بۇگىن Bek Air اۋە كومپانياسىنىڭ باسشىلىعى Fokker-100 ۇشاعىنىڭ الماتى اۋەجايىنىڭ ماڭىنداعى اپاتى جايلى ءباسپاسوز ءماسليحاتىن وتكىزدى.
كومپانيانىڭ ۇشۋ قىزمەتىنىڭ ديرەكتورى ەرىك ساپاروۆتىڭ ايتۋىنشا، Bek Air اۋە كومپانياسىنا تيەسىلى Fokker-100 ۇشاعى جەڭىل سالماقتى ۇشاق ساناتىنا جاتادى. ونىڭ سوزىنشە، جەڭىل ۇشاقتىڭ اپاتقا ۇشىراۋىنا ءبىر مينۋت بۇرىن ۇشقان اۋىر سالماقتى Airbus ۇشاعىنىڭ اۋە تولقىنى اسەر ەتۋى، ۇشاقتى باسقارۋدى كۇرت قيىنداتقان بولۋى مۇمكىن.
ەرىك ساپاروۆتىڭ سوزىنشە، ۇشاقتار كەم دەگەندە ەكى-ءۇش مينۋت ينتەرۆالمەن ۇشۋى ءتيىس. اپاتقا ۇشىراعان Fokker-100 ۇشاعىنىڭ ۇشۋ تراەكتورياسىن كورسەتكەن ول "ەكيپاج كومانديرى سوڭعى ساتكە دەيىن ۇشاقتى قۇتقارىپ قالۋعا تىرىسقان" دەپ باعالادى.
Bek Air كومپانياسىنىڭ ۇشقىش ينسترۋكتورى الەكساندر كولەسنيكوۆتىڭ سوزىنشە، اپاتقا ۇشىراعان ۇشاقتىڭ تەحنيكالىق جاعدايى جاقسى بولعان.
- اپاتقا ۇشىراسا دا ورتەنبەگەنى سونىڭ بەلگىسى. قۇتقارۋ قىزمەتى 4 توننادان استام بەنزين سورىپ العان. ساپاسىز ۇشاق بولسا جارىلىپ كەتەر ەدى. ۇشۋعا جارامدىلىعى جايلى سەرتيفيكاتى بار. ول سەرتيفيكاتى بولماسا، ازاماتتىق اۆياتسيا كوميتەتى ۇشۋعا رۇقسات بەرمەيدى،- دەيدى ول.
27 جەلتوقساندا تاڭەرتەڭ Bek Air اۋە كومپانياسىنىڭ Fokker-100 ۇشاعى الماتى اۋەجايىنا جاقىن جەرگە قۇلاعان. ۇشاقتا 93 جولاۋشى جانە ەكيپاجدىڭ بەس مۇشەسى بولعان. 12 ادام قازا تاۋىپ، ونداعان جولاۋشى اۋرۋحاناعا تۇسكەن.
ىشكى ىستەر ءمينيسترى ەرلان تۇرعىمباەۆ ۇكىمەت وتىرىسى كەزىندە Bek Air اۋە كومپانياسىنا تيەسىلى Fokker-100 ۇشاعىنىڭ الماتى اۋەجايىنا تاياۋ ماڭداعى اپاتىنا ءۇش جايتتىڭ ءبىرى سەبەپ بولۋى مۇمكىن: ءبىرىنشى - ەكيپاجدىڭ قاتەسى، ەكىنشى - ۇشاقتىڭ تەحنيكالىق اقاۋى، ءۇشىنشى - ناۆيگاتسيا قىزمەتىنىڭ جۇمىسى دەگەن بولاتىن.
سونىمەن قاتار، مينيستر اپاتقا ۇشىراعان ۇشاقتىڭ ورتەنبەي قالۋىنا اۋا-رايى دە اسەر ەتتى دەگەن پىكىر ايتقان.
قازاقستاندا 28 جەلتوقسان جالپىۇلتتىق ازا تۇتۋ كۇنى بولىپ جاريالانعان. سەنبى كۇنى كەيبىر قالادا تۇرعىندار ۇشاق اپاتىنان قازا بولعاندار تاعزىم ەتتى.
پرەمەر-مينيستر اسقار مامين اپاتتان قازا بولعانداردىڭ وتباسىنا ءتورت ميلليون تەڭگەدەن (شامامەن 10,5 مىڭ دوللار) تولەنەتىنىن ايتتى. Bek Air كومپانياسىنا بەرىلگەن ليتسەنزيا ۋاقىتشا توقتاتىلدى.
"ازاتتىق" راديوسى
