وبلىس مەكەمە اتاۋلارىن لاتىن الىپبيىندە تاڭبالاۋ

594

بۇگىن، ياعني 11 قازاندا ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن «قالا، اۋدان جانە وبلىس مەكەمە اتاۋلارىن لاتىن الىپبيىندە تاڭبالاۋ» اتتى رەسپۋبليكالىق ونلاين سەمينارى ءوتتى. 

ونلاين سەميناردا ورفوگرافيالىق توپ مۇشەلەرى تاراپىنان ازىرلەنگەن «قالا، وبلىس، اۋدان مەكەمە اتاۋلارىنىڭ انىقتامالىعى» تالقىعا سالىندى. ساراپشى ماماندار تاراپىنان بىرقاتار ۇسىنىس-پىكىرلەر ايتىلىپ، اۆتورلارعا جولداندى. ساراپشىلار تاراپىنان بىرقاتار ماسەلەلەر كوتەرىلىپ، سەمينارعا قاتىسۋشىلار تالقىسىنا سالىندى.

 

فيلولوگيا دوكتورى (PhD) اسەم قاسىموۆا قازاقستاننىڭ بارلىق وڭىرلەرىندە ەرگونيمدەردىڭ جازىلۋىندا بىرىزدىلىكتىڭ بولمايتىندىعىن، كوبىنەسە اتاۋلاردىڭ ورىس تىلىندە بەرىلىپ، قازاقشاعا قاتە اۋدارىلاتىندىعىن، ءبىر عانا مەكەمە، ۇيىم اتاۋلارىنىڭ قازاقشا نۇسقاسى ءارتۇرلى بەرىلەتىندىگىن، گرامماتيكالىق تۇرعىدان قاتە جازىلۋى ءجيى كەزدەسەتىندىگىن اتاپ ءوتىپ، مۇنداي ولقىلىقتاردى رەتكە كەلتىرۋدە  انىقتامالىقتىڭ اسا قاجەت ەكەندىگىن اتاپ ءوتتى.

«الماتىكىتاپ» باسپاسىنىڭ باس رەداكتورى ومىرزاق ابدىشۇكىرۇلى قازاقستان اتاۋى حالىقارالىق ارەنادا ءالى دە سوۆەتتىك نۇسقامەن جازىلىپ جاتقاندىعىن، حالىقارالىق Kazakhstan جانە قازىرگى قولدانىستاعى Qazaqstan اتاۋلارىنىڭ قولدانىلۋىن رەتتەۋ  كەرەكتىگىن ايتتى. 

قاراعاندى وبلىسىنىڭ تىلدەردى دامىتۋ جونىندەگى باسقارماسى جانىنداعى رەسۋرستىق ءتىل ورتالىعى مەڭگەرۋشىسى جۇپار جاقانوۆا قازىرگى تىلدىك كەڭىستىكتەگى ەرگونيمدەردىڭ ساۋاتتى جازىلۋىن لاتىننەگىزدى گرافيكاعا كوشەر تۇستا رەتتەپ الۋدىڭ اسا ماڭىزدىلىعىن جانە بۇل ماسەلە تەكتىلشى عالىمداردى عانا تولعاندىرىپ قويماي، تۇتاس قوعام نازارىندا بولاتىن ماسەلە ەكەندىگىن اتاپ ءوتتى. 

ە.ا.بوكەتوۆ اتىنداعى   قاراعاندى مەملەكەتىك  ۋنيۆەرسيتەتىنىڭ دوتسەنتى سۆەتا سامەنوۆا جەكەمەنشىك كوممۋنالدىق ۇيىمدار اتاۋلارىن ارنايى دايىندىعى جوق كوپتەگەن جارنامالىق اگەنتتىكتەردىڭ قىزمەتكەرلەرى قوياتىنىن، ەرگونيمدەردى تەوريالىق بازاعا سۇيەنە وتىرىپ بىرىزدەندىرۋ كەرەكتىگىن تىلگە تيەك ەتتى. 

ونلاين سەمينارعا اقمولا وبلىستىق وقۋ-ادىستەمەلىك ورتالىعىنىڭ، شقو تىلدەردى دامىتۋ جانە ۇيلەستىرۋ جۇمىسى ءبولىمىنىڭ، قوستاناي وبلىسى اكىمدىگىنىڭ تىلدەردى دامىتۋ باسقارماسىنىڭ، شىمكەنت قالالىق تىلدەردى وقىتۋ-ادىستەمەلىك ورتالىعىنىڭ، قىزىلوردا وبلىستىق ىشكى ساياسات باسقارماسى ءبولىمىنىڭ، جامبىل وبلىسى تىلدەردى وقىتۋ ورتالىعىنىڭ باسشىلارى مەن ماماندارى قاتىستى. 

"ادىرنا" ۇلتتىق پورتالى

 

پىكىرلەر