Bügın, 16 qazanda adam qūqyǧy boiynşa halyqaralyq biuronyŋ Almatydaǧy mäslihat zalynan tıkelei efirge şyqqan qoǧam belsendısı Janbolat Mamai jaŋa saiasi partiia qūrylatynyn mälımdedı.
Janbolat Mamaidyŋ aituynşa, "qazırgı uaqytta Qazaqstannyŋ saiasi keŋıstıgınde şynaiy özgerısterdı qalaityn jäne oppozisiialyq baǧyttaǧy saiasi partiia joq".
- Bilıktıŋ rūqsatynsyz saiasi partiia qūru oŋai emes ekenın, tıptı quǧyn-sürgın jasaitynyn da bılemız, oǧan qaramastan jaŋa saiasi küşke ainaluǧa daiynbyz, - dedı ol.
Janbolat Mamaidyŋ sözınşe, qazır on adamnan tūratyn bastamaşyl top bar, al partiianyŋ negızgı platformasy partiiaǧa kıruge yqylas bıldırgen belsendılermen aqyldasu barysynda naqtylanady, taiauda partiianyŋ qūryltai sezı ötedı. Belsendı Qazaqstanǧa "bırınşı kezekte şynaiy saiasi reforma kerek, saiasi partiialar turaly zaŋ qaita qaralyp, saiasi tūtqyndar şūǧyl bosatyluy tiıs" dep sanaidy.
Janbolat Mamai, saiasatker Tölegen Jükeev otyrǧan zalǧa skaip arqyly qosylǧan Sergei Duvanov "qazırgı jaǧdaida bilıkke aralasudyŋ legitimdı joly - saiasi partiia qūru" ekenın aitty. Onyŋ sözınşe, "Qazaqstanda oppozisiialyq partiia qūru üşın kem degende 40 myŋ adamnyŋ qolyn jinau kerek. Bıraq ol qiyn emes, ony tırkeuden ötkızu qiyn".
- Tırkei me, joq pa, ekınşı mäsele. Bırınşıden tırkeu prosedurasynyŋ özı maŋyzdy. Eger jaŋa saiasi partiiany tırkemeitın bolsa, bilıktıŋ demokratiiaǧa qarai qadam basuǧa qūlqy joq ekenı, Qazaqstan prezidentı Qasym-Jomart Toqaevtyŋ saiasi reforma turaly aitqandarynyŋ jai söz ekenı belgılı bolady. Onda bilık bırjola senımnen aiyrylady, - dedı ol.
Būryn Qazaqstan qauıpsızdık keŋesı töraǧasynyŋ orynbasary, hatşysy, Qazaqstannyŋ İrandaǧy elşısı qyzmetın atqarǧan oppozisiiadaǧy saiasatker Tölegen Jükeev "jastardyŋ saiasi partiia qūryp, avtoritarly jüienı özgertuge kırıskenın" qoldaitynyn aitty.
Özı de partiia jūmysyna aralasqaly otyrǧanyn aŋǧartqan ol tıkelei efirden qoiylǧan sūraqtardyŋ bırıne "ötken sailaudaǧy saiasi satqyndyqty qaitalamaimyz» dep jauap berdı.
Qazır Qazaqstanda memlekettık tırkeude 7 partiia bar. Onyŋ törteuı - "Nūr Otan", "Aq jol", "Auyl" jäne kommunistık halyqtyq partiianyŋ Qazaqstan parlamentınde fraksiialary jūmys ısteidı. Köp jyl Jarmahan Tūiaqbai jetekşılık etıp, biyl köktemnen berı basşylyǧy ekı ret özgergen Jalpy ūlttyq sosial demokratiialyq partiia soŋǧy jyldary "tırkeude tūrǧan jalǧyz oppozisiialyq partiia" sanalyp kelgen. Partiia ışındegı soŋǧy özgerısterden keiın oppozisiialyq belsendıler men partiia müşelerı arasynda "JSDP oppozisiialyq partiia ma, joq pa?" degen dau tuǧan.
Būryn täuelsız "Tribuna" gazetın basqarǧan jurnalist, qoǧam belsendısı Janbolat Mamai "Mūhtar Abliazovtan qarjy aldy" dep aiyptalyp, şartty jazamen bosatylǧan. Janbolat Mamai özıne taǧylǧan aiypty moiyndamaǧan. Biyl jazda jalpy ūlttyq sosial demokratiialyq partiia jetekşısı Ermūrat Bapi osy partiianyŋ basşylyǧyna Janbolat Mamaidy ūsynǧysy kelgenın habarlaǧan bolatyn. Alaida, jalpy ūlttyq sosial demokratiialyq partiia sezınde Ermūrat Bapi köpşılık dauyspen qyzmetınen alynyp, ornyna partiia töraǧasynyŋ orynbasary Ashat Rahymjanov sailanǧan.
