ميلليون تەڭگە پارا الۋ فاكتىسى بويىنشا تەكسەرىس جۇرگىزىپ جاتىر. سىبايلاس جەمقورلىققا قارسى قىزمەتتىڭ مالىمەتى بويىنشا، پارا بەرۋشى شەنەۋنىكتەردەن ءىس جۇزىندە ورىندالماعان جۇمىستاردىڭ اتقارىلعانى تۋرالى اكتىلەرگە جالعان جازبا جاساۋدى سۇراعان.

قازىرگى ۋاقىتتا اۋدان باسشىسى مەن ونىڭ ورىنباسارى ۇستالىپ، ۋاقىتشا ۇستاۋ اباقتىسىنا قامالدى. بۇلتارتپاۋ شاراسىن تاڭداۋ تۋرالى ماسەلە شەشىلۋدە.

اكىمدىكتىڭ مادەنيەت ءبولىمىنىڭ باسشىسى كىناسىن مويىنداۋىنا بايلانىستى پروتسەسسۋالدىق قاماۋعا الىنباعان.

كۇدىكتىلەردىڭ كىناسىنىڭ دەڭگەيى تۋرالى تۇپكىلىكتى شەشىمدى سوت قابىلدايدى.

2017 جىلدىڭ 10 شىلدەسىنەن باستاپ الاتاۋ اۋدانىنىڭ باسشىسى قىزمەتىن شاحمەردەن رىسپاەۆ اتقاردى. دەگەنمەن، 17 قاڭتار كۇنى كەشكە بۇل قىزمەتكە ازامات قالدىبەكوۆ تاعايىندالدى. شەشىم پرەزيدەنت اكىمشىلىگىمەن جانە دەپۋتاتتارمەن كەلىسىلدى.

 

پىكىرلەر
رەداكتسيا تاڭداۋى