Jambylda «Baqytty otbasy» arqyly 258 otbasy baspanaly boldy

3183
Adyrna.kz Telegram

Búginde elimizdegi eń ótkir máseleniń biri baspana máselesi ekeni aıtpasa da túsinkti jáıt. Osyǵan oraı Úkimet qarapaıym halyqty baspanamen qamtıtyn keshendi baǵdarlamalar jasap, halyqqa usynýda.

Qazirgi tańda Jambyl oblysynda «Baqytty otbasy» baǵdarlamasy aıasynda oblys boıynsha 2 mıllıard 902 mıllıonǵa jýyq teńge somasynda 338 ótinish qabyldanǵan. Qabyldanǵan qujattar ishinde 258 otbasy jalpy 2 mıllıard 234 mıllıonnan astam teńgemen nesıelendirilip, baspanaǵa ıe bolyp úlgerdi. Oblystyq qurylys basqarmasynyń basshysy Jaıyqbaı Shaldarov 80 otbasy úshin 680 mıllıonǵa jýyq teńgeniń ıpotekalyq nesıesi rásimdelip jatqanyn málimdedi.

«Elimizde aǵymdaǵy jyldyń shilde aıynan bastap – «Nurly jer» baǵdarlamasy aıasynda «Baqytty otbasy» bıýdjettik nesıelendirý baǵdarlamasy iske qosylǵany belgili. Aıta ketý kerek, atalǵan baǵdarlamaǵa tek qana 3 sanat boıynsha áleýmettik az qamtylǵan, ıaǵnı 4 jáne odan da kóp balasy bar, múmkindigi shekteýli bala asyrap otyrǵan jáne tolyq emes otbasylar qatysa alady. Taraz qalasy boıynsha jalpy turǵyn úı kezeginde turǵan 18 myń 565 azamattyń 1794-i osy sanattaǵylar. Jalpy, turǵyn úı kezegine tirkelmegen azamattarǵa joldama berilmeıdi. Negizinen, respýblıka boıynsha bul baǵdarlamaǵa 50 mıllıard teńge qarjy bólingen. Sonyń ishinde bizdiń oblysqa tıesilisi 3 mıllıard teńge kóleminde. Atalǵan baǵdarlama úsh jyl boıy júzege asyrylatynyn eskersek, bul ýaqyt ishinde talaı otbasynyń baspanaly bolary anyq», - deıdi Jaıyqbaı Shaldarov.

Basqarma basshysynyń aıtýynsha, atalǵan baǵdarlama boıynsha «Taraz qalasy ákimdiginiń turǵyn úı qatynastary bólimi» kommýnaldyq memlekettik mekemesiniń tarapynan tuǵyn úı kezeginde turǵan azamattarǵa joldama berilip, «Qazaqstan turǵyn úı jınaq banki» oblystyq fılıalyna ótinishteri tirkelýde.

Qala aýmaǵynan aǵymdaǵy jyldyń tamyz aıynan bastap kópbalaly otbasylarǵa jekeshelendirý quqyǵynsyz 142 páter satyp alyný ústinde. Sondaı-aq «Qarasý» shaǵyn aýdanynda oblys ákiminiń tapsyrmasy boıynsha 180 páterli tórt jataqhana salynyp, kezekte turǵan kópbalaly otbasylarǵa zań aıasynda úlestirilmek. Aımaqta atalǵan baǵyttaǵy jumystar aldaǵy jyldary jalǵasyn tabady.

«ADYRNA»

ulttyq portaly

Pikirler