بەلگيا سوتى قازاقستاننان 540 ميلليون دوللار وتەماقى ءوندىرىپ الۋ تۋرالى مولدوۆالىق وليگارح، Ascom Group SA كومپانياسىنىڭ باس ديرەكتورى اناتول ءستاتيدىڭ ءوتىنىشىن قاناعاتتاندىردى. بۇل اقپاراتتى Cision سايتى حابارلادى.
"بريۋسسەلدىڭ ءبىرىنشى ينستانتسيالىق سوتى قازاقستاننان 540 ميلليون دوللار ءوندىرىپ الۋ تۋرالى اربيتراج سوتىنىڭ شەشىمىن مويىنداپ، ونى ورىنداۋدى بۇيىردى. بۇل ءىس بويىنشا Ascom Group SA كومپانياسىنىڭ قارسىلاسى - قازاقستان" دەلىنگەن كومپانيا تاراتقان ءباسپاسوز حابارلاماسىندا.
بريۋسسەل سوتىنىڭ 34 بەتتەن قۇرالعان سوت قاۋلىسىندا شەشىمگە قارسىلىق تانىتقان قازاقستان تارابىنىڭ بارلىق وتىنىشتەرىنىڭ قابىلدانباعانى جازىلعان. ءبىر كۇن بۇرىن ليۋكسەمبۋرگتىڭ اپەللياتسيالىق سوتى وسىعان ۇقساس شەشىم شىعارىپ، قازاقستاننىڭ وتىنىشتەرىن قاناعاتتاندىرماعان.
قازاقستان ادىلەت مينيسترلىگى بريۋسسەل سوتىنىڭ شەشىمىمەن كەلىسپەيتىنىن، اپەللياتسيالىق شاعىم تۇسىرەتىنىن حابارلادى.
مولدوۆالىق بيزنەسمەن ستاتي مەن قازاقستان بيلىگى اراسىنداعى سوت بىرنەشە جىلدان بەرى جالعاسىپ كەلەدى. قازاقستاننىڭ مۇناي سالاسىنا ينۆەستيتسيا سالعان اناتول ستاتي مەن ونىڭ ۇلى گابريەل ستاتي قازاقستاننىڭ مەملەكەتتىك ورگاندارى ءوزىن "ينۆەستيتسياسىن تىم ارزانعا ساتۋعا ماجبۇرلەۋ ءۇشىن قىسپاققا العانىن" ايتادى.
بۇل ءىس بويىنشا نەگىزگى شەشىمدى 2013 جىلى جەلتوقساندا شۆەتسيانىڭ اربيتراج سوتى شىعارعان. شۆەتسيا سوتى قازاقستان ينۆەستورلار الدىنداعى حالىقارالىق مىندەتتەمەلەرىن بۇزدى دەپ تانىپ، ستاتيگە 500 ميلليون دوللار كولەمىندە ءوندىرىپ بەرۋ تۋرالى شەشىم شىعارعان. كەيىنىرەك نۇر-سۇلتان بۇل ايىپتاۋدى تەرىستەپ، ءستاتيدى "الاياقتىق جاسادى" دەپ ايىپتادى.
سودان بەرى ستاتي بىرنەشە مەملەكەتتە سوت شەشىمىن كۇشپەن ورىنداتۋعا كۇش سالىپ كەلەدى. 2017 جىلى جەلتوقساندا New York Mellon بانكى اناتول ءستاتيدىڭ قازاقستان ۇكىمەتىنە قارسى ارىزى بويىنشا قازاقستان ۇلتتىق قورىنىڭ 22 ميلليارد دوللار قارجىسىن بۇعاتتاعانى جاريا بولعان.
بيىل مامىردا نيدەرلاند سوتى قۇنى 5,2 ميلليارد دوللار تۇراتىن نيدەرلاندتىڭ KMG Kashagan B.V. كومپانياسىنداعى "سامۇرىق-قازىنا" مەملەكەتتىك قورى اكتسيالارىنا سالىنعان تىيىمدى كۇشىندە قالدىردى. بۇل اكتسيالارعا قازاقستان ۇكىمەتى مەن اناتول ستاتي اراسىنداعى داۋ اياسىندا تىيىم سالىنعان ەدى.
"ازاتتىق" راديوسى
