قاراعاندىدا "درەۆني ريم" مەيرامحاناسىنداعى كىسى ءولىمى بويىنشا سوت ۇكىمى شىقتى

3316
Adyrna.kz Telegram

ايىپتالۋشى 23 جاستاعى يۋسيف نۋرۋلۋدى سوت كىنالى دەپ تانىپ، 19 جىلعا بوستاندىعىنان ايىردى. ۇكىم شىققان كەزدە دەنساۋلىعى ناشارلاعان نۋرۋلۋدىڭ اناسىن دالىزگە اكەتتى. ول ۇلىنىڭ كىناسىزدىگىن ايعايلاپ ايتتى.

قىلمىستىق ءىس بويىنشا بارلىعى 13 ادام سوتتالدى. "بۇزاقىلىق جاسادى" دەپ ايىپتالعان 12 ادامنىڭ تورتەۋىنىڭ ارقايسىسىن 3 جىلعا باس بوستاندىعىنان ايىردى. التى ايىپتالۋشىنىڭ بوستاندىقتارى ءتورت جارىم جىلدان شەكتەلدى. جابىرلەنۋشى تاراپپەن بىتىمگە كەلگەن ەكى ادام قىلمىستىق جاۋاپكەرشىلىكتەن بوساتىلدى. سوتتالعان ءتورت ادام، ۇشەۋى ارمەنيا، بىرەۋى وزبەكستان ازاماتى جازاسىن وتەگەننەن كەيىن قازاقستان اۋماعىنان شىعارىلاتىن بولدى جانە ءارى قاراي بەس جىل بويىنا قازاقستانعا كەلۋگە تىيىم سالىندى.

تەرگەۋ مەن سوت پوتسەسى كەزىندە كەپىلمەن بوستاندىقتا جۇرگەن ايىپتالۋشى شش. يليانى سوت زالىنان قاماۋعا الۋ تۋرالى شەشىم شىعاردى. ۇكىم ساتىنە قاتىسپاعان شش. يلياعا جەكە قاۋلى شىعارىلادى.

بۇعان دەيىنگى ءجارىسسوز كەزىندە پروكۋرور 23 جاستاعى راحىمجان جانسەيىتتى ءولتىردى دەپ ايىپتالعان يۋسيف نۋرۋلۋنى 20 جىلعا باس بوستاندىعىنان ايىرىپ، ايرىقشا تارتىپتەگى تۇزەتۋ كولونياسىنا جىبەرۋدى، قالعان 12 ايىپتالۋشىنى التى جىلعا باس بوستاندىقتارىنان ايىرىپ، جالپى رەجيمدەگى تۇزەتۋ كولونياسىنا جىبەرۋدى سۇراعان بولاتىن.

ايىپتالۋشىلاردىڭ كەيبىرى تاعىلعان ايىپتى ءىشىنارا، كەيبىرى تولىق مويىنداعان. وقيعا كەزىندە قازا بولعان راحىمجان جانسەيىتتىڭ اكەسى 30 ميلليون تەڭگە مورالدىق وتەماقى العانىن ايتقان.

«درەۆني ريم» مەيرامحاناسىنداعى توبەلەس پەن كىسى ءولىمى جايلى سوت پروتسەسى قىركۇيەك ايىندا باستالعان. راحىمجان جانسەيىتتىڭ دەنەسى 1 قاڭتاردا، مەيرامحاناداعى توبەلەستەن كەيىن بىرنەشە ساعاتتان سوڭ تابىلعان. ايىپتاۋ اكتىسىندە ونىڭ قان كەتىپ قايتىس بولعانى كورسەتىلگەن. بۇرىن تەرگەۋ بارىسىندا راحىمجان جايسەيىتتى بىرنەشە ادام جابىلىپ ۇرىپ، پىشاقتاعانى ايتىلعان. توبەلەس كەزىندە بارلىعى بەس ادام پىشاقتالعان.

ايىپتاۋ مالىمەتىنە قاراعاندا، توبەلەس كەزىندە ەكى ايىپتالۋشى پىشاق قولدانعان. يۋسۋف نۋرۋلى ءۇش ادامدى، گ. نارەك ەكى ادامدى پىشاقتاعان. گ.نارەككە وسى وقيعادان كەيىن ىزدەۋ جاريالانىپ، رەسەيدە ۇستالعان. ءالى قازاقستانعا ەكستراديتسيالانباعان گ.نارەكتىڭ ءىسى بولەك قارالادى.

"درەۆني ريم" مەيرامحاناسىنداعى جاپپاي توبەلەس پەن كىسى ءولىمى قازاقستان قوعامى مەن كەيبىر شەتەلدە ءتۇرلى رەاكتسيا تۋدىرعان. الەۋمەتتىك جەلىلەردە "توبەلەسكە ارميان دياسپوراسىنىڭ وكىلدەرى قاتىستى" دەگەن اقپاراتتار تاراعان. قازاقستان بيلىگى مەن ارميان بيلىگى مۇنى "تۇرمىستىق جانجال" دەپ اتاپ، "ۇلت ارالىق قاتىناس" دەپ سيپاتتاماۋعا شاقىرعان.

"ازاتتىق" راديوسى
فوتو اۆتورى ەلەنا ۆەبەر
پىكىرلەر