قازاقستاندا اۆتوكولىكتىڭ الدىڭعى بۇيىرلىك تەرەزەلەرىن قاراڭعىلاۋعا كوپجىلدىق تىيىمدى الىپ تاستاۋ ۇسىنىلعان. الايدا ءىىم ۇسىنىستى قابىلدامادى، دەپ حابارلايدى "ادىرنا" ۇلتتىق پورتالى.
بۇل باستامانى ماجىلىستەگى Respublica پارتياسىنىڭ دەپۋتاتتارى كوتەردى. دەپۋتاتتار مۇنداي رۇقساتتىڭ اقىلى نەگىزدە جۇزەگە اسۋىن ۇسىنعان. ناقتىراق، قاراڭعىلاۋ قۇنى شامامەن 50 ايلىق ەسەپتىك كورسەتكىشتى (اەك), ياعني 196 600 تەڭگەنى قۇرايدى.
دەپۋتاتتار بۇل باستاما بيۋدجەتكە جىل سايىن 50 ميلليارد تەڭگەدەن استام تابىس اكەلەدى دەپ ەسەپتەگەن. ولار اسىرەسە ەلىمىزدىڭ وڭتۇستىك وڭىرلەرىندەگى (الماتى، شىمكەنت، تاراز) ىستىق كليماتتى ەسكەرىپ، جۇرگىزۋشىلەردىڭ دەنساۋلىعىنا قاۋىپ توندىرەتىن فاكتورلاردى اتاپ ءوتتى. اۆتوەكسپەرت الەكسەي الەكسەەۆتىڭ ايتۋىنشا، كولىكتە كۇن ۇزاق وتىراتىن تاكسي جۇرگىزۋشىلەرى ءجيى كۇنگە كۇيىپ، ءتىپتى تەرى اۋرۋلارىنا شالدىعۋى مۇمكىن.
ىشكى ىستەر مينيسترلىگى بۇل ۇسىنىسقا سكەپتيكالىق كوزقاراسپەن قاراپ وتىر. ۆەدومستۆونىڭ مالىمدەۋىنشە، تەرەزەلەردى قاراڭعىلاۋ — جۇرگىزۋشىلەردىڭ جول ەرەجەسىن بۇزۋىن انىقتاۋدى قيىنداتادى. قازىرگى ۋاقىتتا ءىىم قاۋىپسىزدىك بەلدىگىن تاقپاعان نەمەسە كولىك جۇرگىزۋ كەزىندە تەلەفون پايدالاناتىن جۇرگىزۋشىلەردى انىقتايتىن جاڭا كامەرالار جۇيەسىن سىناقتان وتكىزىپ جاتقانىن حابارلادى.
مۇنداي تەحنولوگيالاردى ءتيىمدى قولدانۋ ءۇشىن كولىكتىڭ ءىشىن انىق كورۋ وتە ماڭىزدى. سونىمەن قاتار، مينيسترلىك قاراڭعىلاۋ — كولىك ارقىلى جاسالعان قىلمىستاردى تەرگەۋدى قيىنداتىپ، قوعامدىق قاۋىپسىزدىككە قاتەر توندىرەتىنىن ايتادى.
ءىىم وكىلدەرى قاراڭعىلاۋ رۇقسات ەتىلسە، جارىق وتكىزۋ نورمالارىن بۇزعان جۇرگىزۋشىلەردى جازالاۋ قيىن بولاتىنىن ەسكەرتتى. قاراڭعىلىق دەڭگەيىن انىقتايتىن ارنايى قۇرىلعىلار قاجەت ەكەنىن ەسكەرتىپ، ولاردى ساتىپ الۋ بيۋدجەتتەن قوسىمشا شىعىندى تالاپ ەتەتىنىن اتاپ ءوتتى.
قىرعىزستاندا وسىنداي جۇيە ەنگىزىلگەن. وندا ءبىر جىلدىڭ ىشىندە بيۋدجەتتىڭ كىرىسى 3,9 ميلليارد تەڭگەگە جۋىق قاراجاتپەن تولىققان.
ۇقساس جاڭالىقتار
