بۇگىندە ەلىمىزدەگى ەڭ وتكىر ماسەلەنىڭ ءبىرى باسپانا ماسەلەسى ەكەنى ايتپاسا دا تۇسىنكتى ءجايت. وسىعان وراي ۇكىمەت قاراپايىم حالىقتى باسپانامەن قامتيتىن كەشەندى باعدارلامالار جاساپ، حالىققا ۇسىنۋدا.
قازىرگى تاڭدا جامبىل وبلىسىندا «باقىتتى وتباسى» باعدارلاماسى اياسىندا وبلىس بويىنشا 2 ميلليارد 902 ميلليونعا جۋىق تەڭگە سوماسىندا 338 ءوتىنىش قابىلدانعان. قابىلدانعان قۇجاتتار ىشىندە 258 وتباسى جالپى 2 ميلليارد 234 ميلليوننان استام تەڭگەمەن نەسيەلەندىرىلىپ، باسپاناعا يە بولىپ ۇلگەردى. وبلىستىق قۇرىلىس باسقارماسىنىڭ باسشىسى جايىقباي شالداروۆ 80 وتباسى ءۇشىن 680 ميلليونعا جۋىق تەڭگەنىڭ يپوتەكالىق نەسيەسى راسىمدەلىپ جاتقانىن مالىمدەدى.
«ەلىمىزدە اعىمداعى جىلدىڭ شىلدە ايىنان باستاپ – «نۇرلى جەر» باعدارلاماسى اياسىندا «باقىتتى وتباسى» بيۋدجەتتىك نەسيەلەندىرۋ باعدارلاماسى ىسكە قوسىلعانى بەلگىلى. ايتا كەتۋ كەرەك، اتالعان باعدارلاماعا تەك قانا 3 سانات بويىنشا الەۋمەتتىك از قامتىلعان، ياعني 4 جانە ودان دا كوپ بالاسى بار، مۇمكىندىگى شەكتەۋلى بالا اسىراپ وتىرعان جانە تولىق ەمەس وتباسىلار قاتىسا الادى. تاراز قالاسى بويىنشا جالپى تۇرعىن ءۇي كەزەگىندە تۇرعان 18 مىڭ 565 ازاماتتىڭ 1794-ءى وسى ساناتتاعىلار. جالپى، تۇرعىن ءۇي كەزەگىنە تىركەلمەگەن ازاماتتارعا جولداما بەرىلمەيدى. نەگىزىنەن، رەسپۋبليكا بويىنشا بۇل باعدارلاماعا 50 ميلليارد تەڭگە قارجى بولىنگەن. سونىڭ ىشىندە ءبىزدىڭ وبلىسقا تيەسىلىسى 3 ميلليارد تەڭگە كولەمىندە. اتالعان باعدارلاما ءۇش جىل بويى جۇزەگە اسىرىلاتىنىن ەسكەرسەك، بۇل ۋاقىت ىشىندە تالاي وتباسىنىڭ باسپانالى بولارى انىق»، - دەيدى جايىقباي شالداروۆ.
باسقارما باسشىسىنىڭ ايتۋىنشا، اتالعان باعدارلاما بويىنشا «تاراز قالاسى اكىمدىگىنىڭ تۇرعىن ءۇي قاتىناستارى ءبولىمى» كوممۋنالدىق مەملەكەتتىك مەكەمەسىنىڭ تاراپىنان تۇعىن ءۇي كەزەگىندە تۇرعان ازاماتتارعا جولداما بەرىلىپ، «قازاقستان تۇرعىن ءۇي جيناق بانكى» وبلىستىق فيليالىنا وتىنىشتەرى تىركەلۋدە.
قالا اۋماعىنان اعىمداعى جىلدىڭ تامىز ايىنان باستاپ كوپبالالى وتباسىلارعا جەكەشەلەندىرۋ قۇقىعىنسىز 142 پاتەر ساتىپ الىنۋ ۇستىندە. سونداي-اق «قاراسۋ» شاعىن اۋدانىندا وبلىس اكىمىنىڭ تاپسىرماسى بويىنشا 180 پاتەرلى ءتورت جاتاقحانا سالىنىپ، كەزەكتە تۇرعان كوپبالالى وتباسىلارعا زاڭ اياسىندا ۇلەستىرىلمەك. ايماقتا اتالعان باعىتتاعى جۇمىستار الداعى جىلدارى جالعاسىن تابادى.
«ادىرنا»
ۇلتتىق پورتالى
