"بەلسەندى گالينا ارزاماسوۆاعا وق اتۋ" ءىسى بويىنشا ايىپتالعان پانفيلوۆ اۋىلدىق وكرۋگىنىڭ بۇرىنعى اكىمى نۇرعالي اپپازوۆ قاماۋعا الىندى. بۇل اقپاراتتى ازاتتىق تىلشىسىنە جابىرلەنۋشى گالينا ارزاماسوۆا حابارلادى.
- بۇگىن جەمقورلىقپەن كۇرەس ءىس-قيمىل اگەنتتىگىنىڭ ىشكى قاۋىپسىزدىك اپپاراتى دەپارتامەنتىنىڭ جەتەكشىسى مۇرات قارىمساقوۆ حابارلاسىپ، مەنىڭ ءوتىنىشىم بويىنشا اپپازوۆتىڭ ۋاقىتشا قاماۋ يزولياتورىنا قامالعانىن ايتتى. ەندى سوت بولادى، ونى قانشا ۋاقىتقا قامايتىنىن شەشۋى ءتيىس، - دەدى گالينا ارزاماسوۆا 16 قاڭتاردا.
14 قاڭتاردا بولعان سوت وتىرىسى كەزىندە ايىپتاۋ اكتىسى وقىلىپ, وندا اپپازوۆتىڭ اۋىل باسشىلىعىن سىناپ جۇرگەن بەلسەندىگە شابۋىل جاساۋعا تاپسىرىس بەرگەنى ايتىلعان ەدى. ايىپتاۋ تارابىنىڭ ايتۋىنشا، بۇرىنعى اكىم جۇرگىزۋشىسىنە (بۇل ءىس بويىنشا ەكىنشى ايىپتالۋشى) پنەۆماتيكالىق مىلتىقپەن بەلسەندىنىڭ وڭ جاق جامباس تۇسىنا وق اتۋدى بۇيىرعان. بۇعان قوسا، بەلسەندىنىڭ اۋلاسىنا جانارماي تولعان اينەك بوتەلكەسىن لاقتىرىپ، بەلگىسىز تاپانشامەن بىرنەشە وق اتۋىن سۇراعان.
اپپازوۆ پەن سمانوۆ تا ايىپتاۋ اكتىسىمەن تولىق كەلىسپەدى. ولار ونىڭ الدىندا "تەرگەۋ دۇرىس جۇرمەدى" دەپ ايتقان.
جەمقورلىقپەن كۇرەس ءىس-قيمىل اگەنتتىگىنىڭ ءباسپاسوز قىزمەتى 16 قاڭتاردا تاڭەرتەڭ اپپازوۆتىڭ قامالۋىنا بايلانىستى "اقپاراتى جوعىن" ايتتى.
ارزاماسوۆانىڭ ايتۋىنشا، "وق اتۋ وقيعاسىنان" بولەك، بۇعان دەيىن وزىنە جاسالعان بۇرىنعى شابۋىلدار بويىنشا دا ءىس قوزعالىپ، بىراق سوڭى "سيىرقۇيىمشاقتانىپ" كەتكەن. ولاردىڭ ءبارى ءبىر وندىرىسكە بىرىكتىرىلمەگەن. ول "ۇيىمداسقان قىلمىستىق قاۋىمداستىقتىڭ بۇعان قاتىسى بولعاندىقتان بۇل ءىستىڭ بىرىككەنىن قالامايتىن" توپتار بار دەپ توپشىلايدى.
تالعار اۋدانىنداعى قارابۇلاق اۋىلىنىڭ تۇرعىنى، بەلسەندى گالينا ارزاماسوۆا 26 تامىزدا اۋداندىق اكىمدىك الدىندا وزىنە بەلگىسىز بىرەۋلەردىڭ "پنەۆماتيكالىق قارۋدان اتقان وعى جامباس سۇيەگىنە تيگەنى" تۋرالى ازاتتىققا حابارلاعان ەدى. ول تالعار اۋدانى اكىمىنىڭ قابىلداۋىنا قارابۇلاقتاعى مەكتەپ ماڭىنداعى جەردىڭ جەكەمەنشىككە بەرىلگەنىن، جەردى العان ادام ءۇي سالماق بوپ جاتقانىن ايتۋعا كەلگەن. العان جاراقاتىنا قاراماستان ول اۋدان اكىمىنە كىرىپ، ماسەلەلەرىن جەتكىزگەن. كەيىنىرەك اۋرۋحاناعا تۇسكەن. وسى وقيعادان سوڭ اۋداندىق اكىمدىك قارابۇلاقتاعى مەكتەپ ماڭىنداعى جەردىڭ قالاي ساتىلىپ كەتكەنىن تەكسەرە باستاعان.
كەيىن قارابۇلاق اۋىلى قارايتىن پانفيلوۆ اۋىلدىق وكرۋگىنىڭ اكىمى نۇرعالي اپپازوۆ پەن جۇرگىزۋشىسى كۇدىكتى رەتىندە ۇستالعان. ولار تەرگەۋ باستالعاندا ەكى ايعا قامالىپ، كەيىن كەپىلمەن بوساپ شىققان ەدى.
"ازاتتىق" راديوسى
فوتو مانشۇك اساۋتاي
