ءاليا نازارباەۆا قازاق حاندىعىنىڭ 550 جىلدىعىنا وراي قولعا الىنعان «قازاق ەلى» تاريحي كوپسەريالى فيلمىندە باستى ءرولدى سومداۋى مۇمكىن. كارتينانىڭ پروديۋسەرى ارمان اسەنوۆتىڭ مالىمدەۋىنشە، ءاليا نازارباەۆامەن بۇگىندە ءامىر تەمىردىڭ نەمەرەسى ءرابيا سۇلتان بەگىمنىڭ ءرولىن سومداۋ تۋرالى كەلىسسوزدەر جۇرزىلۋدە. تامىز ايىندا باستالعان ءتۇسىرىلىم جۇمىستارى بۇگىندە الماتى وبلىسى ۇيعىر اۋدانىنا قاراستى شوشاناي اۋىلىندا ءجۇرىپ جاتىر. ال، قىس مەزگىلىندە ءتۇسىرىلىم توبى «قازاقفيلم» كينوستۋدياسىنىڭ جابىق پاۆيلوندارىندا سارايدىڭ ىشكى كورىنىستەرىن تۇسىرۋگە كوشەدى.
XV عاسىردىڭ ورتا تۇسىنان باستاۋ الاتىن كوركەم فيلم تەك قازاق تىلىندە كورسەتىلەدى جانە باستى رولدەرگە شەتەلدەن اكتەرلەر شاقىرىلماعان. وندا قازاق حاندىعىنىڭ قازىعىن قاققان كەرەي مەن جانىبەكتىڭ جانە ولاردان كەيىن حاندىقتى باسقارىپ، بەكۋىنە ىقپال ەتكەن بۇرىندىق، قاسىم حانداردىڭ قيلى تاعدىرى تولىقتاي باياندالماق.
تەلەحيكايانىڭ باستى كەيىپكەرلەرىن قازاقستاندىق تانىمال اكتەرلار ەركەبۇلان دايىروۆ (جانىبەك), قايرات كەمالوۆ (كەرەي), ايان وتەپبەرگەنوۆ (بۇرىندىق), دوسحان جولجاقسىنوۆ، ديماش احيموۆ، جانار ساحات (ابىلقايىردىڭ ايەلى), شۇعىلا ساپارعاليقىزى (كەرەيدىڭ ايەلى), مادينا يسمانوۆا (جانىبەكتىڭ ايەلى) سومدايدى. سونىمەن قاتار، وسىناۋ تۋىندىعا قازاقستاندىق ارتىستەرمەن قاتار حاكاسيا، تۋۆا، وزبەكستان ەلىنىڭ اكتەرلەرى دە اتسالىسادى. ال، تريۋكتەرگە بەلگىلى كاسكادەر جايداربەك كۇنعوجينوۆتىڭ كومانداسى جاۋاپ بەرەدى.
تانىمال رەجيسسەر رۇستەم ابدىراشەۆتىڭ جەتەكشىلىگىمەن جۇزەگە اساتىن جوبانىڭ ستسەناريىن سماعۇل ەلۋباي مەن تيمۋر جاقسىلىقوۆ جازعان. ال، ءفيلمنىڭ پروديۋسسەرى - ارمان اسەنوۆ.
ايتا كەتەيىك، 10 سەريالى «قازاق ەلى» تاريحي ءفيلمى 2016 جىلدىڭ ناۋرىز ايىندا كورەرمەن نازارىنا ۇسىنىلماق.
