قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ اقمولا وبلىسى بويىنشا دەپارتامەنتى 2025 جىلعى 1 تامىز بەن 20 قازان ارالىعىندا وتەتىن ۇلتتىق اۋىل شارۋاشىلىعى ساناعىنا دايىندىق بارىسىن مالىمدەدى. بۇل تۋرالى دەپارتامەنت باسشىسى رۇستەم ەرعاليەۆ جۋرناليستەرمەن وتكەن بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
ساناق 2006-2007 جىلدان كەيىن العاش رەت وتكىزىلەدى. بۇل جولى ول حالىقارالىق ستاندارتتارعا سايكەس ءبىر كەزەڭدە، ياعني جانۋارلار مەن وسىمدىكتەر شارۋاشىلىعىن قاتار قامتىپ وتەدى.
«اۋىل شارۋاشىلىعى ساناعى – ەلىمىزدىڭ اگرارلىق سەكتورىنىڭ قۇرىلىمى مەن جاي-كۇيى تۋرالى وزەكتى ءارى سەنىمدى دەرەكتەر الۋعا مۇمكىندىك بەرەتىن اۋقىمدى ستاتيستيكالىق ناۋقان. ول ءتيىمدى مەملەكەتتىك ساياسات قۇرۋ، اۋىل وندىرۋشىلەرىن قولداۋ جانە ازىق-تۇلىك قاۋىپسىزدىگىن قامتاماسىز ەتۋ ءۇشىن قاجەت»، – دەدى ەرعاليەۆ.باسقارما باسشىسىنىڭ ايتۋىنشا، ساناققا دايىندىق 1,5 جىل بۇرىن باستالعان. ارنايى ۇكىمەتتىك كوميسسيا قۇرىلىپ، قۇقىقتىق اكتىلەر قابىلدانعان. وبلىستا وڭىرلىك كوميسسيا جۇمىس ىستەپ جاتىر، سونداي-اق بارلىق اۋدان مەن قالادا دا وسىنداي قۇرىلىمدار جاساقتالعان. وڭىرلىك ءىس-شارالار جوسپارى بەكىتىلگەن. بىلتىر پيلوتتىق ساناق وتكىزىلىپ، اقپاراتتىق جۇيەلەر مەن ادىستەمە سىناقتان وتكىزىلگەن. ساناققا اۋىل شارۋاشىلىعى قىزمەتىمەن اينالىساتىن زاڭدى تۇلعالار، جەكە كاسىپكەرلەر مەن شارۋا/فەرمەر قوجالىقتارى قاتىسادى. سونىمەن بىرگە ءۇي جانىنداعى جەر تەلىمىندە باۋ-باقشا ءوسىرىپ، مال ۇستايتىن جەكە ءۇي شارۋاشىلىقتارى دا ساناققا ەنەدى.
