"Belsendi Galına Arzamasovaǵa oq atý" isi boıynsha aıyptalǵan Panfılov aýyldyq okrýginiń burynǵy ákimi Nurǵalı Appazov qamaýǵa alyndy. Bul aqparatty Azattyq tilshisine jábirlenýshi Galına Arzamasova habarlady.
- Búgin jemqorlyqpen kúres is-qımyl agenttiginiń ishki qaýipsizdik apparaty departamentiniń jetekshisi Murat Qarymsaqov habarlasyp, meniń ótinishim boıynsha Appazovtyń ýaqytsha qamaý ızolıatoryna qamalǵanyn aıtty. Endi sot bolady, ony qansha ýaqytqa qamaıtynyn sheshýi tıis, - dedi Galına Arzamasova 16 qańtarda.
14 qańtarda bolǵan sot otyrysy kezinde aıyptaý aktisi oqylyp, onda Appazovtyń aýyl basshylyǵyn synap júrgen belsendige shabýyl jasaýǵa tapsyrys bergeni aıtylǵan edi. Aıyptaý tarabynyń aıtýynsha, burynǵy ákim júrgizýshisine (bul is boıynsha ekinshi aıyptalýshy) pnevmatıkalyq myltyqpen belsendiniń oń jaq jambas tusyna oq atýdy buıyrǵan. Buǵan qosa, belsendiniń aýlasyna janarmaı tolǵan áınek bótelkesin laqtyryp, belgisiz tapanshamen birneshe oq atýyn suraǵan.
Appazov pen Smanov ta aıyptaý aktisimen tolyq kelispedi. Olar onyń aldynda "tergeý durys júrmedi" dep aıtqan.
Jemqorlyqpen kúres is-qımyl agenttiginiń baspasóz qyzmeti 16 qańtarda tańerteń Appazovtyń qamalýyna baılanysty "aqparaty joǵyn" aıtty.
Arzamasovanyń aıtýynsha, "oq atý oqıǵasynan" bólek, buǵan deıin ózine jasalǵan burynǵy shabýyldar boıynsha da is qozǵalyp, biraq sońy "sıyrquıymshaqtanyp" ketken. Olardyń bári bir óndiriske biriktirilmegen. Ol "uıymdasqan qylmystyq qaýymdastyqtyń buǵan qatysy bolǵandyqtan bul istiń birikkenin qalamaıtyn" toptar bar dep topshylaıdy.
Talǵar aýdanyndaǵy Qarabulaq aýylynyń turǵyny, belsendi Galına Arzamasova 26 tamyzda aýdandyq ákimdik aldynda ózine belgisiz bireýlerdiń "pnevmatıkalyq qarýdan atqan oǵy jambas súıegine tıgeni" týraly Azattyqqa habarlaǵan edi. Ol Talǵar aýdany ákiminiń qabyldaýyna Qarabulaqtaǵy mektep mańyndaǵy jerdiń jekemenshikke berilgenin, jerdi alǵan adam úı salmaq bop jatqanyn aıtýǵa kelgen. Alǵan jaraqatyna qaramastan ol aýdan ákimine kirip, máselelerin jetkizgen. Keıinirek aýrýhanaǵa túsken. Osy oqıǵadan soń aýdandyq ákimdik Qarabulaqtaǵy mektep mańyndaǵy jerdiń qalaı satylyp ketkenin teksere bastaǵan.
Keıin Qarabulaq aýyly qaraıtyn Panfılov aýyldyq okrýginiń ákimi Nurǵalı Appazov pen júrgizýshisi kúdikti retinde ustalǵan. Olar tergeý bastalǵanda eki aıǵa qamalyp, keıin kepilmen bosap shyqqan edi.
"Azattyq" radıosy
Foto Mánshúk Asaýtaı
