استانادا جاڭادان اشىلعان اسكەري-تاريحي مۋزەيدىڭ ەكسپوزيتسيالارى كوپشىلىك نازارىنا ۇسىنىلدى.
«مۋزەي 1998 جىلى نۇرسۇلتان نازارباەۆتىڭ ساۋلەتتىك يدەياسىمەن سالىنعان عيماراتتا ورنالاسقان. قازاقستان رەسپۋبليكاسى قارۋلى كۇشتەرىنىڭ اسكەري-تاريحي مۋزەيى ورنالاسقان عيمارات جۇمىسىنىڭ جاڭالىعى – ونىڭ كوپفۋنكتسيونالدىعىندا بولىپ وتىر. عيماراتتا مۋزەيدىڭ وزىنەن باسقا كونتسەرت زالى، ۋاقىتشا كورمەلەر زالى بار، سونداي-اق، وندا قازاقستان رەسپۋبليكاسى قورعانىس مينيسترلىگىنىڭ ورتالىق وركەسترى مەن ورتالىق ءانسامبلى جۇمىس جاسايدى»، - دەيدى ۇيىمداستىرۋشىلار.
قازىردىڭ وزىندە مۋزەي قورىندا ەجەلگى كەزەڭنەن بۇگىنگى كۇنگە دەيىنگى قازاق حالقىنىڭ مادەنيەتى مەن اسكەري تاريحىنان سىر شەرتەتىن ەسكەرتكىشتەر، سيرەك كەزدەسەتىن ەكسپوناتتار بار.
مۋزەيدە قازاقستان قارۋلى كۇشتەرىنىڭ زالى، مەرزىمدى كورمەلەر زالى، ەجەلگى ءداۋىر – XIX عاسىر زالى، XX عاسىرداعى اسكەري تاريح زالى، XX-XXI عاسىرلارداعى قارۋ-جاراق زالى، بەينەلەۋ ونەرى زالى، سونداي-اق، «قازاقستان اسكەري ءىسىنىڭ تاريحى» اتريۋمى بار.
اتريۋمدا قورعانىس قابىلەتتىلىگى سالاسىنداعى زامانۋي جەتىستىكتەر مەن وتكەن ءداۋىردى ۇشتاستىراتىن تاريح ساباقتاستىعىن سيپاتتايتىن بارەلەفتەر سەرياسى ۇسىنىلعان. بارەلەفتەر ءارتۇرلى تاريحي داۋىردەگى كوشپەلى قازاق جاۋىنگەرلەرى قارۋ-جاراق تۇرلەرىنىڭ ەرەكشەلىكتەرىن سيپاتتايدى. ەلىمىزدىڭ قازاق باتىرلارى مەن زاماناۋي جاۋىنگەرلەردىڭ ورتاسىنداعى قازاقستان قارۋلى كۇشتەرى جوعارعى باس قولباسشىسى بەينەلەنگەن «ماڭگىلىك ەل» ورتالىق كومپوزيتسياسى داڭقتى داستۇرگە دەگەن ادالدىقتىڭ نىشانى.
قر قارۋلى كۇشتەرى زالىندا «قازاقستان رەسپۋبليكاسى قارۋلى كۇشتەرىنىڭ باس قولباسشىسى ن.ءا. نازارباەۆ» ەكسپوزيتسياسى ورنالاسقان.
مۋزەيدە العاشقى قازاقستاندىق سنارياد، تانك، اسكەري سامولەتتەر مەن ت-72, شابۋىلداۋشى سۋ-25, «تورنادو» كەمەسىنىڭ ماكەتتەرى قويىلعان. مەرزىمدى كورمەلەر زالىنىڭ ەكسپوزيتسياسىنا «امپير» ەليتالىق انتيكۆاريات سالونىنىڭ كوللەكتسياسى قويىلعان.
