قازاقستان قورعانىس مينيسترلىگى اقتوبە وبلىسىندا رەسەيلىك زىمىران بولشەگى قۇلاعانىن راستادى.
"9 قاڭتاردا رەسەيدىڭ قورعانىس مينيسترلىگى سىناق ورتالىعىنىڭ جوسپارلى وقۋ-جاتتىعۋى كەزىندە ءبىر زىمىراننىڭ بولشەگى بەلگىلەنگەن ورىننان تىس جەرگە قۇلادى. قازاقستان مەن رەسەي اراسىنداعى 1995 جىلعى مەملەكەتارالىق كەلىسىمگە سايكەس، رەسەي قازاقستان اۋماعىنان پوليگونعا جالعا جەر العان. جارىلىس بولعان جوق" دەلىنگەن مينيسترلىك حابارلاماسىندا.
مينيسترلىكتىڭ حابارلاۋىنشا، وقيعادان ەشكىم زارداپ شەكپەگەن. تۇرعىندارعا بولشەكتىڭ قاۋپى جوق. وقيعا ورنىندا پوليتسيا جانە توتەنشە جاعداي ماماندارى جۇمىس ىستەپ جاتىر.
"وسى كەلىسىمگە سايكەس اقتوبە وبلىسىنىڭ اكىمدىگى جانىنداعى قازاقستان-رەسەي كوميسسياسى ءمان-جايدى جانە سەبەپتەرىن انىقتايدى" دەلىنگەن مينيسترلىك حابارلاماسىندا.
9 قاڭتاردا تۇسكى ساعات 14:30 شاماسىندا اقتوبە وبلىسى بايعانين اۋدانى نوعايتى اۋىلىنان ەكى-ءۇش شاقىرىم جەردە اۋىل مەن زيرات اراسىنا اۋەدەن بەلگىسىز تەمىر بولشەگى قۇلاعان. تۇرعىنداردىڭ ايتۋىنشا، اۋداننان كەلگەن كوميسسيا ول ماڭدى قورشاپ، ەشكىمدى جولاتپاي قويعان.
جەرگىلىكتى بيلىك سول كۇنى تەمىر بولشەك قۇلاعانىن راستاعانمەن وقيعاعا بايلانىستى تۇسىنىكتەمە بەرمەدى. قورعانىس مينيسترلىگىنىڭ حابارلاماسى وقيعادان شامامەن ەكى كۇن وتكەننەن كەيىن جاريالانىپ وتىر.
الەۋمەتتىك جەلىدە تاراعان سۋرەتتەردە تەمىر بولشەكتىڭ قۇلاعاننان كەيىن دە جانىپ جاتقانى كورىنەدى.
كەيبىر اۋىل تۇرعىندارىنىڭ سوزىنە سۇيەنگەن Vesti.kg سايتىنىڭ جازۋىنشا، تەمىر بولشەكتىڭ قۇلاعانىن تەلەفونىنا ءتۇسىرىپ العان تۇرعىنداردى سول سۋرەتتەر مەن ۆيدەولاردى وشىرۋگە ماجبۇرلەگەن. قازاقستاندىق ينتەرنەت-پورتالداردىڭ ءبىرى "تەمىر بولشەكتىڭ قۇلاعانى" تۋرالى اقپاراتتى ءوشىرىپ تاستاعان.
وسىعان ۇقساس وقيعا 2018 جىلى شىلدە ايىندا باتىس قازاقستان وبلىسىندا بولعان. 4 شىلدەدە قاراسۋ جانە جۇلدىز اۋىلىنىڭ ورتاسىنداعى دالادا اسپاننان بەلگىسىز وبەكت قۇلاعان. وبەكت قۇلاعان ماڭدا ءورت بولىپ، ونى توتەنشە جاعداي ماماندارى وشىرگەن. كەيىننەن جەرگىلىكتى بيلىك بەلگىسىز زاتتىڭ رەسەيلىك زىمىران بولشەگى ەكەنىن ايتقان. جەرگىلىكتى ەكولوگتار بۇل بقو-عا جاقىن رەسەيدىڭ استراحان وبلىسىنداعى كاپۋستين يار سىناق الاڭىنان شىققان زىمىران قالدىعى دەگەن. مۇنداي وقيعالار قازاقستاننىڭ باتىس وڭىرىندە "سيرەك قۇبىلىس" ەمەس.
"ازاتتىق" راديوسى
