جەكسەنبى كۇنى پرەزيدەنت قاسىم-جومارت توقاەۆ ءوز جارلىعىمەن قورعانىس ءمينيسترى رۋسلان جاقسىلىقوۆتى قىزمەتىنەن بوساتتى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى مالىمدەدى.
بۇعان دەيىن رۋسلان جاقسىلىقوۆ اسكەردەگى ادام ولىمىنە بايلانىستى قوعام سىنىنا قالعان. جوعارى شەندى شەنەۋنىكتىڭ وسىعان بايلانىستى ورىنسىز جاۋاپ بەرگەنى دە نارازىلىق تۋدىرعان. ونىڭ مەملەكەتتتىك تىلگە شورقاقتىعى دا تالاي سىنالعان. سوڭعى كەزدەرى ادامداردى اسكەرگە كۇشتەپ اكەتۋ وقيعالارى دا جيىلەگەن.
ودان بولەك، رۋسلان جاقسىلىقوۆ وسىدان تۋرا ءبىر اي بۇرىن جەڭىستىڭ 80 جىلدىعىندا ماسكەۋگە جاساعان ساپارى بارىسىندا رەسەيمەن قارىم-قاتىناس جايىندا ء"بىز قوناق ەمەسپىز. ءبىز – دوستارمىز، وداقتاسپىز جانە قارۋلاس باۋىرلارمىز"- دەپ اتاپ ءوتىپ، ەلىمىزدە وتكەن پارادتى "وتان قورعاۋشىلار كۇنىنە وراي ەمەس، جەڭىس كۇنىنە ارنايى وتكىزىلگەنىن" ايتقان ەدى.
مۇنىڭ سىرتىندا ءبىراز بۇرىن جۇبايى جانە 3 بالاسىمەن اسكەري كيىم كيىپ، مەدالدارمەن جاساعان فوتوسەسسياسى حالىق اراسىندا كەڭىنەن تالقىلانعان ەدى.
رۋسلان جاقسىلىقوۆ قاڭتار وقيعاسىنان كەيىن 2022 جىلعى 19 قاڭتاردان باستاپ قورعانىس ءمينيسترى بولىپ تاعايىندالعان بولاتىن. كەيىن قايتارا تاعايىندالعان كەزدەرى بولدى.
جاقسىلىقوۆتىڭ ورنىنا مەملەكەت باسشىسىنىڭ بۇگىنگى جارلىعىمەن داۋرەن قوسانوۆ قازاقستان رەسپۋبليكاسىنىڭ قورعانىس ءمينيسترى بولىپ تاعايىندالدى.
داۋرەن قوسانوۆ بۇعان دەيىن قورعانىس ءمينيسترىنىڭ ورىنباسارى – قازاقستان قارۋلى كۇشتەرىنىڭ اۋە قورعانىسى كۇشتەرىنىڭ باس قولباسشىسى قىزمەتىن اتقارعان.
55 جاستاعى گەنەرال-لەيتەنانت اۆياتسيا داۋرەن قوسانوۆ ارماۆير جوعارى اسكەري ۇشقىشتار اۆياتسيالىق ۋچيليششەسىن (1990 ج.), يۋ.ا. گاگارين اتىنداعى اۋە كۇشتەرى اكادەمياسىن، سونداي-اق رەسەي فەدەراتسياسى قارۋلى كۇشتەرى باس شتابىنىڭ اسكەري اكادەمياسىن تامامداعان.
ول «اسكەري ۇشقىش-مەرگەن» اتاعىنىڭ يەگەرى.
