Qorǵanys mınıstrligi Aqtóbe oblysynda reseılik zymyran bólshegi qulaǵanyn rastady

2928
Adyrna.kz Telegram
Aqtóbe oblysy Baıǵanın aýdany Noǵaıty aýylyna jaqyn jerge áýeden qulaǵan belgisiz zat. 9 qańtar 2020 jyl. Azattyqqa jergilikti turǵyndar joldaǵan sýret.

Qazaqstan qorǵanys mınıstrligi Aqtóbe oblysynda reseılik zymyran bólshegi qulaǵanyn rastady.

"9 qańtarda Reseıdiń qorǵanys mınıstrligi synaq ortalyǵynyń josparly oqý-jattyǵýy kezinde bir zymyrannyń bólshegi belgilengen orynnan tys jerge qulady. Qazaqstan men Reseı arasyndaǵy 1995 jylǵy memleketaralyq kelisimge sáıkes, Reseı Qazaqstan aýmaǵynan polıgonǵa jalǵa jer alǵan. Jarylys bolǵan joq" delingen mınıstrlik habarlamasynda.

Mınıstrliktiń habarlaýynsha, oqıǵadan eshkim zardap shekpegen. Turǵyndarǵa bólshektiń qaýpi joq. Oqıǵa ornynda polıııa jáne tótenshe jaǵdaı mamandary jumys istep jatyr.

"Osy kelisimge sáıkes Aqtóbe oblysynyń ákimdigi janyndaǵy Qazaqstan-Reseı komıssııasy mán-jaıdy jáne sebepterin anyqtaıdy" delingen mınıstrlik habarlamasynda.

9 qańtarda túski saǵat 14:30 shamasynda Aqtóbe oblysy Baıǵanın aýdany Noǵaıty aýylynan eki-úsh shaqyrym jerde aýyl men zırat arasyna áýeden belgisiz temir bólshegi qulaǵan. Turǵyndardyń aıtýynsha, aýdannan kelgen komıssııa ol mańdy qorshap, eshkimdi jolatpaı qoıǵan.

Jergilikti bılik sol kúni temir bólshek qulaǵanyn rastaǵanmen oqıǵaǵa baılanysty túsinikteme bermedi. Qorǵanys mınıstrliginiń habarlamasy oqıǵadan shamamen eki kún ótkennen keıin jarııalanyp otyr.

Áleýmettik jelide taraǵan sýretterde temir bólshektiń qulaǵannan keıin de janyp jatqany kórinedi.

Keıbir aýyl turǵyndarynyń sózine súıengen Vesti.kg saıtynyń jazýynsha, temir bólshektiń qulaǵanyn telefonyna túsirip alǵan turǵyndardy sol sýretter men vıdeolardy óshirýge májbúrlegen. Qazaqstandyq ınternet-portaldardyń biri "temir bólshektiń qulaǵany" týraly aqparatty óshirip tastaǵan.

Osyǵan uqsas oqıǵa 2018 jyly shilde aıynda Batys Qazaqstan oblysynda bolǵan. 4 shildede Qarasý jáne Juldyz aýylynyń ortasyndaǵy dalada aspannan belgisiz obekt qulaǵan. Obekt qulaǵan mańda órt bolyp, ony tótenshe jaǵdaı mamandary óshirgen. Keıinnen jergilikti bılik belgisiz zattyń reseılik zymyran bólshegi ekenin aıtqan. Jergilikti ekologtar bul BQO-ǵa jaqyn Reseıdiń Astrahan oblysyndaǵy Kapýstın Iar synaq alańynan shyqqan zymyran qaldyǵy degen. Mundaı oqıǵalar Qazaqstannyń batys óńirinde "sırek qubylys" emes.

"Azattyq" radıosy

Pikirler