«بيىل 1–30 ماۋسىم ارالىعىندا ءوڭىردىڭ 10 قالاسىندا – قوسشى، ستەپنوگورسك، اقكول، اتباسار، ماكينسك، ستەپنياك، ەرەيمەنتاۋ، ەسىل، دەرجاۆينسك جانە ششۋچينسك قالالارىندا تىزىمدەۋ (ليستينگ) جۇمىستارى جۇرگىزىلەدى. بۇل كەزەڭدە جەكە ءۇي شارۋاشىلىقتارىنىڭ مەكەنجايى ناقتىلاپ، نەگىزگى ساناققا دايىندىق جاسالادى»، دەپ تولىقتىردى سپيكەر.نەگىزگى ساناق 1 تامىز بەن 20 قازان ارالىعىندا وتەدى. ونىڭ ءبىرىنشى كەزەڭىندە، 1–31 تامىز ارالىعىندا sanaq.gov.kz سايتىندا ونلاين ساۋالناما جۇرگىزىلەدى. رەسپوندەنتتەر ەتسق، QR-كود نەمەسە SMS ارقىلى تىركەلىپ، ساۋالنامانى وزدەرى تولتىرا الادى. ونلاين رەجيمنىڭ ىڭعايلىلىعى – ۋاقىت ۇنەمدەۋ مەن دەرەكتەردىڭ ساپاسىن ارتتىرۋ. ينتەرنەتكە قولجەتىمدىلىگى جوقتار ءۇشىن جەرگىلىكتى اكىمدىكتەر مەن ستاتيستيكا بولىمدەرىندە وزىنە-ءوزى قىزمەت كورسەتۋ بۇرىشتارى ۇيىمداستىرىلادى. 20 قىركۇيەكتەن باستاپ ينتەرۆيۋەرلەر ءۇي-ءۇيدى ارالاپ، وفلاين ساۋالناما جۇرگىزەدى. بۇل كەزەڭ ونلاين تولتىرىلماعان رەسپوندەنتتەردى قامتيدى. زاڭدى تۇلعالار مەن شارۋاشىلىقتاردان جەر جانە ەگىستىك اۋماعى، مال باسى، تەحنيكا، ينفراقۇرىلىم، ەڭبەك رەسۋرستارى مەن باسقا دا كورسەتكىشتەر تۋرالى مالىمەتتەر الىنادى. جەكە ءۇي يەلەرىنە جەر كولەمى، باقشا ەگۋ، مال ۇستاۋ جاعدايى تۋرالى قىسقارتىلعان ساۋالناما ۇسىنىلادى. ەرعاليەۆ اتاپ وتكەندەي، بارلىق مالىمەتتەر قۇپيا ساقتالىپ، تەك جالپىلانعان كۇيدە جاريالانادى. ال رەسپوندەنتتىڭ كەلىسىمىمەن كەيبىر مالىمەتتەر مەملەكەتتىك دەرەكتەر بازاسىن جاڭارتۋ ءۇشىن قولدانىلۋى مۇمكىن. ساناق جۇمىستارىنا 230-دان استام ينتەرۆيۋەر مەن نۇسقاۋشى تارتىلادى. ولاردىڭ قاتارىندا جۇمىسسىزدار، ستۋدەنتتەر جانە نيەت بىلدىرگەن تۇرعىندار بولادى. ولار ارنايى ونلاين پلاتفورمادان (Data Literacy Hub) وقۋ كۋرسىنان ءوتىپ، تەست تاپسىرادى. بۇل ءتاسىل ساپالى دەرەك جيناۋعا جول اشادى. سونىمەن قاتار «قازپوشتا» اق-مەن مەموراندۋم جاسالىپ، اۋىلدىق پوشتاشىلاردى دا وسى جۇمىسقا تارتۋ قاراستىرىلعان. 2025 جىلدىڭ جەلتوقسان ايىندا الدىن الا قورىتىندىلار جاريالانادى، ال تولىق ناتيجەلەر مەن اناليتيكالىق ەسەپتەر 2026 جىلى بيۋرونىڭ رەسمي سايتىندا جاريالانادى.
«ۇلتتىق اۋىل شارۋاشىلىعى ساناعى – اگرارلىق سالانى تۇراقتى دامىتۋ مەن ازىق-تۇلىك قاۋىپسىزدىگىن قامتاماسىز ەتۋدىڭ ستراتەگيالىق نەگىزى. بارشا ازاماتتاردى ساناققا جاۋاپكەرشىلىكپەن قاراپ، بەلسەندى قاتىسۋعا شاقىرامىز»، – دەپ تۇيىندەدى ەرعاليەۆ.تولىق اقپاراتتى 1446 ءنومىرى ارقىلى نەمەسە Sanaq-Myrza اتتى ۆيرتۋالدى كومەكشى ارقىلى الۋعا بولادى. ونلاين ساۋالناما كەزەڭىندە call-ورتالىق تاۋلىك بويى جۇمىس ىستەيدى.