"ەجەلگى ءداۋىر – XIX عاسىر" زالى قازاق حالقىنىڭ قارۋ جاساۋ شەبەرلىگىنىڭ دامۋ تاريحىن كورسەتەدى. مۇندا قازاقستان اۋماعىنان تابىلعان تاس داۋىرىنەن بەرگى جادىگەرلەر قويىلعان. XX عاسىرداعى اسكەري تاريح زالىندا وتكەن عاسىرداعى قازاقستاننىڭ اسكەري جانە جاۋىنگەرلىك تاريحىنىڭ بارلىق نەگىزگى كەزەڭدەرىمەن بايلانىستى ەكسپوناتتار كورسەتىلەدى. زالدا الاش وردا اۆتونومدى مەملەكەتتىك قۇرىلىمنىڭ قىزمەتى، ۇلى وتان سوعىسى، سونداي-اق قازاقستاندىقتاردىڭ 1979-1989 جىلدارداعى كەڭەس-اۋعان سوعىسىنا قاتىسۋى تۋرالى ارنايى جانە بىرەگەي ەكسپوزيتسيالار بار. ءدال وسى زالدا پروەكتسيالىق جابدىقتاۋ فورماتىندا كەڭەس وداعىنىڭ باتىرلارى، داڭق وردەنىنىڭ كاۆالەرلەرى، 1979-1989 جىلدارداعى كەڭەس-اۋعان سوعىسىنىڭ ينتەرناتسيونال جاۋىنگەرلەرى، سونداي-اق «حالىق قاھارمانى» جوعارى مەملەكەتتىك ناگرادالارىنىڭ يەگەرلەرى تۋرالى اقپارات كورسەتىلەدى. سونىمەن بىرگە مۋزەيگە كەلۋشىلەر رەسەي مۇراعاتىنان الىنعان مۇراعاتتىق قۇجاتتار جينالعان ينتەراكتيۆتى كىتاپپەن تانىسا الادى.
مۋزەي قوناقتارىنىڭ نازارىنا تانىمال 100-ءشى جانە 101-ءشى اتقىشتار بريگادالارىنىڭ قۇرىلۋ تاريحى بويىنشا بىرەگەي قۇجاتتار، ۇلى وتان سوعىسى جىلدارىنداعى فوتوسۋرەتتەر مەن جەكە قۇجاتتار ۇسىنىلعان. قارۋ-جاراق زالىندا XX-XXI عاسىردىڭ قارۋلارى ۇسىنىلعان. ەكسكۋرسيا بارىسىندا مۋزەي قوناقتارى تاپانشادان، اۆتوماتتان، گراناتا اتقىشتان، وقشاشار مەن وق-دارىدەن باستاپ ءارتۇرلى قارۋ-جاراق تۇرلەرىمەن، سونداي-اق XX-XXI عاسىردىڭ اۆياتسيالىق جويۋ قۇرالدارىمەن تانىسا الادى. ۆيترينالاردا ازاماتتىق سوعىس جىلدارى، ۇلى وتان سوعىسى كەزەڭىنە قاتىسى بار قازاقستان رەسپۋبليكاسىنىڭ قارۋلى كۇشتەرى قولدانىپ جۇرگەن تاپانشالار، سپورتتىق قارۋ، وق-دارىلەر، اۆياتسيالىق جويۋ قۇرالدارى، جاياۋ اسكەرگە جانە تانكىگە قارسى مينالار قويىلعان.
مۋزەيدىڭ بەينەلەۋ ونەرى زالىندا كوركەم سۋرەت، گرافيكا جانە مۇسىندەۋ بۇيىمدارى قويىلعان. زالدا وتاندىق سۋرەتشىلەردىڭ ۇلى وتان سوعىسى، ازاماتتىق سوعىس پەن توڭكەرىس كەزەڭى، حالىقتىق ەرەۋىل جەتەكشىلەرىنىڭ بەينەسىن سومداعان تۋىندىلارى بار. گرافيكادا بەينەلەۋ ونەرىنىڭ رەسپۋبليكالىق ۇلتتىق مەكتەبىنىڭ قالىپتاسۋى مەن قۇرىلۋىنا سۇبەلى ۇلەس قوسقان سۋرەتشىلەردىڭ ەڭبەكتەرى ۇسىنىلىپ وتىر. اتاپ ايتقاندا، ولاردىڭ ورىنداۋىنداعى قازاق باتىرلارىن بەينەلەيتىن جۇمىستار قويىلعان، سوعىس پەن اتوم قارۋىنا قارسى تاقىرىپ، قازاقستاندىق ۇشقىشتار، ۇلى وتان سوعىسىنداعى قازاقستاندىق باتىرلار بەينەلەنەدى. مۇسىندەر اراسىندا جامبىل جاباەۆتىڭ، ساق پاتشايىمى توميريس، ۇلى وتان سوعىسىنداعى قازاقتىڭ باتىر قىزدارى مانشۇك مامەتوۆا مەن ءاليا مولداعۇلوۆانىڭ، قولباسشى مارشال كونەۆتىڭ پورترەت-مۇسىندەرى ورناتىلعان.
ايتا وتەيىك، اتالعان مۋزەي 1 جەلتوقسان كۇنى قر تۇڭعىش پرەزيدەنتى كۇنىنە وراي اشىلعان بولاتىن. مۋزەي قورىندا قازىرگى ۋاقىتتا 6 مىڭنان استام ەكسپونات ساقتالعان.
BAQ.KZ
