بۇگىن، 16 قازاندا ادام قۇقىعى بويىنشا حالىقارالىق بيۋرونىڭ الماتىداعى ءماسليحات زالىنان تىكەلەي ەفيرگە شىققان قوعام بەلسەندىسى جانبولات ماماي جاڭا ساياسي پارتيا قۇرىلاتىنىن مالىمدەدى.
جانبولات مامايدىڭ ايتۋىنشا، "قازىرگى ۋاقىتتا قازاقستاننىڭ ساياسي كەڭىستىگىندە شىنايى وزگەرىستەردى قالايتىن جانە وپپوزيتسيالىق باعىتتاعى ساياسي پارتيا جوق".
- بيلىكتىڭ رۇقساتىنسىز ساياسي پارتيا قۇرۋ وڭاي ەمەس ەكەنىن، ءتىپتى قۋعىن-سۇرگىن جاسايتىنىن دا بىلەمىز، وعان قاراماستان جاڭا ساياسي كۇشكە اينالۋعا دايىنبىز، - دەدى ول.
جانبولات مامايدىڭ سوزىنشە، قازىر ون ادامنان تۇراتىن باستاماشىل توپ بار، ال پارتيانىڭ نەگىزگى پلاتفورماسى پارتياعا كىرۋگە ىقىلاس بىلدىرگەن بەلسەندىلەرمەن اقىلداسۋ بارىسىندا ناقتىلانادى، تاياۋدا پارتيانىڭ قۇرىلتاي سەزى وتەدى. بەلسەندى قازاقستانعا ء"بىرىنشى كەزەكتە شىنايى ساياسي رەفورما كەرەك، ساياسي پارتيالار تۋرالى زاڭ قايتا قارالىپ، ساياسي تۇتقىندار شۇعىل بوساتىلۋى ءتيىس" دەپ سانايدى.
جانبولات ماماي، ساياساتكەر تولەگەن جۇكەەۆ وتىرعان زالعا سكايپ ارقىلى قوسىلعان سەرگەي دۋۆانوۆ "قازىرگى جاعدايدا بيلىككە ارالاسۋدىڭ لەگيتيمدى جولى - ساياسي پارتيا قۇرۋ" ەكەنىن ايتتى. ونىڭ سوزىنشە، "قازاقستاندا وپپوزيتسيالىق پارتيا قۇرۋ ءۇشىن كەم دەگەندە 40 مىڭ ادامنىڭ قولىن جيناۋ كەرەك. بىراق ول قيىن ەمەس، ونى تىركەۋدەن وتكىزۋ قيىن".
- تىركەي مە، جوق پا، ەكىنشى ماسەلە. بىرىنشىدەن تىركەۋ پروتسەدۋراسىنىڭ ءوزى ماڭىزدى. ەگەر جاڭا ساياسي پارتيانى تىركەمەيتىن بولسا، بيلىكتىڭ دەموكراتياعا قاراي قادام باسۋعا قۇلقى جوق ەكەنى، قازاقستان پرەزيدەنتى قاسىم-جومارت توقاەۆتىڭ ساياسي رەفورما تۋرالى ايتقاندارىنىڭ جاي ءسوز ەكەنى بەلگىلى بولادى. وندا بيلىك ءبىرجولا سەنىمنەن ايىرىلادى، - دەدى ول.
بۇرىن قازاقستان قاۋىپسىزدىك كەڭەسى توراعاسىنىڭ ورىنباسارى، حاتشىسى، قازاقستاننىڭ يرانداعى ەلشىسى قىزمەتىن اتقارعان وپپوزيتسياداعى ساياساتكەر تولەگەن جۇكەەۆ "جاستاردىڭ ساياسي پارتيا قۇرىپ، اۆتوريتارلى جۇيەنى وزگەرتۋگە كىرىسكەنىن" قولدايتىنىن ايتتى.
ءوزى دە پارتيا جۇمىسىنا ارالاسقالى وتىرعانىن اڭعارتقان ول تىكەلەي ەفيردەن قويىلعان سۇراقتاردىڭ بىرىنە "وتكەن سايلاۋداعى ساياسي ساتقىندىقتى قايتالامايمىز» دەپ جاۋاپ بەردى.
قازىر قازاقستاندا مەملەكەتتىك تىركەۋدە 7 پارتيا بار. ونىڭ تورتەۋى - "نۇر وتان", "اق جول", "اۋىل" جانە كوممۋنيستىك حالىقتىق پارتيانىڭ قازاقستان پارلامەنتىندە فراكتسيالارى جۇمىس ىستەيدى. كوپ جىل جارماحان تۇياقباي جەتەكشىلىك ەتىپ، بيىل كوكتەمنەن بەرى باسشىلىعى ەكى رەت وزگەرگەن جالپى ۇلتتىق سوتسيال دەموكراتيالىق پارتيا سوڭعى جىلدارى "تىركەۋدە تۇرعان جالعىز وپپوزيتسيالىق پارتيا" سانالىپ كەلگەن. پارتيا ىشىندەگى سوڭعى وزگەرىستەردەن كەيىن وپپوزيتسيالىق بەلسەندىلەر مەن پارتيا مۇشەلەرى اراسىندا "جسدپ وپپوزيتسيالىق پارتيا ما، جوق پا؟" دەگەن داۋ تۋعان.
بۇرىن تاۋەلسىز "تريبۋنا" گازەتىن باسقارعان جۋرناليست، قوعام بەلسەندىسى جانبولات ماماي "مۇحتار ابليازوۆتان قارجى الدى" دەپ ايىپتالىپ، شارتتى جازامەن بوساتىلعان. جانبولات ماماي وزىنە تاعىلعان ايىپتى مويىنداماعان. بيىل جازدا جالپى ۇلتتىق سوتسيال دەموكراتيالىق پارتيا جەتەكشىسى ەرمۇرات باپي وسى پارتيانىڭ باسشىلىعىنا جانبولات مامايدى ۇسىنعىسى كەلگەنىن حابارلاعان بولاتىن. الايدا، جالپى ۇلتتىق سوتسيال دەموكراتيالىق پارتيا سەزىندە ەرمۇرات باپي كوپشىلىك داۋىسپەن قىزمەتىنەن الىنىپ، ورنىنا پارتيا توراعاسىنىڭ ورىنباسارى اسحات راحىمجانوۆ سايلانعان.
